2 SAMUELE 20 - BIVHILI KHETHWA Mafhungo Madifha

Sheba a tshi shandukela Dafita

¹ Henefho Giligala ho vha hu na muṅwe muthu a sa ḓivhalei a no pfi Sheba ṅwana wa Bikhiri wa tsinde ḽa Benyamini. Onoyo a lidza phalaphala a ṱavha mukosi a ri, “Riṋe a ri na mukovhe kha Dafita, a ri na tshipiḓa kha ṅwana wa Isai. Inwi Vhaisraele, muṅwe na muṅwe nga a livhe hayani hawe!”

² Ndi hone vhanna vhoṱhe vha Israele vha tshi ṱutshela Dafita vha tevhela Sheba ṅwana wa Bikhiri. Hone vhanna vha Juda vha sala na khosi yavho vha tshimbila nayo u bva Jorodani u swika Jerusalema.

³ Musi Dafita a tshi vhuelela pfamoni yawe Jerusalema, o dzhia vhasadzi vha fumi vha dziphuli vhe a ri vha sale vha tshi londola pfamo, a ita uri vha dzule nḓuni yavho vha tshi lindiwa. O vha a tshi vha vhavhalela, hone a si vha dzhenise nḓuni. Vho vha vha tshi dzula vho hoṋelwa vha vhuya vha fa, vha tshi tshila unga tshilikadzi.

⁴ Ndi hone khosi i tshi amba na Amasa ya ri, “Rambani vhanna vha Juda vha ḓe ha nṋe hu sa athu fhela maḓuvha mararu, na inwi ni vhe hone.”

⁵ Hone musi Amasa a tshi yo ramba Vhajuda, a fhirisa tshifhinga tshe a vhetshelwa nga khosi.

⁶ Dafita a vhudza Abishai a ri, “Zwino Sheba ṅwana wa Bikhiri u ḓo ri ita zwo vhifhaho u fhira zwe ra itwa nga Abisalomo. Dzhiani vhanna vha mu londe, a sa ḓo wana miḓi i re na mitsheṱo a ri ponyoka a shavha.”

⁷ Ndi hone vhanna vha Juaba na vhalindakhosi na vhahali vhaṅwe vhoṱhe vha tshi takuwa Jerusalema vhe na Abishai vha yo londa Sheba.

⁸ Musi vhe tomboni ḽihulu ḽa Gibioni, Amasa a ḓa a vha ṱanganedza. Juaba o vha o ambara tshiambaro tshawe tsha nndwa, khunduni tsho vhofhiwa nga bannda i re na banga ngomu ha tshilanda tshaḽo. Musi a tshi khou tshimbila, banga ḽa bva kha tshilanda ḽa wela fhasi.

⁹ Juaba a amba na Amasa a ri, “Hu ita hani murathu?” Ndi hone Juaba a tshi fara ndebvu dza Amasa nga tshanḓa tshauḽa uri a mu kuvhatedze.

¹⁰ Amasa o vha a sa vhoni banga ḽe Juaba a ḽi fara, Juaba a mbo mu hushula thumbu ngaḽo, mala a wela fhasi. Amasa a sala a tshi fa a songo dovha a rungwa. Ni hone Juaba na murathu wawe Abishai vha tshi londa Sheba ṅwana wa Bikhiri.

¹¹ Muṅwe wa vhanna vha Juaba a ima tsini na Amasa a ri, “Ane a takalela Juaba, ane a vha wa Dafita, nga a tevhele Juaba!”

¹² Amasa o vha o rambalala vhukati ha nḓila o ḓala malofha. Munna uyo a vhona uri mmbi dzoṱhe dzi ḓa dzi tshi ima henefho. Musi a tshi vhona uri muṅwe na muṅwe a tshi swika kha Amasa u a ima, a mu kokodzela tsimuni a bva nḓilani, a mu fukedza nga nguvho.

¹³ Musi Amasa o no sudzuluswa nḓilani vhanna vhoṱhe vha fhirela phanḓa vhe na Juaba u londa Sheba ṅwana wa Bikhiri.

¹⁴ Sheba a fhira nga mashangoni a matsinde oṱhe a Israele a ya muḓini wa Abele Bethe Maakha, vhoṱhe vha mutupo wa Bikhiri vha kuvhangana vha mu tevhela vha dzhena muḓini.

¹⁵ Mmbi yoṱhe ye ya vha i na Juaba ya ḓa ya govhela Sheba henefho muḓini wa Abele Bethe Maakha. vha ita thulwi dza mavu dza ḓitika nga mutsheṱo wa nnḓa, vha thoma u bwa nga fhasi ha mutsheṱo uri u wele fhasi.

¹⁶ Henefho muḓini ho vha hu na musadzi wa vhuṱali. A ḓa a ṱavha mukosi e mutsheṱoni a ri, “Aa! Aa! Vhidzani Juaba a ḓe fhano uri ndi ambe nae.”

¹⁷ Juaba a ya khae, uyo musadzi a vhudzisa a ri, “Ndi vhone Vho-Juaba?” Juaba a fhindula a ri, “Ndi nṋe!” Musadzi a ri, “Nga vha thetshelese zwine nda amba.” Juaba a ri, “Ndi khou thetshelesa.”

¹⁸ Musadzi a ri, “Kale-kale vhathu vho vha vha tshi anzela u ri, ‘Tshimbilani ni yo wana nyeletshedzo muḓini wa Abele,’ zwa konou naka zwoṱhe.

¹⁹ Riṋe ri vhadziamulalo na u fulufhedzea kha ḽa Israele. Vhone vha khou linga u lozwa muḓi une wa vha ene mme kha ḽa Israele. Vha khou ṱoḓa u phusukanya zwine zwa vha zwa Muṋe washu naa?”

²⁰ Juaba a fhindula a ri, “Na kathihi! Izwo ndi nga si zwi ite, ngoho muḓi waṋu ndi nga si u phusukanye kana nda u lozwa!

²¹ Mafhungo ho ngo tou ralo. Uḽa munna ane a pfi Sheba ṅwana wa Bikhiri, ane a bva mivhunduni ya Efraimi, o isa tshanḓa tshawe kha khosi a lwa na Dafita. Ri kumedzeni munna onoyo muthihi, ndi hone ri tshi ḓo ṱuwa fhano muḓini.” Musadzi a vhudza Juaba a ri, “Ri ḓo ni posa ṱhoho yawe nga mutsheṱoni.”

²² Musadzi a vhudza vhathu vhoṱhe iyo nyeletshedzo yawe ya vhuṱali, vha tumula ṱhoho ya Sheba ṅwana wa Bikhiri vha i posa Juaba nga mutsheṱoni. Ndi hone Juaba a tshi lidza phalaphala, vhanna vhawe vha ṱuwa afho muḓini vha balangana, muṅwe na muṅwe a humela hayani hawe. Juaba a vhuelela ha khosi Jerusalema.

Magota a Dafita

²³ Mulangi wa mmbi yoṱhe ya Israele o vhe e Juaba; vhalindi vha khosi vho vha vha tshi langwa nga Benaya ṅwana wa Jehoyada,

²⁴ mulangi wa vhane vha shuma nga khombekhombe e Adinoramu, tshanḓa tsha khosi e Josafati ṅwana wa Ahiludu.

²⁵ Muṅwaleli wa khothe o vha e Sheva, vhotshifhe vhe Tsadoko na Abiathara.

²⁶ Na Ira a no bva muḓini wa Jairi o vha e muṅwe wa vhotshifhe vha Dafita.