2 SAMUELE 12 - BIVHILI KHETHWA Mafhungo Madifha

Nathani a tshi ita uri Dafita a ḓihaṱule

¹ Muṋe washu a ruma Nathani ha Dafita. Musi a tshi swika khae a ri, “Muḓini muṅwe ho vha hu na vhanna vhavhili, muṅwe o pfuma, muṅwe e mushai.

² Mupfumi o vha e na sambi ḽihulu ḽa nngu na kholomo,

³ hone mushai o vha a si na tshithu, a tshi tou vha na ngwana ya tsadzi ye a tou i renga. O i londola, a i alusa hayani hawe na vhana vhawe. O vha a tshi kovhekana nayo zwiḽiwa zwawe, i tshi nwa nga tshinwelo tshawe, a i kuvhatedza ya eḓela. Yo vha i tshi tou nga ṅwananyana wawe.

⁴ Zwino muṅwe musi uyo mupfumi a dalelwa nga mueni, hone nga vhutshivha a si fune u ṱhavhela uyo mueni nngu yawe kana kholomo uri a ḽe. Tshe a ita ho vha u yo dzhia ngwana iḽa ya tsadzi ya uḽa mushai, a ṱhavhela mueni wawe.”

⁵ Dafita a sinyutshela uyo mupfumi a vhudza Nathani a ri, “Nga Muṋe washu a tshilaho ndi ri munna o itaho zwo raloho o fanela u fa!

⁶ Iyo ngwana o fanela u i lifha luṋa, nge a ita tshiṱuhu tsho raloho.”

⁷ Nathani a vhudza Dafita a ri, “Munna onoyo ndi vhone! Muṋe washu Mudzimu wa Israele u ri, ‘Ndo u ta wa vha khosi ya ḽa Israele, nda u lamulela zwanḓani zwa Saulo.

⁸ Nda u ṋea muvhuso wawe na vhasadzi vhawe. Ndo u vhumba khosi ya Israele na Juda. Ngavhe izwo zwi vhe zwi songo eḓana ndo vha ndi tshi ḓo vha ndo u engedza zwiṅwe.

⁹ Ndi mini-ha wo nyadza ipfi ḽa Yahavee wa ita zwine a vhona zwo vhifha? Wo vhulaha Uria wa Muhithi nga pfumo, wa dzhia musadzi wawe a vha wau. Wo mu vhulahisa nga pfumo ḽa Vhaamoni.

¹⁰ Zwino-ha, pfumo a ḽi nga ṱutsheli nnḓu yau, nge wa nnyadza wa dzhia musadzi wa Uria wa Muhithi a vha wau.’

¹¹ “Muṋe washu u ri, ‘Ndi ḓo ita uri muṅwe wa muṱa wau a u ḓisele khombo. Ndi ḓo u dzhiela vhafumakadzi vhau u tshi zwi vhona, nda vha ṋea muṅwe ane a vha tsini na iwe, a dzhenisa vhafumakadzi vhau nḓuni masiari tshivhangalala.

¹² Iwe wo zwi ita tshiphirini, hone nṋe izwo zwithu ndi ḓo zwi bveledza masiari tshivhangalala Vhaisraele vhoṱhe vha tshi zwi vhona.’ ”

¹³ Ndi hone Dafita a tshi vhudza Nathani a ri, “Ndo khakhela Muṋe washu.” Nathani a fhindula a ri, “Muṋe washu o vha hangwela vhuvhi havho. Vha nga si fe.

¹⁴ Huno ṅwana ane vha ḓo bebelwa ene u ḓo fa, ngauri zwe vha ita zwo ita uri maswina a Muṋe washu a mu nyadze.”

¹⁵ Ndi hone Nathani a tshi ṱuwa a ya hayani. Muṋe washu a lwadza ṅwana we musadzi wa Uria a bebela Dafita.

Ṅwana wa Dafita a tshi fa

¹⁶ Dafita a rabela Mudzimu uri ṅwana a fhole, a ḓidzima zwiḽiwa, a dzhena pfamoni yawe, a ita vhusiku vhunzhi o lala fhasi.

¹⁷ Vhahulwane vha muṱa wawe vha sendela tsini hawe uri vha mu vuse afho fhasi, hone ene a hana, a si tende u ḽa zwiḽiwa navho.

¹⁸ Nga ḓuvha ḽa vhuṱanu na vhuvhili ṅwana a fa. Vhalanda vha Dafita vha ofha u mu vhudza uri ṅwana o fa, nge vha humbula vha ri, “Musi ṅwana a tshi kha ḓi tshila ro amba na Dafita, hone a si ri thetshelese. Ri nga mu vhudza hani uri ṅwana o fa? A nga ḓi ḓifunga.”

¹⁹ Dafita a vhona vhalanda vhawe vha tshi khou hevhedzana, a zwi ḓivha uri ṅwana o fa. A vhudzisa a ri, “Ṅwana u kha ḓi tshila?” Vhone vha fhindula vha ri, “O lovha.”

²⁰ Ndi hone Dafita a tshi vuwa fhaḽa, a ḓiambusa, a ḓola mapfura, a ambara zwiṅwe zwiambaro, a ya a luvha nḓuni ya Muṋe washu. A konou ya pfamoni yawe, a ri vha mu avhele zwiḽiwa, a ḽa.

²¹ Vhalanda vhawe vha tshi zwi vhona vha ri, “Nṋa ndi zwithu-ḓe zwine vha khou ita? Ṅwana a tshi kha ḓi tshila vho vha vha tshi ḓidzima vha lila, zwino ó lovha vha vho vuwa vha ita na u ḽa?”

²² Dafita a fhindula a ri, “Zwiḽa ṅwana a tshi kha ḓi tshila ndo ḓidzima zwiḽiwa nda lila. Ndo elekanya nda ri, ‘Hu ḓivha nnyi? Muṋe washu a nga kha ḓi nkhathutshela a litsha ṅwana a tshila.’

²³ Huno zwino o fa, ndi ḓo ḓidzimelani zwiḽiwa? Ndi nga dovha nda mu vhuisa naa? Nṋe ndi ḓo ya hune a vha hone, hone ene a nga si tsha vhuya kha nṋe.”

U bebwa ha Solomoni

²⁴ Ndi hone Dafita a tshi khuthadza mufumakadzi wawe Batshiba, a mu dzhenisa nḓuni. Batshiba a beba ṅwana wa mutukana, Dafita a ri u pfi Solomoni. Muṋe washu a funa uyo mutukana,

²⁵ a ruma muporofita Nathani uri a mu rine ḽa Jedidia (Mufunwa-nga-Muṋe-washu).

Dafita a tshi thuba Raba

²⁶ Juaba o vha a tshi khou lwa na vha Raba musanda wa Vhaamoni, a thuba pfamo ḽa musanda.

²⁷ Ndi hone a tshi ruma vhaḓinḓa ha Dafita vha ri, “Ndo lwa na vha Raba, nda thuba zwisima zwavho zwa maḓi.

²⁸ Zwino nga vha kuvhanganye iṅwe mmbi yoṱhe, vha govhele muḓi vha u thube. Vha sa ḓa nṋe ndi nga thuba uyu muḓi wa mbo vha wanga.”

²⁹ Ndi hone Dafita a tshi kuvhanganya mmbi yoṱhe, a livha Raba, a lwa na muḓi a u thuba.

³⁰ Dafita a bvula mudzimu wavho Milikhomu khare ya vhuhosi ya musuku, tshileme tshayo tsho vha tshi tshi nga vha khilogiramu dza 35, nahone yo vha i na ndalama khayo. Dafita a dzhia iyo khare a i ambara ṱhohoni, a thuba zwithu zwinzhi afho muḓini,

³¹ vhathu vha afho muḓini a vha bvisela nnḓa, a vha shumisa nga dzisaha na tshezela dza tsimbi, na mbaḓo, vhaṅwe a vha vhaḓisa zwidina zwa matombo. Vhathu vha miḓi yoṱhe ya Vhaamoni a vha ita zwenezwo. Ndi hone Dafita na mmbi yawe yoṱhe vha tshi vhuelela Jerusalema.