2 MAHOSI 4 - BIVHILI KHETHWA Mafhungo Madifha

Mapfura a tshilikadzi

¹ Musadzi wa muṅwe munna wa tshigwada tsha vhaporofita o vhuya a lilela Elisha a ri, “Munna wanga o lovha nahone vhone vha a zwi ḓivha uri o vha a tshi ofha Muṋe washu. Huno zwino munna we a mu pamba tshelede u khou ḓa u dzhia vhatukana vhanga vhavhili uri a vha ite phuli vha lifhe mulandu wa munna wanga.”

² Elisha a fhindula uyo musadzi a ri, “Ndi tshini tshine nda nga vha itela? Nga vha dzou mmbudza, vha na mini muṱani?” Musadzi uyo a fhindula a ri, “Thi na tshithu, tshine nda vha natsho ndi mvuvhelo ya zwipfuranyana.”

³ Elisha a ri, “Nga vha tendeleke na vhahura vhavho vhoṱhe vha ende vha tshi humbela mvuvhelo dzi si na tshithu. Dzi tou vha nnzhi.

⁴ Zwenezwo vha dzhene nḓuni na avho vhana vhavho vha vhatukana vha vale vothi. Vha shele mapfura mvuvheloni dzoṱhe, iṅwe na iṅwe i ri u ḓala vha i vhetshele thungo.”

⁵ Musadzi uyo a ṱuwa, a dzhena nḓuni na vhana vhawe a vala vothi. Vha mu ṋekedza mvuvhelo, ene a tshi khou ḓi shela mapfura khadzo.

⁶ Musi mvuvhelo dzo no ḓala dzoṱhe, a vhudza muṅwe ṅwana wawe a ri, “Ḓisani iṅwe mvuvhelo.” Ṅwana a fhindula a ri, “A hu tshee na mvuvhelo yo salaho.” Zwenezwo mapfura a mbo ḓi kaṱuwa.

⁷ Musadzi uyo a yo vhudza muḓinḓa wa Mudzimu, ene a ri, “Nga vha yo rengisa ayo mapfura vha lifhe mulandu wavho. Vhone na vhana vhavho vha ḓo tshila nga yo salaho.”

Mutukana wa musadzi wa Mushuneme a tshi vuswa o fa

⁸ Muṅwe musi Elisha a ya Shuneme. Henefho ho vha hu na musadzi wa mupfumi, onoyo a mu vhidzela tshiswiṱulo. U bva zwenezwo misi yoṱhe a tshi fhira nga henefho o vha a tshi ḓi dzhena a ḽa.

⁹ Musadzi uyo a vhudza munna wawe a ri, “Ndi a ḓivha uri munna uyu ane a ḓi dzhena fhano ndi mukhethwa, ndi muḓinḓa wa Mudzimu.

¹⁰ Nga ri fhaṱe kukamara nṱha ha ṱhanga, ri mu vhetshele mbete na ḓafula na tshidulo na luvhone. Musi a tshi ḓa u ri dalela u ḓo lala hone.”

¹¹ Musi muṅwe musi Elisha o ḓa, a gonya kamarani yawe a lala henefho.

¹² Elisha a vhudza mushumi wawe Gehasi a ri, “Vhidzani uḽa musadzi wa Mushuneme.” Gehasi a mu vhidza a ḓa a ima phanḓa ha Elisha.

¹³ Elisha a vhudza Gehasi a ri, “Mu vhudzeni ni ri, ‘Vho tou ḓidina nga u rali vha tshi itela riṋe. Zwino ndi nga vha livhuha nga mini? Ndi nga vha ambela na khosi kana mulangammbi?’ ” Musadzi uyo a fhindula a ri, “Ndi dzula na vhathu vha hashu, a thi na tshine nda shaya.”

¹⁴ Elisha a vhudzisa Gehasi a ri, “Musadzi uyu ndi nga mu tonda nga mini?” Gehasi a fhindula a ri, “Tshi hone; musadzi uyu ha na ṅwana wa mutuka, na munna wawe o no kalaha.”

¹⁵ Ndi hone Elisha a tshi ri, “Mu vhidzeni.” Gehasi a mu vhidza, a ḓa a ima muṋangoni.

¹⁶ Elisha a mu vhudza a ri, “Ṅwakani nga tshifhinga tshenetshi vha ḓo vha vho takula ṅwana wa mutukana.” Musadzi uyo a hanedza a ri, “Aiwa muṋe wanga, vhone vha muḓinḓa wa Mudzimu, vha songo sokou ntshushedza!”

¹⁷ Huno nangoho uyo musadzi a vhifha muvhilini, nga ṅwaha u tevhelaho nga tshifhinga tshenetsho a beba ṅwana wa mutukana, nga he Elisha a mu vhudza.

¹⁸ Ṅwana a aluwa, muṅwe musi a bva a ya tsimuni ha khotsi awe vhe na vhakaṋi.

¹⁹ Kathihi fhedzi a mbo ḓi ṱavha mukosi a ri, “Ṱhoho yanga, ṱhoho yanga-wee!” Khotsi awe vha vhudza mushumi vha ri, “Bebani mutukana hoyu ni mu ise ha mme awe.”

²⁰ Mushumi a mu takula a mu beba a mu isa ha mme awe, mutukana a dzula marumbini a mme awe ḽa vhuya ḽa vha masiari tshivhangalala, a mbo ḓi fa.

²¹ Mme a ṅwana a gonya a mu ladza mmbeteni wa muḓinḓa wa Mudzimu, a bvela nnḓa a vala vothi.

²² A vhidza munna wawe a ri, “Nga vha rume muṅwe wa vhashumi vhavho a ḓe ngeno e na donngi uri ndi ṱavhanye ndi ye ha muḓinḓa wa Mudzimu ndi dovhe ndi vhuye.”

²³ Munna wawe a ri, “Ndi mini ni tshi ya khae ṋamusi? Hufha hu si vhuṱambo ha ṅwedzi muswa kana Sabatha!” Musadzi a fhindula a ri, “A zwi na mushumo!”

²⁴ A mbo vhelesa donngi a vhudza mushumi wawe a ri, “Itani uri donngi i tshimbilese, ni songo i imisa arali ndi songo ni vhudza.”

²⁵ Ndi hone a tshi takuwa, a swika ha muḓinḓa wa Mudzimu thavhani ya Kharamele. Muḓinḓa wa Mudzimu a vhona uyo musadzi e nḓilani a tshi kha ḓi vha kule, a vhudza mushumi wawe Gehasi a ri, “Musadzi wa Mushuneme ngouḽa u khou ḓa ngeno!

²⁶ Gidimani ni yo mu ṱanganedza, ni mu vhudzise mulalo na wa munna wawe na ṅwana.” Musadzi a fhindula Gehasi a ri, “A hu na.”

²⁷ Huno a tshi swika ha muḓinḓa wa Mudzimu thavhani, a gwadama phanḓa hawe a mu farelela milenzhe. Gehasi a ḓa a tshi ri a mu khurumedzele kule, hone muḓinḓa wa Mudzimu a ri, “Mu litsheni! Mbilu yawe i khou vhavha! Muṋe washu o nnzumbela hezwi, ho ngo mmbudza uri ndi mini.”

²⁸ Musadzi a ri, “Muṋe wanga, ndo vhuya nda vha humbela ṅwana wa mutuka naa? A tho ngo vha vhudza nda ri vha songo sokou ntshushedza?”

²⁹ Elisha a vhudza Gehasi a ri, “Ḓivhofhe khundu, u dzhie lubaḓa lwanga, u gidime. Arali wa ṱangana na muthu u songo mu resha, arali muṅwe a u resha, u songo fhindula. U swike u vhee lubaḓa lwanga kha tshifhaṱuwo tsha uyo mutukana.”

³⁰ Huno mme a ṅwana a ri, “Nga Muṋe washu a tshilaho na nga vhutshilo havho ndi nga si vha sie.” Ndi hone Elisha a tshi takuwa a tevhela uyo musadzi.

³¹ Gehasi a fhira phanḓa, a swika a vhea lubaḓa luḽa kha tshifhaṱuwo tsha uyo mutukana, hone ha si pfale tshithu kana ha vhonala tshi no sumbedza uri ṅwana u a tshila. Gehasi a huma a ṱangana na Elisha a mu vhudza a ri, “Mutukana uḽa ho ngo vuwa.”

³² Musi Elisha a tshi swika nḓuni iyo a wana mutukana o ladzwa vhulaloni hawe o fa.

³³ A dzhena, a vala vothi avho vhavhili vhe nnḓa, a rabela Muṋe washu.

³⁴ Ndi hone a tshi gonya mmbete a shuvhama nṱha ha uyo mutukana, a vhea mulomo wawe kha mulomo wawe, maṱo kha maṱo, zwanḓa kha zwanḓa. Musi o shuvhama nṱha ha uyo mutukana, muvhili wawe wa thoma u dudela.

³⁵ Elisha a vuwa, a tshimbila-tshimbila henefho kamarani, a konou gonya mbeteni, a dovha a shuvhama nṱha ha mutukana. Mutukana a atsamula kaṱanu na kavhili, a bonyolola maṱo.

³⁶ Elisha a vhidza Gehasi a ri, “Vhidzani uḽa musadzi wa Mushuneme a ḓe.” Gehasi a mu vhidza. Uyo musadzi a dzhena, Elisha a ri, “Nga vha dzhie mutukana wavho.”

³⁷ Musadzi a ḓa, a wela milenzheni ya Elisha, a gwadama fhasi. Ndi hone a tshi dzhia mutukana wawe a bvela nnḓa.

Lufu khalini

³⁸ Elisha a livha Giligala. Ho vha ho wa nḓala shangoni. Ḽiṅwe ḓuvha ho kuvhangana tshigwada tsha vhaporofita khae, a vhudza mushumi wawe a ri, “Ṱadziani khali khulu, ni bikele vhanna havha tshitshuu.”

³⁹ Muṅwe wavho a yo ka miroho masimuni, a wana munḓirivhe wa ḓaka, a fula vhana vhawo, a puta nga phuraphura yawe ya ḓala. Musi a tshi vhuya, a i tshetshelela khalini a bika tshitshuu, naho ho vha hu si na ane a ḓivha uri ndi zwithu-ḓe.

⁴⁰ Itsho tshitshuu tsha avhelwa avho vhanna, hone musi vha tshi thoma u ḽa, vha ṱavha mukosi vha ri, “Muḓinḓa wa Mudzimu, hu na lufu khalini!” Vha si ḽe.

⁴¹ Elisha a ri, “Ḓisani vhukhopfu!” A dzhia vhuḽa vhukhopfu a vhu shela khalini a ri, “Avhelani vhathu vha ḽe.” Zwiḽiwa zwi re khalini zwa pfala zwi si tshee na mulimo.

Hu tshi fushwa vhathu vha ḓana

⁴² Ha ḓa muṅwe munna a tshi bva Baali Shalisha, a ḓisela muḓinḓa wa Mudzimu mikonde ya 20 ya vhurotho ha baḽi ho bagiwaho nga thoro dze dza ranga u vhibva, na tshikwama tsha ṱhotshe dza thoro ntswa. Elisha a ri, “Ṋeani vhathu vha ḽe.”

⁴³ Mushumi wawe a vhudzisa a ri, “Ndi nga zwi vhea hani phanḓa ha vhanna vha ḓana?” Hone Elisha a fhindula a ri, “Ṋeani vhathu vha ḽe. Muṋe washu u ri, ‘Vha ḓo ḽa vha fura vha ita na u sia.’ ”

⁴⁴ Mushumi a vha avhela zwiḽiwa, vha ḽa vha fura vha ita na u sia, nga he Muṋe washu a amba.