2 MAHOSI 22 - BIVHILI KHETHWA Mafhungo Madifha

Josiasi khosi ya Juda (637-608 BC)

¹ Josiasi a tshi vha khosi ya Juda o vha e na miṅwaha miṱanu na miraru, a vhusa e Jerusalema a fhedza miṅwaha ya 31. Mme awe o vha a tshi pfi Jedida, ṅwananyana wa Adaya wa muḓini wa Botsikati.

² Josiasi o ita zwe zwa vha zwi tshi takadza Muṋe washu, a kanda vhuṱalani hoṱhe ha makhulukuku wawe Dafita, a si vhuye a pambutshela thungo ya tshauḽa kana tshamonde.

Hu tshi tumbulwa bugu ya Mulayo

³ Nga ṅwaha wa 18 wa muvhuso wa khosi Josiasi, a ruma muṅwaleli wa musanda, Shafani ṅwana wa Atsalia, ṅwana wa Mishulamu, a ya thembeleni ya Muṋe washu, a ri,

⁴ “Tshimbilani ni ye ha tshifhe muhulu Hilikia ni mu vhudze uri a kale tshelede yo ḓiswaho thembeleni ya Muṋe washu, ye vhalindamiṋango vha i kuvhanganya i tshi bva kha vhathu.

⁵ Ni vha vhudze vha i ṋee vhalavhelesi vha mushumo wa u vusa thembele. Vhanna avho vha lambedze ngayo vhashumi vha no khou vusa thembele ya Muṋe washu,

⁶ vhavhaḓi na vhafhaṱi na vhatsheṱi vha matombo. Vha renge na matanda na matombo o vhaḓiwaho a u vusa thembele.

⁷ Hone vha songo ṱwa vha tshi ṱoḓa vhuṱanzi ha tshelede ine vha vha ṋea, ngauri avho vhanna vha a fulufhedzea.”

⁸ Tshifhe muhulu Hilikia a vhudza Shafani muṅwaleli wa musanda a ri, “Ndo tumbula bugu ya Mulayo thembeleni ya Muṋe washu.” Hilikia a dzhia iyo bugu a i ṋea Shafani, a i vhala.

⁹ Ndi hone Shafani muṅwaleli wa musanda a tshi ya ha khosi a swikisa mafhungo a ri, “Magota avho o dzhia iḽa tshelede ye ya vha i thembeleni ya Muṋe washu vha i ṋea vhalavhelesi vha mushumo wa u vusa thembele.”

¹⁰ Ndi hone Shafani muṅwaleli wa musanda a tshi ḓivhadza khosi a ri, “Tshifhe Hilikia o nṋea bugu.” Shafani a i vhalela khosi.

¹¹ Musi khosi i tshi pfa mafhungo a bugu ya Mulayo, ya kherukanya zwiambaro zwayo.

¹² Josiasi a laya tshifhe Hilikia na Ahikamu ṅwana wa Shafani na Akhiboro ṅwana wa Mikhaya na Shafani muṅwaleli wa musanda na Asaya ndumi ya khosi a ri,

¹³ “Iyani ni mmbudzisele ha Muṋe washu, ni vhudzisele na vhathu, ni vhudzisele na ḽoṱhe ḽa Juda zwo ṅwalwaho buguni hei yo tumbulwaho. Muṋe washu o ri sinyutshela zwihulu nge vhomakhulukuku washu vha si thetshelese maipfi a bugu hei; a vho ngo tevhedza zwoṱhe zwo ṅwalwaho khayo zwi tshi amba riṋe.”

¹⁴ Tshifhe Hilikia na Ahikamu na Akhiboro na Shafani na Asaya vha ya ha Huluda muporofita wa musadzi, we a vha e musadzi wa Shalumu ṅwana wa Thikiva, ṅwana wa Harahasi, mulondoli wa zwiambaro zwa thembeleni. Huluda o vha a tshi dzula Jerusalema dzinguni ḽa vhuvhili.

¹⁵ Huluda a vha vhudza a ri, “Muṋe washu Mudzimu wa Israele u ri, ‘Vhudzani munna o ni rumaho ha Nṋe ni ri:

¹⁶ Yahavee u ri: Fhano fhethu na vhadzulapo vhaho ndi ḓo vha ḓisela khombo, nga he ha ṅwalwa buguni ye ya vhalwa nga khosi ya Juda.

¹⁷ Ndi uri vhathu vho nndandula vha yo dubisela midzimu miṅwe zwioro, vha ntsinyusa nga zwitungulo zwe vha ḓiitela; ndi ḓo sinyutshela fhano fhethu mbiti dzanga dza tou duga ha si vhe na a dzi dzimaho.

¹⁸ Vhudzani khosi ye ya ni ruma uri ni ḓe ni vhudzise Yahavee ni ri: Yahavee Mudzimu wa Israele a tshi amba nga maipfi e wa a pfa u ri:

¹⁹ Iwe wo ḓisola wa ḓiṱukufhadza phanḓa hanga wa kherukanya zwiambaro zwau, wa tsengisa miṱodzi musi u tshi pfa zwe nda amba ndi tshi teketela afha fhethu na vhapo vhaho. Ndi ḓo ita uri afha fhethu hu ofhise muthu a tshi hu sedza, vhathu vha ḓo teketelana nga dzina ḽaho. Hone thabelo yau ndo i pfa, Yahavee u ralo.

²⁰ Zwenezwo ndi ḓo u litsha wa fa, wa swiṱwa nga mulalo. A u nga vhoni khombo ine nda ḓo i ḓisa fhethu afha.’ ” Ndi hone vhanna avho vha tshi ṱuwa na phindulo iyo vha i swikisa ha khosi Josiasi.