2 MAHOSI 21 - BIVHILI KHETHWA Mafhungo Madifha

Manase khosi ya Juda (686-640 BC)

¹ Manase a tshi vha khosi ya Juda o vha e na miṅwaha ya 12, a vhusa e Jerusalema a fhedza miṅwaha ya 55. Mme awe o vha a tshi pfi Hefetsiba.

² Manase a ita zwi sa takadzi Muṋe washu, a edzisa maitele a nengisaho a tshakha dze Muṋe washu a dzi thatha afho shangoni musi Vhaisraele vha tshi swika.

³ Manase a vusa zwitembele zwa zwikwarani zwe khotsi awe a vha o zwi thutha, a ita na u fhaṱa aḽiṱari dza Baali, a imisa thanda ya Ashera mudzimu wa musadzi, a kanda vhuṱalani ha Ahaba khosi ya Israele. A gwadamela ṋaledzi dzoṱhe a dzi luvha.

⁴ A fhaṱa na aḽiṱari dza u luvha midzimu thembeleni ya Muṋe washu, fhethu he Muṋe washu a vha o ri, “Ndi ḓo vhea dzina ḽanga Jerusalema.”

⁵ Miṱani ya thembele ya Muṋe washu, vhuvhili hayo, a fhaṱa dziaḽiṱari a tshi fhaṱela ṋaledzi dzoṱhe.

⁶ A ita na u ṋekedza ṅwana wawe wa mutuka a mu ita nduvho i fhiswaho, a edzisa zwa manditi na u tungula ṱhangu, a yo vhudzisa vhaambeli na vha malombo na vhabvumbi. A tshinya zwihulu zwi sa takadzi Muṋe washu, a mu sinyusa.

⁷ A dzhia thanda ya Ashera mudzimu wa musadzi yo vhaḓwaho, ye ene muṋe a tou ḓivhaḓela, a i vhea thembeleni, he Muṋe washu a vha o vhudza Dafita na ṅwana wawe Solomoni a ri, “Thembeleni hei, fhano Jerusalema, fhethu he nda hu nanga kha shango ḽoṱhe ḽa matsinde a 12 a Vhaisraele, ndi hone hune dzina ḽanga ḽa ḓo vha hone lini na lini.

⁸ A thi tsha ḓo dovha nda ita uri ṋayo dza Vhaisraele dzi tendeleke kule na shango ḽe nda ḽi ṋea vhomakhulukuku wavho, arali vha ita zwoṱhe zwe nda vha laya, vha vhulunga Mulayo woṱhe we vha ṋewa nga Mushe muḓinḓa wanga.”

⁹ Hone vhathu vha si thetshelese. Manase a vha xedza, vha ita vhuvhi vhu no fhira ha tshakha dze Muṋe washu a dzi lozwa Vhaisraele vha tshi swika.

¹⁰ Muṋe washu a amba nga milomo ya vhaḓinḓa vhawe vhaporofita a ri,

¹¹ “Manase khosi ya Juda o ita vhuvhi hovhu vhu nengisaho. O ita vhuvhi vhu no fhira ha Vhaamori vho mu rangaho phanḓa, a ita uri na vhathu vha Juda vha tshinye nga u luvha midzimu yawe i nengisaho.

¹² Zwenezwo Yahavee Mudzimu wa Israele u ri, ‘Ndi ḓo ḓisela Jerusalema na Juda khombo khulu lune nḓevhe dza muṅwe na muṅwe ane a zwi pfa dza ḓo luma.

¹³ Ndi ḓo ita Jerusalema zwenezwo zwe nda ita Samaria, na zwe nda ita Ahaba khosi ya Israele na nnḓu yawe. Ndi ḓo swiela Jerusalema ha sala he swoto unga muthu a tshi phumula ndilo, a ri u i phumula, a i tiba.

¹⁴ Ndi ḓo ṱutshela tsalela dza vhathu vhanga, nda vha kumedza maswina avho. Vha ḓo kundwa, vha ṱangulwa nga maswina avho oṱhe,

¹⁵ nge vha ita zwi sa ntakadzi vha ntsinyusa u bva tshee vhomakhulukuku wavho vha pfuluwa Egipita u swika na ṋamusi.’ ”

¹⁶ Manase o ita na u shulula malofha manzhi a vhathu vha si na mulandu a ḓadza mikoto yoṱhe ya Jerusalema, hu sa vhalwi zwe a ita uri na vhathu vha Juda vha tshinye, vha ite zwi sa takadzi Muṋe washu.

¹⁷ Mafhungo maṅwe a Manase na zwoṱhe zwe a ita, hu tshi katelwa na vhuvhi he a ita, o ṅwalwa buguni ya Histori ya Mahosi a Juda.

¹⁸ Manase a dzama, a swiṱwa ngadeni ya pfamo yawe, ngade ya Uza. Ṅwana wawe Amoni a vha khosi vhudzuloni hawe.

Amoni khosi ya Juda (639-638 BC)

¹⁹ Amoni a tshi vha khosi ya Juda o vha e na miṅwaha ya 22, a vhusa miṅwaha mivhili e Jerusalema. Mme awe o vha a tshi pfi Mishulimethe, ṅwananyana wa Harutsi wa muḓi wa Jotoba.

²⁰ Amoni a ita zwi sa takadzi Muṋe washu, u ḓi nga khotsi awe Manase.

²¹ A kanda vhuṱalani hoṱhe ha khotsi awe, a luvha midzimu i nengisaho ye ya vha i tshi luvhiwa nga khotsi awe, a i gwadamela.

²² A landula Muṋe washu Mudzimu wa vhomakhulukuku wawe, a si tshimbile nḓilani yawe.

²³ Magota a Amoni a mu langana, a mu vhulaha e pfamoni.

²⁴ Vhaḓivhalea vha shango vha vhulaha vhoṱhe vhe vha langana khosi Amoni, vha dzhia ṅwana wawe Josiasi vha mu vhumba khosi vhudzuloni hawe.

²⁵ Mafhungo maṅwe awe na zwe a ita, o ṅwalwa buguni ya Histori ya Mahosi a Juda.

²⁶ Amoni o swiṱwa tshaloni tshawe ngadeni ya Uza. Ṅwana wawe Josiasi a vha khosi vhudzuloni hawe.