2 MAHOSI 20 - BIVHILI KHETHWA Mafhungo Madifha

Vhulwadze ha khosi Hiskia na u fhola hawe

¹ Misi yeneyo khosi Hiskia a farwa nga vhulwadze, lwe a ṱoḓou fa. Muporofita Yesaya ṅwana wa Amutsi a ya khae a ri, “Muṋe washu u ri, ‘Dzudzanya zwithu zwau zwoṱhe; a u tsha ḓo tshila, u ḓo fa.’ ”

² Hiskia a rembuluwa a lavhelesa luvhondo a rabela Muṋe washu a ri,

³ “Yawee Muṋe washu, edzou elelwa zwe nda u shumela ndi tshi fulufhedzea, ndó ḓikumedza Iwe nga mbilu yoṱhe, ndi tshi ita zwi u takadzaho.” Hiskia a lila lu ṱungufhadzaho.

⁴ Musi Yesaya a sa athu pfukekanya muṱa wa vhukati, ipfi ḽa Muṋe washu ḽa ḓa khae ḽa ri,

⁵ “Huma u yo vhudza Hiskia murangaphanḓa wa vhathu vhanga u ri, ‘Yahavee Mudzimu wa makhulukuku wau Dafita u ri: Thabelo yau ndo i pfa, na miṱodzi yau ndo i vhona; ndi ḓo u fhodza. Mbamatshelo u ḓo gonya thembeleni ya Yahavee.

⁶ Ndi ḓo engedza vhutshilo hau nga miṅwaha ya 15. Ndi ḓo u lamulela na muḓi hoyu zwanḓani zwa khosi ya Ashuru. Ndi ḓo tsireledza muḓi hoyu ndi tshi itela Nṋe muṋe na Dafita mulanda wanga.’ ”

⁷ Ndi hone Yesaya a tshi ri, “Sukani bwindi ḽa mahuyu.” Vha ita nga u ralo vha ḽi ḓodza kha tshitshimbili tshawe, Hiskia a mbo ḓi fhola.

⁸ Hiskia a vhudzisa Yesaya a ri, “Tshiga tshi ḓo vha tshifhio tshine tsha ḓo sumbedza uri Muṋe washu u ḓo mphodza nda gonya thembeleni ya Muṋe washu mbamatshelo?”

⁹ Yesaya a fhindula a ri, “Tshiga tshine Muṋe washu a vha sumbedza tshone uri Muṋe washu u ḓo ita zwe a fulufhedzisa ngetshi: Vha funa murunzi u tshi ya phanḓa wa ita maga a fumi kana vha funa u tshi ya murahu wa ita maga a fumi?”

¹⁰ Hiskia a fhindula a ri, “Murunzi u tshi ya phanḓa wa ita maga a fumi a zwi konḓi, nga vha ri u humele murahu u ite maga a fumi.”

¹¹ Ndi hone muporofita Yesaya a tshi rabela Muṋe washu, Muṋe washu a ita uri murunzi u humele murahu u ite maga a fumi he wa vha wo tsa fhasi kha nḓila ya zwiṱepisi yo fhaṱwaho nga khosi Ahasi.

Vhaḓinḓa vha no bva Babele

¹² Misi yeneyo Mirodakha Baladani ṅwana wa Baladani khosi ya Babele a ruma vhaḓinḓa ha khosi Hiskia vha isa maṅwalo na tshifhiwa nge a vha o zwi pfa uri Hiskia u a lwala.

¹³ Hiskia a ṱanganedza vhaḓinḓa avho, a vha sumbedza zwoṱhe zwe zwa vha zwi nḓuni dzawe dza mbulungelo, siliva na musuku na zwilungi na mapfura a songo vangwaho, na zwihali zwawe na zwoṱhe zwine zwa wanala mbulungeloni dzawe. Hiskia ho ngo sia na tshithihi tshe a si vha sumbedze pfamoni yawe kana shangoni ḽawe ḽoṱhe.

¹⁴ Ndi hone muporofita Yesaya a tshi ya ha khosi Hiskia a vhudzisa a ri, “Vhaḽa vhanna vho ri mini nahone vho vha vha tshi bvafhi?” Hiskia a fhindula a ri, “Vho vha vha tshi bva shangoni ḽa kule, vho vha vha tshi bva Babele.”

¹⁵ Muporofita a vhudzisa a ri, “Vho vhona mini pfamoni yavho?” Hiskia a fhindula a ri, “Vho vhona zwoṱhe zwi re pfamoni yanga. A ho ngo sala tshithu mbulungeloni dzanga tshe nda si vha sumbedze.”

¹⁶ Ndi hone Yesaya a tshi vhudza khosi a ri, “Nga vha pfe zwine Muṋe washu a amba a ri,

¹⁷ ‘Vhukuma hu ḓo swika tshifhinga tshine zwoṱhe zwi re pfamoni yavho na zwoṱhe zwe vhomakhulukuku wavho vha zwi vhulunga u swika ṋamusi, zwa ḓo hwaliwa zwa iswa Babele. A hu nga sali tshithu, Muṋe washu u ralo.

¹⁸ Vhaṅwe vhaḓuhulu vhavho vha malofha avho, vhane vha ḓo bebelwa vhone, vha ḓo hwaliwa vha luvhedzwa, vha shumela khosi ya Babele pfamoni yawe.’ ”

¹⁹ Hiskia a fhindula a ri, “Ipfi ḽa Muṋe washu ḽe vha ḽi amba ndi ḽavhuḓi.” A dovha a ri, “Tenda ha vha na mulalo na vhudziki nṋe ndi tshi kha ḓi tshila.”

Lufu lwa Hiskia

²⁰ Mafhungo maṅwe a Hiskia na zwoṱhe zwa vhuhali hawe na zwe a fhaṱa damu ḽa u vhulunga maḓi a bwa na mugero wa u ḓisa maḓi muḓini, o ṅwalwa buguni ya Histori ya Mahosi a Juda.

²¹ Hiskia a dzama, ṅwana wawe Manase a vha khosi vhudzuloni hawe.