2 MAHOSI 15 - BIVHILI KHETHWA Mafhungo Madifha

Uzia khosi ya Juda (766-739 BC)

¹ Nga ṅwaha wa 27 wa muvhuso wa Jerobiamu khosi ya Israele, Uzia ṅwana wa Amasia a vha khosi ya Juda.

² A tshi thoma u vhusa o vha e na miṅwaha ya 16, a vhusa e Jerusalema a fhedza miṅwaha ya 52. Mme awe o vha a tshi pfi Jekholia wa Jerusalema.

³ Uzia o ita zwi takadzaho Muṋe washu, u ḓi nga khotsi awe Amasia;

⁴ o ro sa thutha zwitembele zwa zwikwarani, vhathu vho ḓi ṋekedza zwiṱhavhelo vha dubisa zwioro henefho.

⁵ Muṋe washu a tambudza Uzia nga vhulwadze vhu ofhisaho ha lukanda, a lwala a tshi dzula e eṱhe a vhuya a dzama. Jothamu ṅwana wa khosi o vha e murangaphanḓa wa vhahulwane vha shango a tshi langa pfamo.

⁶ Mafhungo maṅwe a Uzia na zwoṱhe zwe a ita o ṅwalwa buguni ya Histori ya Mahosi a Juda.

⁷ Uzia a dzama, a zwiṱwa zwaloni zwa musanda Muḓini wa Dafita, ṅwana wawe Jothamu a vha khosi vhudzuloni hawe.

Zakaria khosi ya Israele (753-752 BC)

⁸ Nga ṅwaha wa 38 wa muvhuso wa Uzia khosi ya Juda, Zakaria ṅwana wa Jerobiamu a vha khosi ya Israele, a vhusa e Samaria a fhedza miṅwedzi miṱanu na muthihi.

⁹ Zakaria a ita zwi sa takadzi Muṋe washu, u ḓi nga vhokhotsi awe. Ho ngo laṱa vhuvhi ha Jerobiamu ṅwana wa Nebati we a ita uri Vhaisraele vha tshinye.

¹⁰ Shalumu ṅwana wa Jabeshe a itela khosi Zakaria tshimbevha, a mu dzhena nga pfumo, a mu vhulaha muḓini wa Ibiliamu, a vha khosi vhudzuloni hawe.

¹¹ Mafhungo maṅwe a Zakaria o ṅwalwa buguni ya Histori ya Mahosi a Israele.

¹² Ha mbo vha u khunyelela zwe Muṋe washu a vhudza Jehu zwiḽa a tshi ri, “Vhaḓuhulu vhau vha ḓo vha mahosi a Israele ha vhuya ha fhira murafho wa vhuṋa.”

Shalumu khosi ya Israele (752 BC)

¹³ Shalumu ṅwana wa Jabeshe o vha khosi ya Israele nga ṅwaha wa 39 wa muvhuso wa Uzia khosi ya Juda, a vhusa e Samaria a fhedza ṅwedzi muthihi fhedzi.

¹⁴ Menaheme ṅwana wa Gadi a takuwa Thiritsa a ya Samaria, a lwa na Shalumu ṅwana wa Jabeshe henefho Samaria, a mu vhulaha, a vha khosi vhudzuloni hawe.

¹⁵ Mafhungo maṅwe a Shalumu na tshimbevha tshe a tshi ita, o ṅwalwa buguni ya Histori ya Mahosi a Israele.

¹⁶ Menaheme a tshi bva Thiritsa, a dia muḓi wa Thaphua, a fhedza vhathu vhoṱhe vha re muḓini na vha shango ḽo u tangaho, nge vha hana u mu vulela khoro dzavho. A hushula thumbu dza vhasadzi vhoṱhe vho vhifhaho muvhilini.

Menaheme khosi ya Israele (752-741 BC)

¹⁷ Menaheme ṅwana wa Gadi o vha khosi ya Israele nga ṅwaha wa 39 wa muvhuso wa Uzia khosi ya Juda, a vhusa e Samaria a fhedza miṅwaha ya fumi.

¹⁸ Menaheme a ita zwi sa takadzi Muṋe washu. Misi yoṱhe a tshi vhusa ho ngo vhuya a laṱa vhuvhi ha Jerobiamu ṅwana wa Nebati we a ita uri Vhaisraele vha tshinye.

¹⁹ Zwino Thigilathi Philisere khosi ya Ashuru a dia shango, Menaheme a mu luvha nga siliva ya khilogiramu dza 34 000 uri a mu tikedze a khwaṱhise muvhuso wawe.

²⁰ Menaheme o wana iyo tshelede kha vhapfumi vha Israele nga u kombetshedza muṅwe na muṅwe uri a bvise mangwende a 50 a siliva i luvhe khosi ya Ashuru. Ndi hone khosi ya Ashuru a tshi ṱuwa shangoni iḽo a vhuelela shangoni ḽawe.

²¹ Mafhungo maṅwe a Menaheme na zwoṱhe zwe a ita, o ṅwalwa buguni ya Histori ya Mahosi a Israele.

²² Menaheme a dzama, a swiṱwa, ṅwana wawe Phekahia a vha khosi vhudzuloni hawe.

Phekahia khosi ya Israele (741-740 BC)

²³ Phekahia ṅwana wa Menaheme a vha khosi ya Israele nga ṅwaha wa 50 wa muvhuso wa Uzia khosi ya Juda, a vhusa e Samaria a fhedza miṅwaha mivhili.

²⁴ Phekahia a ita zwi sa takadzi Muṋe washu. Ho ngo vhuya a laṱa vhuvhi ha Jerobiamu ṅwana wa Nebati we a ita uri Vhaisraele vha tshinye.

²⁵ Pheka ṅwana wa Remalia, we a vha e muswikeli wa khosi, a mu itela tshimbevha, e na vhanna vha 50 vha Giliadi, vha vhulaha Phekahia khathihi na Arigobo na Arie, dzhavheloni ḽa ngomu ḽa pfamo henefho Samaria. Pheka o ri u vhulaha Phekahia a vha khosi vhudzuloni hawe.

²⁶ Mafhungo maṅwe a Phekahia na zwoṱhe zwe a ita, o ṅwalwa buguni ya Histori ya Mahosi a Israele.

Pheka khosi ya Israele (739-732 BC)

²⁷ Pheka ṅwana wa Remalia a vha khosi ya Israele nga ṅwaha wa 52 wa muvhuso wa Uzia khosi ya Juda, a vhusa e Samaria, a fhedza miṅwaha ya 20.

²⁸ Pheka a ita zwi sa takadzi Muṋe washu. Ho ngo vhuya a laṱa vhuvhi ha Jerobiamu ṅwana wa Nebati we a ita uri Vhaisraele vha tshinye.

²⁹ Misi ya ene Pheka khosi ya Israele, Thigilathi Philisere khosi ya Ashuru a ḓa a thuba miḓi ya Iyoni na Abele Bethe Maakha na Janua na Kedeshe na Hatsoro na shango ḽa Giliadi na Galelia na Nafuthali, a dzhia vhathu vha ayo mashango a vha isa vhuthubwani Ashuru.

³⁰ Ndi hone Hoshia ṅwana wa Ela a tshi itela Pheka ṅwana wa Remalia tshimbevha, a lwa nae, a mu vhulaha, a vha khosi vhudzuloni hawe nga ṅwaha wa 20 wa muvhuso wa Jothamu ṅwana wa Uzia.

³¹ Mafhungo maṅwe a Pheka na zwoṱhe zwe a ita, o ṅwalwa buguni ya Histori ya Mahosi a Israele.

Jothamu khosi ya Juda (739-735 BC)

³² Jothamu ṅwana wa Uzia o vha khosi ya Juda nga ṅwaha wa vhuvhili wa muvhuso wa Pheka ṅwana wa Remalia khosi ya Israele.

³³ Jothamu a tshi thoma u vhusa o vha e na miṅwaha ya 25, a vhusa e Jerusalema a fhedza miṅwaha ya 16. Mme awe vho vha vha tshi pfi Jerusha ṅwananyana wa Tsadoko.

³⁴ Jothamu o vha a tshi takadza Muṋe washu, u ḓi nga khotsi awe Uzia,

³⁵ o ro sa thutha zwitembele zwa zwikwarani, vhathu vho ḓi ṋekedza zwiṱhavhelo vha fhisa zwioro henengei. Jothamu ndi ene we a vusa khoro ya devhula ya thembele ya Muṋe washu.

³⁶ Mafhungo maṅwe a Jothamu na zwe a ita, o ṅwalwa buguni ya Histori ya Mahosi a Juda.

³⁷ Misi yeneyo Muṋe washu a thoma u ruma Retsini khosi ya Aramu na Pheka ṅwana wa Remalia u ḓa u dia ḽa Juda.

³⁸ Jothamu a dzama, a swiṱwa zwaloni zwa musanda Muḓini wa Dafita, ṅwana wawe Ahasi a vha khosi vhudzuloni hawe.