2 MAHOSI 14 - BIVHILI KHETHWA Mafhungo Madifha

Amasia khosi ya Juda (795-767 BC)

¹ Nga ṅwaha wa vhuvhili wa muvhuso wa Juasi ṅwana wa Juahasi khosi ya Israele, Amasia ṅwana wa Juasi a vha khosi ya Juda.

² Amasia a tshi vha khosi o vha e na miṅwaha ya 25, a vhusa e Jerusalema a fhedza miṅwaha ya 29. Mme awe vho vha vha tshi pfi Jehoadana, wa Jerusalema.

³ Amasia o ita zwi takadzaho Muṋe washu, naho a songo swika kha makhulukuku wawe Dafita. O kanda vhuṱalani ha khotsi awe Juasi kha zwoṱhe.

⁴ Naho zwo ralo ho ngo thutha zwitembele zwa zwikwarani; vhathu vho ḓi ṋekedza zwiṱhavhelo vha fhisa zwioro henengei.

⁵ Musi muvhuso wa Amasia u tshi tou thoma u khwaṱha, a vhulaha magota vho vhulahaho vhamusanda khotsi awe.

⁶ Naho zwo ralo a si vhulahe vhana vha vhatuka vha idzo phondi, a tshi tevhedza zwo ṅwalwaho buguni ya mulayo wa Mushe he Muṋe washu a laya a ri, “Vhokhotsi vha songo fela milandu ya vhana vhavho, na vhana vha songo fela milandu ya vhokhotsi avho, muṅwe na muṅwe u ḓo fela vhutshinyi hawe.”

⁷ Amasia ndi ene we a kunda Vhaedomo vha 10 000 Govhani ḽa Muṋo, a thuba muḓi wa Sela nndwani, a ri u pfi Jokothiele, na ṋamusi u kha ḓi vhidzwa nga dzina ḽeneḽo.

Amasia a tshi lwa na Juasi wa Israele

⁸ Ndi hone Amasia a tshi ruma vhaḓinḓa ha Juasi ṅwana wa Juahasi, ṅwana wa Jehu khosi ya Israele, vha isa khaedu a ri, “Nga vha ḓe ri lwe.”

⁹ Hone Juasi khosi ya Israele a fhindula Amasia khosi ya Juda a ri, “Mutshutshungu wa Libanoni wo vhuya wa ruma muḓinḓa a ya ha mukedara wa Libanoni a ri, ‘Litsha ṅwananyana wau a vhingwe nga ṅwananga.’ Hu si kale ha fhira phukha dza Libanoni dza kandekanya uyo mutshutshungu.

¹⁰ Vha khou vhona vho kunda Vhaedomo, zwino vha vho ḓihudza. Nga vha ḓitakalele nge vha kunda, vha ḓidzulele zwavho hayani! Ndi mini vha tshi levha? A vha zwi vhoni uri vha khou ḓiṱulela khombo, vha dovha vha ṱulela shango ḽa Juda khombo?”

¹¹ Hone Amasia a si zwi thetshelese. Ndi hone Juasi khosi ya Israele a tshi bva pfumo a yo lwa na Amasia khosi ya Juda, ha lwiwa Bethe Shemeshe kha ḽa Juda.

¹² Vhajuda vha kundwa nga Vhaisraele, muṅwe na muṅwe a shavhela hayani hawe.

¹³ Juasi khosi ya Israele a thuba Amasia khosi ya Juda, ṅwana wa Juasi ṅwana wa Ahasia, henefho Bethe Shemeshe. Ndi hone Juasi a tshi ya Jerusalema a pwasha mutsheṱo wa Jerusalema u bva Khoroni ya Efraimi u swika Khoroni ya Khuḓa, tshikhala tshine tsha nga ita mitha dza 200.

¹⁴ Juasi a dzhia musuku woṱhe na siliva yoṱhe na thundu yoṱhe ye ya vha i thembeleni ya Muṋe washu na mbulungeloni dza pfamo ya musanda, a ita na u thuba pfarela, a vhuelela Samaria.

¹⁵ Mafhungo maṅwe a Juasi, na zwe a ita, na vhuhali hawe nndwani a tshi lwa na Amasia khosi ya Juda, o ṅwalwa buguni ya Histori ya Mahosi a Israele.

¹⁶ Juasi a dzama, a swiṱwa Samaria na mahosi a Israele, ṅwana wawe Jerobiamu a vha khosi vhudzuloni hawe.

U dzama ha Amasia khosi ya Juda

¹⁷ Amasia khosi ya Juda, ṅwana wa Juasi, o tshila a fhedza miṅwaha ya 15 musi Juasi khosi ya Israele, ṅwana wa Juahasi ó no dzama.

¹⁸ Mafhungo maṅwe a Amasia o ṅwalwa buguni ya Histori ya Mahosi a Juda.

¹⁹ Vha langana Amasia Jerusalema, ene a shavhela muḓini wa Lakhishi, hone vha ruma vhathu vha mu tevhela Lakhishi vha mu vhulahela henengei.

²⁰ Tshitumbu tsha Amasia tsha iswa Jerusalema tsho hwalwa nga bere, a swiṱwa zwaloni zwa musanda Muḓini wa Dafita.

²¹ Ndi hone vhathu vhoṱhe vha Juda vha tshi dzhia ṅwana wawe Azaria vha mu vhumba khosi vhudzuloni ha khotsi awe Amasia. O vha e na miṅwaha ya 16 a tshi vha khosi.

²² Azaria ndi ene we a vusa muḓi wa Elathi, a u vhuedzedza Juda musi Amasia o no dzama.

Jerobiamu II khosi ya Israele (781-753 BC)

²³ Nga ṅwaha wa 15 wa muvhuso wa Amasia ṅwana wa Juasi khosi ya Juda, Jerobiamu ṅwana wa Juasi a vha khosi ya Israele, a vhusa e Samaria a fhedza miṅwaha ya 41.

²⁴ Jerobiamu a ita zwi sa takadzi Muṋe washu, a si vhuye a laṱa vhuvhi na vhuthihi ha Jerobiamu ṅwana wa Nebati we a ita uri Vhaisraele vha tshinye.

²⁵ Ndi ene we a vhuedzedza masakha a Israele u bva Pharani ya Hamathi thungo ya devhula u swika Lwanzheni lwa Muṋo thungo ya tshipembe, zwi tshi tevhedza zwe zwa ambiwa nga Muṋe washu Mudzimu wa Israele, nga mulomo wa muḓinḓa wawe muporofita Jonasi ṅwana wa Amithai wa Gathi Hefere.

²⁶ Muṋe washu o vha o vhona u tambula hu ṱungufhadzaho ha Vhaisraele vhoṱhe, vhahulwane na vhaṱuku. Ho vha hu si na ane a nga vha lamulela.

²⁷ Muṋe washu o vha a songo ḓiimisela u lozwa Vhaisraele tshoṱhe fhano fhasi, ndi zwe a vha tshidza nga Jerobiamu ṅwana wa Juasi.

²⁸ Mafhungo maṅwe a Jerobiamu na zwoṱhe zwe a ita na vhuhali hawe nndwani na zwe a vhuedzedza Damasko na Hamathi kha ḽa Israele (miḓi iyo yo vha i ya Jaudi), o ṅwalwa buguni ya Histori ya Mahosi a Israele.

²⁹ Jerobiamu a dzama, a yo swiṱwa zwaloni zwa musanda. Ṅwana wawe Zakaria a vha khosi vhudzuloni hawe.