1 VHATHESALONIKA 5 - BIVHILI KHETHWA Mafhungo Madifha

U ḓilugisela u vhuya ha Muṋe washu

¹ Zwino ri tshi ḓa kha a uri Muṋe washu u ḓo vhuya lini a wana ho tou ita hani, a ri tsha ṱwa ri tshi ni ṅwalela.

² Hufha inwi vhaṋe ni tshi zwi ḓivha zwavhuḓivhuḓi uri Muṋe washu musi a tshi vhuya u ḓo ḓa sa fobvu ḽi tshi ḓa vhusiku ḽi songo lindelwa.

³ Vhathu vha tshi kha ḓi ri, “Ḽo lala, a hu na khombo,” zwenezwo kathihi fhedzi vha ḓo tshenuwa vho no lovha tshoṱhe; a zwi na vhutinyelo, zwi nga musadzi a re muthu wa thovhela a tshi tshenuwa o welwa nga vhuṱungu ha musi a tshi vhofholowa.

⁴ Hone inwi vha hashu, ngauri a ni dzuli swiswini, ni nga si tshenuwe no ḓelwa nga heḽo ḓuvha sa musi ni tshi ḓelwa nga fobvu.

⁵ Hufha inwi noṱhe ni vhathu vha tshedza; ni vhathu vha masiari, a ri vha vhusiku kana vha swiswi.

⁶ Ndi zwone-ha ri songo tsha nga vhaḽa vhaṅwe vho eḓelaho, kha ri karuwe ri fhaṱuwe.

⁷ U eḓela hu eḓelwa vhusiku; na u kambwa ndi zwithu zwa vhusiku hezwo;

⁸ riṋe a ri vha vhusiku ri vha masiari, ndi zwone kha ri fhaṱuwe-ha, khanani ri pile nga tsimbi ine ya vha lutendo na lufuno, nguwane yashu i vhe u lavhelela u tshidzwa,

⁹ ngauri tshe Mudzimu a ri nangela tshone a si u haṱulelwa ṱhamu, ndi u tshidzwa nga Muṋe washu Yesu Khristo,

¹⁰ Ene we a ri fela uri naho ro karuwa ri vha tshilaho a tshi vhuya, nangwe ro eḓela na vho faho, ri kone u ḓo tshila roṱhe nae.

¹¹ Ndi zwone-ha, khuthadzanani ni fhaṱane, sa zwine na khou ḓi zwi ita.

Ndaela na nyonesano

¹² Zwino vha hashu, ri a ni humbela ri ri: Hulisani vhane vha ḓinetisa nga u ni shumela vhó vhewa nga Muṋe washu uri vha ni linde vha ni laye.

¹³ Vhenevho vha funeni ni vha hulise nga maanḓa ni tshi itela mushumo wavho. Dzulani ni tshi anḓana.

¹⁴ Ndi zwone vha hashu, ri a ni kwengweledza ri ri: ni laye vhabva, vho kuleaho miraḓo ni vha khwaṱhise, vha si na nungo ni vha tikedze; ni songo fhelela muthu na muthihi mbilu.

¹⁵ Ni songo lifhedza vhuvhi nga vhuvhi na kathihi; misi yoṱhe ni luse u itelana zwivhuya, ni itele na vhathu vhoṱhe.

¹⁶ Takalani misi yoṱhe;

¹⁷ ni dzule ni tshi rabela,

¹⁸ na tshini tshine na ṱangana natsho ni livhuhe. Ndi zwone zwine Mudzimu a funa inwi ni re vha Khristo Yesu ni tshi zwi ita.

¹⁹ Ni songo dzima u duga ha Muya nga u thivhela mishumo yawe.

²⁰ Ni songo nyadza zwine Mudzimu a ni ḓivhadza nga vhuporofita,

²¹ hone ni tshi sedzesesa zwoṱhe, ni nange zwi re zwivhuya.

²² Zwo vhifhaho ni laṱe kule.

²³ Ngavhe Mudzimu, Ene Ṋemulalo, a tshi ni ita vhakhethwa tshoṱhe, a vhulunga muya na mbilu na muvhili, uri Muṋe washu Yesu Khristo a tshi vhuya a wane hu si na tshi no solisea.

²⁴ Ane a ni vhidza u a fulufhedzea, ha nga kundwi u zwi ita.

²⁵ Vha hashu, ni ri rabelele-vho.

²⁶ Ni nndumelisele vhatendi nga inwi vhoṱhe. Ni reshane nga u kuvhatedzana sa vhatendi.

²⁷ Afha ndi khou khwaṱhisa nga dzina ḽa Muṋe washu ndi ri: luṅwalo holu lu vhalelwe vhatendi vhoṱhe.

²⁸ Ngavhe Muṋe washu Yesu Khristo a tshi ri itela vhuthu.