1 VHATHESALONIKA 1 - BIVHILI KHETHWA Mafhungo Madifha

Theshano

¹ Ndi nṋe Paulo, ndi na Silasi na Timoti. Ri ṅwalela tshivhidzo tsha ngeo Thesalonika tsha vha re vha Mudzimu Khotsi na Muṋe washu Yesu Khristo. Ri a ni resha ri ri: Ngavhe Mudzimu a tshi ni itela vhuthu na vha na mulalo.

Lutendo lwa Vhathesalonika lu re tsumbo kha zwiṅwe zwivhidzo

² Misi yoṱhe ri tshi rabela a ri ni hangwi, ri ḓi livhuha Mudzimu musi ri tshi vhona zwine na vha zwone.

³ Ri dzula ri tshi elelwa uri no shuma zwingafhani nga lutendo lwaṋu na uri no ḓinetisa hani nga lufuno lwaṋu na uri no konḓelela zwingafhani nga u ṱulutshela haṋu Muṋe washu Yesu Khristo. Hezwo ri zwi elelwa musi ri tshi rabela Mudzimu Khotsi ashu.

⁴ Vha hashu vha funwaho nga Mudzimu, ri tou ḓivha zwavhuḓivhuḓi uri o ni nanga,

⁵ ngauri musi ri tshi ni ḓisela mafhungo maḓifha ho ngo sokou vha maipfi fhedzi; o ḓa nga maanḓa a Mudzimu na a Muya Mukhethwa a sa hanedzei na luthihi. Na inwi vhaṋe ni a zwi ḓivha zwavhuḓi uri zwiḽa ri tshee ngeo ro vha ro tou ita hani nahone ri tshi ni londola hani,

⁶ lwe na inwi na vhuya na tou kanda vhuṱalani hashu na Muṋe washu. Naho u ṱanganedza ipfi ḽa Mudzimu zwo ni ḓisela u tambula huhulu, no ḓi ḽi ṱanganedza nga dakalo ḽi bvaho ha Muya Mukhethwa,

⁷ na vhuya na tou vha tsumbo kha vhatendi vhoṱhe vha Makedonia na Akhaya.

⁸ Ipfi ḽa Muṋe washu ḽi tshi bva ha inwi ḽa mbo ḓi phaḓalala asiḽoo, ḽi si gume Makedonia na Akhaya fhedzi; bvumo ḽa uri no fulufhela hani Mudzimu ḽa vho ḓivhiwa hoṱhe-hoṱhe, lune zwi si tsha vhuya zwa ṱoḓea uri riṋe ri ambe tshithu ngazwo;

⁹ vhenevho ndi vhone vhane vha vho ṱanziela uri no ri ṱanganedza hani, na uri no ṱutshela hani midzimu ya zwifanyiso ni tshi rembulutshela ha Mudzimu wa ngoho a tshilaho,

¹⁰ na uri zwino ni vho lindela Murwa wawe a tshi bva ṱaḓulu, Ene we Khotsi a mu vusa vhafuni, ndi amba Yesu ane a ri lamukisa kha khaṱhulo i ḓaho.