1 VHAKORINTA 7 - BIVHILI KHETHWA Mafhungo Madifha

7 – 8 Kutshilele kwa Mukhriste vhukati ha vhannḓa Mbudziso nga mbingano

¹ Ri tshi ḓa kha aḽa e na nṅwalela: Ndi zwone, munna u ita zwone a sa kwami musadzi.

² Hone u thivhela vhupombwe ndi khwiṋe munna muṅwe na muṅwe a tshi vha na musadzi wawe, na musadzi muṅwe na muṅwe a vhe na munna wawe.

³ Munna kha a khunyeledze pfanelo dzawe kha musadzi wawe, na musadzi a ralo-vho kha munna wawe.

⁴ Musadzi ha langi muvhili wawe ene muṋe, u langiwa nga munna wawe; na ene munna ha langi muvhili wawe, u langwa nga musadzi wawe.

⁵ Ni songo ṱahedzana hezwo arali ni songo ranga u langana u ḓiilisa tshifhinganyana, uri ni wane tshifhinga tsha u ḓikumedza thabelo, ni konou vhuelelana, ni sa ḓo kundwa u ḓifara na khakhiswa nga Saṱhane.

⁶ Ndi tshi ni tendela nga u ralo a si u ni vhetshela mulayo.

⁷ Ndo vha ndi tshi nga takala arali vhoṱhe vha tshi nga nṋe; hone muṅwe na muṅwe u na mpho yawe ye Mudzimu a mu ṋea; muṅwe u na ino, muṅwe a vha na iḽa-vho.

⁸ Zwino ndi tshi amba na vha sa athu dzea kana u dzewa, na dzitshilikadzi, ndi ri: ndi zwavhuḓi vha tshi dzula vho ralo sa nṋe.

⁹ Hone arali vha sa koni u ḓifara ndi khwiṋe u vha na musadzi kana munna, u fhira u tambudzwa nga nyemulo.

¹⁰ Zwino ndi tshi amba na vha re na miṱa a hu tsha amba nṋe, ndi ndaela ya Muṋe washu, i ri: musadzi a songo ṱala munna wawe.

¹¹ Arali a ṱala a dzule o ralo, kana a pfumedzane na munna wawe. Munna na ene a songo ṱala musadzi wawe.

¹² Ndi tshi amba na vhaḽa vhaṅwe ndi ri – hafhu ndi nṋe-vho zwino hoyu, a si Muṋe washu: arali muṅwe washu e na musadzi a si mutendi, uyo musadzi a tshi kha ḓi funa u dzula nae, a songo mu thatha.

¹³ Zwi ḓi nga musadzi e na munna a si mutendi, uyo munna a tshi kha ḓi funa u dzula nae, na ene a songo mu ṱala.

¹⁴ Ndi uri arali musadzi e mutendi, vhukhethwa vhu rathela kha munna naho munna e si mutendi; na kha musadzi a si mutendi zwo ralo: arali munna wawe e mutendi vhukhethwa vhu rathela na kha ene musadzi. Ndi musi vhana vhaṋu vho kumala, hone zwino ndi vha Mudzimu.

¹⁵ Huno arali a si mutendi a tshi funa u u ṱala, mu litshe a ṱuwe zwawe. Arali zwo ralo munna kana musadzi wa mutendi o vhofholowa. Mudzimu o ri vhidzela u dzula nga mulalo.

¹⁶ U zwi ḓivha ngani-ha iwe musadzi uri a u nga gumi nga u tshidza munna wau? Hu ḓi nga munna u zwi ḓivha hani uri a u nga tshidzi musadzi wau?

U fushea nga zwe Mudzimu a ri kovhela

¹⁷ Tenda muṅwe na muṅwe a dzula e kha zwenezwo zwine Mudzimu a mu kovhela, e kha zwenezwiḽa zwe Mudzimu a mu vhidza e khazwo. Iyi ndi yone ndaela ine nda ḓivhadza zwivhidzo zwoṱhe.

¹⁸ We a vhidzwa o fumba Tshijuda a songo tsha ḓidina nga u thutha holwo luswayo; na we a vhidzwa a songo fumba a songo ḓidina nga u ḓifumbisa.

¹⁹ U fumba kana u sa fumba a zwi ambi tshithu; tshihulwane ndi u tevhedza ndaela dza Mudzimu.

²⁰ Muṅwe na muṅwe u fanela u dzula e zwe a vha e zwone musi a tshi vhidzwa nga Mudzimu.

²¹ Arali wo vhidzwa u phuli u songo zwi londa. Hone arali zwi tshi konadzea uri u vhofholowe, ita nga u ralo u sa timatimi.

²² Phuli i re mulanda wa Muṋe washu yo vhofhololwa nga Muṋe washu. Zwo ralo na kha we a vhidzwa e si phuli, u vha phuli ya Khristo.

²³ Mudzimu o ni renga tshoṱhe, zwenezwo ni songo tsha ḓiita phuli dza vhathu na langiwa nga mihumbulo yavho.

²⁴ Vha hashu, muṅwe na muṅwe kha a dzule a tshi shumela Mudzimu e zwenezwo zwe a vha e zwone musi a tshi vhidzwa.

Vha si na miṱa, na dzitshilikadzi

²⁵ Ndi tshi ḓa kha mafhungo a vha si na miṱa, a thi koni u ni fha ndaela ine ya bva ha Muṋe washu; ndi ḓo tou ni vhudza nga hune nṋe nda zwi vhona ngaho, vhunga nga vhuthu ha Muṋe washu ndi a fulufhedzeaho.

²⁶ Ndi tshi sedza misi mivhi ye ra livhana nayo, nṋe ndi vhona unga ndi khwiṋe muthu a tshi ḓidzulela o ralo.

²⁷ Arali u na musadzi u songo mu ṱala; arali u si na u songo mu ṱoḓa.

²⁸ Hone naho wa dzea a si mulandu; na musidzana a dzewa ho ngo khakha. Ndi khou tou ṱoḓa u ni ponyokisa kha maṱhupho ane vha re na miṱa vha ṱangana nao fhano shangoni.

²⁹ Vha hashu, ḓivhani uri tshifhinga tsho no vha tshiṱuku. U bva zwino na vha re na miṱa vha nge vha si na;

³⁰ vhane vha lila vha nge vha songo ṱungufhalaho; vhane vha sea vha nge vha songo takalaho; vhane vha renga vha nge zwe vha renga a si zwavho;

³¹ vhane vha shuma zwa shango ḽino vha tshile vha tshi nga a vha zwi londi; ngauri shango heḽi ḽine na ḽi vhona ḽi ḓo ṱuwa ḽi tshi fhela.

³² Ndi ṱoḓa uri ni sa tsha dinalea ngazwo. A si na muṱa, tshine a ḓidina ngatsho ndi u shumela Muṋe washu, a tshi funa u takadza Muṋe washu.

³³ A re na muṱa, zwine a ḓidina ngazwo ndi zwa shango, tshine a swela mbilu ndi u takadza musadzi wawe;

³⁴ u na mbilu mbili. Musadzi a si na muṱa, kana musidzana, tshine a ḓidina ngatsho ndi u shumela Muṋe washu, a funa uri muvhili na muya wawe, zwoṱhe zwi vhe zwikhethwa. A re na muṱa, zwine a ḓidina ngazwo ndi zwa shango, a tshi funa u takadza munna wawe.

³⁵ U ralo ndi u itela u ni farisa. A thi khou ni vhiela luhura lini, ndi khou tou ṱoḓa uri ni ite zwi re zwone zwo fanelaho, ni ḓikumedze Muṋe washu tshoṱhe ni si na mbilu mbili.

³⁶ O no ambisaho musidzana, a vhona uri u sa mu vhinga hu ḓo vha u khakha nge a mu ṱuvhesa, a vhona uri u vhinga ndi khwiṋe, nga a vhinge; hu ḓo vha hu si u khakha.

³⁷ Hone arali munna o tou ḓikhethela a khwaṱhisa uri a thi mu vhingi, na onoyo ha khakhi, tenda zwi zwe a tou ḓifunela hu si na we a mu kombetshedza.

³⁸ Zwenezwo ane a dzea u ḓi ita zwone-vho, fhedzi ane a sa dzee ndi ene we a tou ita zwone-zwone.

³⁹ Musadzi o dzewaho o vhoxwa nga Mulayo musi munna wawe a tshi kha ḓi tshila; hone arali munna wawe a lovha a nga ḓi dzewa nga munna muṅwe na muṅwe ane a mu funa, tenda uyo munna na ene a vha e mutendi.

⁴⁰ Hone mashudu awe a ḓo vha mahulwane arali a tshi ḓidzulela e tshilikadzi. Ndi kuvhonele kwanga, hone ndi ḓivha na nṋe ndi na Muya wa Mudzimu.