1 VHAKORINTA 6 - BIVHILI KHETHWA Mafhungo Madifha

U hwelelana ha vhatendi

¹ Arali muṅwe waṋu e na mulandu na mutendi ngae, nṋa a nga tou vhuya a mu hwelela khoroni ya vhannḓa? Vhathu vha Mudzimu a vha pfumedzani nga tshavho naa?

² Kani a ni zwi ḓivhi uri vhathu vha Mudzimu ndi vhone vhane vha ḓo haṱula shango? Zwino-ha, arali inwi ni tshi ḓo haṱula shango, ni kundwa ngani u haṱula izwo zwidandu?

³ Kani a ni zwi ḓivhi uri ri ḓo haṱula vharuṅwa? Ri nga kundwa hani-ha nga zwa vhuno vhutshilo, zwiṱukuṱuku?

⁴ Arali ha itea milandu yo raloho vhukati haṋu, ni nga i hwala na i isa kha vhathu vhane vha si vhe tshithu tshivhidzoni naa?

⁵ Zwi shonisa hani vhathu vha hashu! Hu kundwa na muthihi waṋu ane a nga kona u pfumedzanya vhatendi ngae?

⁶ Zwo naka mutendi a tshi hwelela mutendi ngae uri a haṱulwe nga vha si vhatendi naa?

⁷ U hwelelana nga tshaṋu zwi sumba uri no sokou dzula no kundwa. A si khwiṋe ni tshi litsha na khakhelwa zwaṋu? A si khwiṋe u ṱangulwa zwaṋu?

⁸ Zwo naka ni tshi khakhelana nga tshaṋu na dovha na ṱangulana ngeno ni vhathihi naa?

⁹ Kani a ni zwi ḓivhi uri vhavhi a vha nga vhi na tshavho muvhusoni wa Mudzimu na kathihi? Ni songo ḓifhura: ḓivhani uri hu dziphombwe, hu vharereleli vha midzimu, hu vha u ṱalana, hu ane a tenda u itwa musadzi nga munna ngae, na onoyo ane a mu ita zwenezwo,

¹⁰ hu mafobvu, hu vha funesaho lupfumo, hu zwidakwa, hu vhasasaladzi, he mafobvu, vhoṱhe a vha nga vhi na tshavho muvhusoni wa Mudzimu.

¹¹ Vhaṅwe vhaṋu vho vha vho tou ralo. Hone zwino no ṱanzwiwa vhutshinyi, na itwa vhakhethwa, Mudzimu u vho ri ni vhavhuya nga Muṋe washu Yesu Khristo na nga Muya wa Mudzimu washu.

Hulisani Mudzimu nga mivhili yaṋu!

¹² Vhaṅwe vha ri, “Riṋe a ri tsha ila tshithu.” A thi hani, hone zwiṅwe-vho zwine ni sa tsha ila a zwi ni farisi tshithu. Ndi nga ḓi ri a thi tsha ila tshithu na tshithihi. Ndi zwone, hone ndi nga si tende na tshini tshazwo tshi tshi mmbusa.

¹³ Vhaṅwe vha ri, “Tsha thumbu ndi zwiḽiwa; tsha zwiḽiwa ndi thumbu.” Ndi zwone, hone ḓivhani uri Mudzimu u ḓo kaṱudza zwoṱhe vhuvhili hazwo. Muvhili a wo ngo sikelwa vhupombwe, wo sikelwa Muṋe washu, nahone Muṋe washu u a u vhavhalela.

¹⁴ Mudzimu o vusa Muṋe washu vhafuni, na riṋe u ḓo ri vusa nga maanḓa awe.

¹⁵ A ni zwi ḓivhi uri mivhili yaṋu ndi miraḓo ya Khristo naa? Ndi zwavhuḓi ndi tshi dzhia miraḓo ya Khristo nda i ita miraḓo ya phombwe naa? Aiwa, na kathihi!

¹⁶ Khamusi a ni zwi ḓivhi uri ane a ḓikwakwanya na phombwe u vha muvhili muthihi nayo. Hu pfi, “Vhenevho vhavhili vha ḓo vha sa muvhili muthihi.”

¹⁷ Hone ane a ḓikwakwanya na Muṋe washu u vha muthihi nae lwa muya.

¹⁸ Ilani vhupombwe! Vhutshinyi vhuṅwe hoṱhe vhune muthu a nga ita a vhu kwami muvhili wawe, hone a itaho vhupombwe u khakhela muvhili wawe ene muṋe.

¹⁹ Kani a ni zwi ḓivhi uri muvhili waṋu ndi nnḓu ya Muya Mukhethwa a re ngomu haṋu we na ṋewa nga Mudzimu, na uri a ni vhaṋu inwi vhaṋe?

²⁰ O ni renga tshoṱhe. Zwenezwo hulisani Mudzimu nga mivhili yaṋu.