1 VHAKORINTA 3 - BIVHILI KHETHWA Mafhungo Madifha

Zwo ḓisaho dziphambano ndi zwifhio?

¹ Hone inwi vha hashu ndo vha ndi sa athu kona u amba na inwi nda nga ndi khou amba na vhathu vha langiwaho nga Muya Mukhethwa, ndo vha ndi kha ḓi fanela u amba nda nga ndi khou amba na vhathu vhane vha langiwa nga tsiko yavho, vhane vha kha ḓi vha vhushie kha zwa Khristo.

² A tho ngo kona u ni fha mugade ngauri no vha ni sa athu u kona, ndo ni mamisa mikando. Na zwino a zwi athu ni fanela,

³ ngauri ni kha ḓi langiwa nga tsiko yaṋu. Hufha ni tshi kha ḓi vhivhana na u fhambana nga tshaṋu, a si hone ni tshi kha ḓi langiwa nga tsiko yaṋu? A si u tshila sa vha shango ḽino honoho?

⁴ Arali muthu a tshi kha ḓi ri, “Nṋe ndi wa Paulo!” muṅwe a ri, “Nṋe ndi wa Apolosi!” – a si hone u tshila sa vha shango ḽino kani?

⁵ Apolosi ndi mini-ha? Paulo ene ndi mini? Ri tou vha vhashumeli vha Mudzimu vhe ne u vha pfa na vha vhatendi, muṅwe na muṅwe washu a tshi shuma nga he Muṋe washu a mu ṋea.

⁶ Nṋe nda gobela mbeu, Apolosi a sala a tshi sheledza, Mudzimu a vha Ene a medzaho.

⁷ Zwenezwo mugobeli a si tshithu, na musheledzi a si tshithu; mushumo muhulwane ndi wa Mudzimu mumedzi wazwo.

⁸ Mugobeli na musheledzi vha a fana, muṅwe na muṅwe u ḓo hola nga he a shuma.

⁹ Ri tou vha vhashumisani na Mudzimu, inwi ni tsimu ya Mudzimu. Na dovha na vha tshifhaṱo tsha Mudzimu.

Tshivhidzo ndi nnḓu ya Mudzimu

¹⁰ Nṋe ndo tea muteo nga he Mudzimu a nkovhela ngaho nga vhuthu hawe, nda shuma sa mufhaṱi makone; ha ḓa muṅwe a fhaṱa he nda tea. Ni tshi fhaṱa muṅwe na muṅwe a sedze kufhaṱele kwawe,

¹¹ ngauri a hu na ane a nga tea muṅwe muteo; wo dzula wo tewa, ndi Yesu Khristo.

¹² Arali muthu a tshi fhaṱa kha muteo uyo, a nga ḓi fhaṱa nga musuku, kana siliva, kana matombo a mutengo muhulu, kana matanda, kana hatsi kana maṱanga –

¹³ mushumo wa muṅwe na muṅwe u ḓo vhonala. Nga ḓuvha ḽa khaṱhulo u ḓo dzumbululwa nga mulilo. Mulilo ndi wone une wa ḓo sumbedza uri muṅwe na muṅwe o fhaṱa nga mini.

¹⁴ Arali zwe muthu a fhaṱa zwa kunda mulilo, u ḓo wana pfufho yawe.

¹⁵ Arali zwa swa ha nga wani tshithu. U tshidzwa u ḓo tshidzwa, hone u ḓo tshidzwa sa muthu we a ponyoka o swelwa nga zwoṱhe.

¹⁶ Kani-ha a ni zwi ḓivhi uri ni nnḓu ya Mudzimu? A ni ḓivhi uri Muya wa Mudzimu u dzula ngomu haṋu?

¹⁷ Ane a tshinyadza nnḓu ya Mudzimu, na ene Mudzimu u ḓo mu tshinyadza, ngauri nnḓu ya Mudzimu ndi khethwa. Ḓivhani-ha uri nnḓu yeneyo ndi inwi.

¹⁸ Hu songo vha na ane a ḓifhura: ane a ḓifhima uri o ṱalifha nga vhuṱali ha vhathu, kha a nge tsilu, ndi hone a tshi ḓo ṱalifha-ha;

¹⁹ ngauri Mudzimu o vhona vhuṱali ha ḽino shango vhu vhutsilu, unga ho ṅwaliwa ha pfi, “Mudzimu u fasha vhaṱali nga vhukwila havho vhone vhaṋe.”

²⁰ Ha dohwa ha pfi, “Muṋe washu u ḓivha mihumbulo ya vhaṱali; u ḓivha uri ndi ya fhedzi.”

²¹ Zwenezwo hu songo tsha vha na ane a zuwa vhathu, zwoṱhe ndi zwaṋu:

²² hu Paulo, hu Apolosi, hu Kefasi, he shango, he vhutshilo, naho lu lwone lufu, hu zwa ṋamusi, he zwa matshelo – ndi zwaṋu zwoṱhe hezwo;

²³ inwi ni vha Khristo, Khristo ndi wa Mudzimu.