1 VHAKORINTA 2 - BIVHILI KHETHWA Mafhungo Madifha

U ṱanziela Khristo o vhambwaho

¹ Vha hashu, zwiḽa ndi tshi ḓa ngeo ndi tshi ni ḓivhadza tshiphiri tsha Mudzimu, ndo vhuya nda ita ndi tshi nakisedza maipfi ndi tshi ṱongisa pfunzo naa?

² Nṋe ndo vha ndo ḓivhofha uri a thi ṱoḓi u ni vhudza tshiṅwe tshithu arali e si Yesu Khristo, nahone ndi tshi ombedzela u vhambwa hawe tshifhambanoni.

³ Zwiḽa ndi tshi swika ndo ḓipfa ndi si na nungo ndi tshi tetemela nga nyofho.

⁴ Maipfi e nda amba na pfunzo ye nda funza zwo vha zwi si zwa u ni kumba nga u ṱongisa vhuṱali hanga; tshanga ho vha hu u ni sumbedza maanḓa a Muya wa Mudzimu,

⁵ uri lutendo lwaṋu lu si tewe kha vhuṱali ha vhathu, ni fulufhele nge na vhona maanḓa a Mudzimu.

Vhuṱali vhune ra dzumbululelwa nga Muya wa Mudzimu

⁶ Naho zwo ralo zwine ra amba ndi vhuṱali kha vho aluwaho muyani, hone vhu si vhuṱali ha ḽino shango kana ha vhavhusi vhaḽo – vha khou fhela havha vhathu.

⁷ Vhuṱali vhune ra vhu ḓivhadza ndi tshiphiri tsha Mudzimu: shango ḽi sa athu vha hone o dzula o ri tela u vha na vhugala, hone a zwi dzumba.

⁸ A hu na na muthihi wa vhahulwane vha ḽino shango we a ṱalukanya vhuṱali uho, ndi musi vha songo vhuya vha vhamba Muṋe wa vhugala hoṱhe kha tshifhambano.

⁹ Iṱali ho ṅwaliwa ha pfi, “Zwe Mudzimu a lugisela vha mu funaho a hu na iṱo ḽe ḽa vhuya ḽa zwi vhona, a hu na nḓevhe ye ya vhuya ya zwi pfa, a hu na we a vhuya a zwi elekanya.”

¹⁰ Hone riṋe Mudzimu o ri dzumbululela zwone nga Muya Mukhethwa. Ndi Ene a ṱanḓulukanyaho zwoṱhe, a sa siedzi na zwidziki zwa Mudzimu.

¹¹ Ndi nnyi a ḓivhaho mihumbulo ya muthu arali u si muya wa onoyo muthu? Sa zwenezwo a hu na ane a ḓivha mihumbulo ya Mudzimu arali e si Muya wa Mudzimu.

¹² Hone riṋe a ro ngo ṋewa muya wa shango ḽino, ro ṋewa Muya ane a bva ha Mudzimu, ndi zwine ra vho ḓivha zwe Mudzimu a ri tonda.

¹³ Ndi zwenezwo zwine ra zwi amba, hone ri sa ambi nga maipfi a lemelaho e ra funzwa nga vhaṱali vha fhano shangoni, ri amba nga maipfi e ra funzwa nga Muya Mukhethwa. Ngauralo ri ṱalutshedza mafhungo a Muya nga maipfi e ra ṋewa nga Muya.

¹⁴ Muthu nga tsiko yawe ha ṱanganedzi zwa Muya wa Mudzimu. Ene u vhona zwi zwa vhutsilu. Na u kona ha koni u zwi ṱalukanya, zwi ṱanḓulukanywa nga we a funzedzwa nga Muya.

¹⁵ Muthu a no langwa nga Muya ndi ene a no ṱalukanya zwoṱhe, ngeno ene muṋe a sa ṱalukanywi nga muthu.

¹⁶ Na Maṅwalo a ri, “Ndi nnyi a ḓivhaho muhumbulo wa Muṋe washu? Ndi nnyi ane a nga mu laya?” A vha riṋe ri na muhumbulo wa Khristo.