1 VHAKORINTA 16 - BIVHILI KHETHWA Mafhungo Madifha

Sengosengo ḽa u ṱhaḓula vhatendi vha Judia

¹ Zwino ndi tshi ḓa kha aḽa a u tonda vhathu vha Mudzimu vha re Judia, ndi ri na inwi itani zwenezwo zwe nda dzudzanya na zwivhidzo zwa shango ḽa Galata.

² Swondaha iṅwe na iṅwe muṅwe na muṅwe waṋu a bvise masheleni nga he zwa mu anḓa a vhulunge, uri hu sa ḓo vha na khakhathi ya u kuvhanganya tshelede ndo no swika.

³ Ndi tshi swika ni khethe vhanna vho fanelaho; nṋe ndi ḓo vha ṋea maṅwalo a u ṱanziela uri vha kone u isa zwifhiwa hezwo zwaṋu Jerusalema.

⁴ Arali zwo fanela uri ndi vha fhelekedze ndi nga ṱuwa navho.

Nyendo dze Paulo a ḓilugisela u dzi fara

⁵ Ndi ḓo fhira nga Makedonia nda ḓo konou ḓa ngeo, ngauri ndi fanela u thoma u ya hone.

⁶ Ndo no swika ndi vhona uri ndi ḓe dzulinyana na inwi henefho, khamusi nda fhedza vhuriha hoṱhe, na ḓo kona u mpfarisa u fhirela phanḓa, henefho hune nda ḓo vha ndi tshi ya hone.

⁷ Arali Muṋe washu a tshi funa ndo lavhelela u thoma ra vhonana zwavhuḓi, hu si u sokou dzuli nda fhira lini.

⁸ Ndi ḓo vha ndi fhano Efesa u swika nga Pentekoste,

⁹ ngauri henefhano Mudzimu o mmvulela gondo ḽa u shuma mushumo muhulwane, naho hu na vhahanedzi vhanzhi.

¹⁰ Arali Timoti a tshi nga swika henefho ni mu fare zwavhuḓi sa ṅwana wa hayani, ngauri na ene u kha mushumo wa Muṋe washu sa nṋe.

¹¹ Hu songo vha na ane a mu nyadza. Ni mu farise uri a fhirele ngeno nga mulalo, ngauri nṋe na vhaṅwe vha hashu ro mu lindela.

¹² Zwino uyu Apolosi wa hashu-vho, ndi na lunzhi ndi tshi mu kwengweledza uri a farisane lwendo na vhaṅwe vha hashu vha tshi ḓa u ni dalela, hone uri a ḓe zwino ha vhuyi a tenda. Zwenezwo tshifhinga tshi tshi tenda u ḓo ḓa.

Nyonesano

¹³ Fhaṱuwani ni khwaṱhe kha lutendo, ni vhe na tshivhindi na nungo.

¹⁴ Mishumo yoṱhe ni i ite nga lufuno.

¹⁵ Vha hashu, a thi ri Stefanasi na muṱa wawe ni a vha ḓivha zwavhuḓi, vhone vhatendi vha u thoma vha ngeo vunduni ḽa Akhaya, vhe vha ḓikumedza u shumela vhathu vha Mudzimu –

¹⁶ ndi ni humbela uri ni pfe vhathu vha no nga vhenevho na vhoṱhe vhane vha vha tikedza vhe vhashumi vha biko.

¹⁷ Ndo takala hani ndi tshi vhona Stefanasi na Fothunathosi na Akhaikhosi vha tshi swika, nde u vha vhona nda vho nga ndo ni vhona noṱhe.

¹⁸ Vhe u nnetulusa ha vha u netulusa inwi. Vhathu vho raloho a vha ri tshileli.

¹⁹ Zwivhidzo zwa ngeno vunduni ḽa Asia zwi ri ni vhe hone. Na Akwila na Phriska khathihi na tshivhidzo tshi kuvhanganaho nḓuni yavho vhe na vhofhekanywa navho nga Muṋe washu vha ri ni vhe hone.

²⁰ Vhathu vhoṱhe ngeno vha ri kha ḽi vhe dakalo. Ni reshane nga u kuvhatedzana sa vhatendi.

²¹ Zwino afha litshani ndi ṅwale nga tsha vhukoma! ndi nṋe paulo ndi ri: ni vhe hone noṱhe.

²² Ane a si fune Muṋe washu, uyo o dzula o teketelwa! Marana tha – Iḓa Muṋe washu!

²³ Ngavhe Muṋe washu Yesu a tshi ni itela vhuthu.

²⁴ Ndi ḓo dzula ndi tshi ni funa noṱhe nge ra vha vhathihi na Khristo Yesu.