1 VHAKORINTA 13 - BIVHILI KHETHWA Mafhungo Madifha

Lufuno

¹ Naho nda amba nyambo dza vhathu na dza vharuṅwa, lufuno ndi si na, ndi nga tsimbi i ungaho, ndi nga ngoma i lilaho.

² Naho nda porofita, nda ṱalukanya zwiphiri zwoṱhe, nda vha na nḓivho yoṱhe; nda vhuya nda vha na lutendo lwa u sudzulusa dzithavha, lufuno ndi si na, a thi tshithu.

³ Naho nda kovhela vhaṅwe zwoṱhe zwine nda vha nazwo, nda vhuya nda kumedza muvhili wanga uri u fhiswe, lufuno ndi si na, a zwi mpfarisi tshithu.

⁴ Lufuno a lu fheli mbilu. Lu na vhuthu. A lu na vivho, a lu ṱongi, a lu ḓihudzi.

⁵ Lufuno lwo vuḓa. A lu na tseḓa, a lu na mbilwana, a lu pakati vhukhakhi.

⁶ A lu takaleli tshivhi, lu takalela zwi re zwone.

⁷ Lufuno lu na mbilu ndapfu: Lu ḓi dzula lu tshi fulufhela, a lu fulufhuwi, lu konḓelela zwoṱhe.

⁸ Lufuno a lu gumi. Vhuporofita hone vhu ḓo kaṱudzwa; ndimi dzone dzi ḓo fhumula; nḓivho ya zwiphiri i ḓo fhela.

⁹ Zwino ri kha ḓi tou ḓivha kupiḓanyana, na zwine ra porofita ndi kupiḓanyana,

¹⁰ hone hu tshi ḓa nḓivho yo khunyelelaho zwi re tshiṱahe zwi ḓo fhela.

¹¹ Zwiḽa ndi tshee ṅwana ndo vha ndi tshi amba sa ṅwana, nda elekanya sa ṅwana, mihumbulo i ya ṅwana; zwino ndó no vha munna, hana ho fhela.

¹² Zwine ra vhona zwino a zwi vhonalesi; zwi nga murunzi kha tshivhoni. Ngavhuya ri ḓo vhona Mudzimu ro tou livhana zwifhaṱuwo. Zwine nda ḓivha zwino ndi kupiḓanyana; ngavhuya ndi ḓo zwi ḓivha tshoṱhe sa zwine Mudzimu a nnḓivha tshoṱhe.

¹³ Zwino-ha zwi sa gumi ndi zwiraru: Ndi lutendo, na u lavhelela zwi ḓaho, na lufuno; hone-ha tshi fhiraho zwoṱhe ndi lufuno.