1 VHAKORINTA 10 - BIVHILI KHETHWA Mafhungo Madifha

U rerelela midzimu zwi na khombo

¹ Vha hashu, ni songo hangwa zwe vhomakhulukuku washu vha ṱangana nazwo. Vhoṱhe vho tshimbila vho tsireledzwa nga gole; vhoṱhe vha wela lwanzhe zwavhuḓi;

² vhoṱhe vha lovhedzelwa henefho goleni na lwanzheni uri vha vhe vhatevheli vha Mushe,

³ vhoṱhe vha ḽa zwenezwo zwiḽiwa zwa muya,

⁴ vhoṱhe vha nwa tshenetsho tshinwiwa tsha muya, vha nwa zwi tshi gubunyea kha tombo ḽa muya ḽe ḽa vha ḽi tshi tshimbila navho. Tombo iḽo o vha e Khristo Ene muṋe.

⁵ Naho zwo ralo vhunzhi havho vho vha vha sa takadzi Mudzimu, ndi zwone zwe zwitumbu zwavho zwa sokou hasekana na phanga.

⁶ Zwino hezwo zwoṱhe ndi zwine Mudzimu a ri sevha ngazwo uri ri songo vha edzisa ra emula zwo vhifhaho.

⁷ Nahone ri songo vha edzisa ra rerelela midzimu ya zwifanyiso sa fhaḽa he ha ṅwalwa ha pfi, “Vhathu vha dzula fhasi vha ḽa, vha nwa, vha takuwa vha ita vhuḓabaḓaba.”

⁸ Riṋe ri songo vha edzisa ra ita vhupombwe sa zwe vhone vha ita ha vhulawa vha 23 000 nga ḓuvha ḽithihi.

⁹ Ri songo vha edzisa ra ṱunga Khristo sa zwe vhone vha ita vha vhulawa nga dziṋowa.

¹⁰ Ri songo vha edzisa ra gungula sa zwe vha ita vha vhulawa nga muruṅwa wa bulayo.

¹¹ Hezwo zwithu zwo vha wela uri i vhe pfunzo kha vhaṅwe, zwa dovha zwa ṅwalwa u ri laya, ngauri tshifhinga hetshi tshine ra vha khatsho tshi tsini ha vhufhelo.

¹² Ane a ri ndo ima a vhone a sa ḓo wa.

¹³ Milingo yoṱhe ye na ṱangana nayo ndi ine muthu a nga i kunda. Mudzimu u a fulufhedzea; a nga si tendele ni tshi lingwa lune na kundwa; musi ni tshi lingwa u ḓo ni ṋea nungo uri ni kone u konḓelela, u ralo ha vha u ni vulela kubuli kwa u ponyoka.

¹⁴ Zwino-ha vhafunwa, ilani zwa u rerelela midzimu.

¹⁵ Ndi na fulufhelo ḽa uri ndi tshi amba na inwi ndi khou amba na vhathu vha na ṱhalukanyo. Ḓihumbuleleni inwi vhaṋe.

¹⁶ Tshinwelo tshine ra nwa ra renda na u livhuha Mudzimu a tshi ambi u vha vhathihi na Khristo nga malofha awe naa? Vhurotho vhune ra vhu ṅwata a vhu ambi u vha vhathihi na Khristo nga muvhili wawe naa?

¹⁷ Zwenezwo unga mukonde wa vhurotho u muthihi, riṋe roṱhe naho ri vhanzhi ri muvhili muthihi ngauri ri kovhekana mukonde wonoyo muthihi.

¹⁸ Humbulani zwine ra vhona kha lushaka lwa Vhaisraele. Khavho vhane vha ḽa dzinduvho a vha na mukovhe kha aḽiṱari vhoṱhe naa?

¹⁹ Ndi tshi ralo a si uri nduvho dza midzimu ndi tshithu kana midzimu ndi tshithu lini.

²⁰ Ndi khou tou ni sumbedza uri nduvho dzenedzo a vha dzi kumedzi Mudzimu, vha dzi kumedza madimoni, huno nṋe thi funi ni tshi konana na madimoni.

²¹ Ni nga si kone u nwa nga tshinwelo tsha Muṋe washu na dovha na nwa nga tsha madimoni. Ni nga si ḽele ḓafulani ḽa Muṋe washu na dovha na ḽa kha ḽa madimoni.

²² Kani ri ṱoḓa u ṱunga mbiti dza Muṋe washu? Kani ni vhona unga ri nga mu kunda?

Zwoṱhe kha zwi vhe zwa u ita uri Mudzimu a rendwe

²³ Ni tshi amba ni ri, “Riṋe a ri tsha ila tshithu.” Ndi zwone, hone zwoṱhe zwi a ri farisa naa? Ni ri, “A ri tsha ila tshithu na tshithihi!” A thi hani; hone ndi ri: Zwoṱhe zwi a fhaṱa naa?

²⁴ Hu songo vha na ane a ṱoḓa zwi tshi nakela ene e eṱhe; nga a humbule na vhaṅwe.

²⁵ Ni nga ḓi ḽa zwoṱhe zwi rengiswaho vungani ni songo ṱwa ni tshi vhudzisa nga u timatima.

²⁶ Hufha hu tshi pfi, “Shango ndi ḽa Muṋe washu na zwoṱhe zwi re khaḽo.”

²⁷ Arali a si mutendi a u vhidza u yo ḽa nae, wa vhona uri ndi khwiṋe u tshi ya, iḽa zwine wa ṋewa, u songo ṱwa u tshi vhudzisa nga u timatima.

²⁸ Hone arali muṅwe a bula a ri, “Zwiḽiwa hezwi zwo sumelwa midzimu,” zwenezwo u songo tsha zwi ḽa, hu u itela uyo we a u vhudza, a sa vho ḓo ri na iwe u anḓana na zwa midzimu.

²⁹ Naho iwe u tshi ḓivha uri midzimu iyo a si tshithu, ene u kha ḓi i hulisa. U nga ḓi ri, “Ndi kundiselwani u ita zwine nda funa nge muṅwe a tenda zwi si tshithu?

³⁰ Hufha ndo livhuha Mudzimu ndi tshi ḽa! Ndi kha ḓi solelwani kha zwe nde ndi tshi ḽa nda livhuha Mudzimu?”

³¹ Ndi zwone, hu musi ni tshi ḽa, hu musi ni tshi nwa, na tshini tshine na ita, tshihulwane ndi uri zwoṱhe kha zwi vhe zwa uri Mudzimu a rendwe.

³² Ni songo vhuya na khukhulisa na muthihi – a nga vha Majuda kana Magiriki, naho tshi tshivhidzo tsha Mudzimu.

³³ Edzisani nṋe, ndi ita nga nungo uri ndi takadze vhoṱhe, hu si uri zwi nakele nṋe fhedzi; tshililelwa tshanga ndi uri vha tshidzwe.