1 TIMOTI 6 - BIVHILI KHETHWA Mafhungo Madifha

Dziphuli

¹ Vho vhoxwaho nga vhupuli kha vha hulise vhaṋe vhavho nga nḓila dzoṱhe, uri hu si vhe na ane a sola dzina ḽa Mudzimu na pfunzo ya Tshikhriste.

² Phuli dzine vhaṋe vhadzo vha vha vhatendi dzi songo ri u vhona dzo no vha vhathihi navho dza vho vha nyadza; avho dzi tou ṋaṋa u vha shumela, ngauri vhane vha vhuelwa kha mushumo uyo ndi vhatendi vhane dza vha funa. Funzani eneo ni tshi khwaṱhisa vhathu.

Pfunzo yo shandeaho na lupfumo vhukuma

³ Ane a vhuya a funza pfunzo iṅwe ya thungo a sa nambateli maipfi kwao a Muṋe washu Yesu Khristo na pfunzo ya zwa u ofha Mudzimu,

⁴ onoyo u a ḓihudza, ha ḓivhi tshithu, ḽo no tou vha dzema ḽa u ṱaṱa khani na u lwela maipfi. Zwenezwo zwi bveledza vivho na dziphambano na maṱamba na u humbulelana vhuvhi

⁵ na khani dzi sa fheli dza vhathu vho ṱanganaho ṱhoho, vho xedzaho ngoho. Vhenevho vha vhona unga u luvha Mudzimu zwi nga vha pfumisa tshelede nnzhi.

⁶ Ndi zwone, u ofha Mudzimu ndi lupfumo luhulu arali muthu a tshi fushea nga zwine a vha nazwo.

⁷ Ri tshi ḓa shangoni ro ḓa na mini? Hu ḓi nga ri tshi ṱuwa ri nga si ṱuwe na tshithu.

⁸ Zwenezwo-ha arali ri na zwiḽiwa na zwiambaro kha ri fushee nga zwenezwo.

⁹ Hone vhane vha tama u pfuma vha wela milingoni vha fashwa nga zwikwekwe zwa nyemulo nnzhi dza vhutsilu dzi huvhadzaho dzine dza vha lozwa vha lovha tshoṱhe.

¹⁰ Ndi uri mudzi wa vhuvhi hoṱhe ndi u funesa tshelede; ho no ḓi gunea vhaṅwe nga u i funesa, vha pwashekanya mbilu dzavho nga u ḓiovhela zwitumbambiluni.

Nndwatshidele ya a fulufhelaho Mudzimu

¹¹ Hone inwi no ḓikumedzaho Mudzimu, ḓiiliseni zwoṱhe hezwo. Tshaṋu lwelani u vha muvhuya, na u luvha Mudzimu, na u vha na lutendo na lufuno na u sa fhela mbilu na vhuthu.

¹² Ni tou ḓifunga ni ome kha mbambe ya lutendo uri ni wane muṅene u re vhutshilo vhu sa gumi, ngauri ndi honoho vhutshilo he Mudzimu a ni vhidzela hone musi ni tshi ṱanzilela lutendo lwaṋu ni sa timatimi hu na ṱhanzi nnzhi.

¹³ Ndi a ni laya phanḓa ha Mudzimu, Ene ane zwoṱhe a zwi ṋea vhutshilo, na Khristo Yesu we a ṱanzilela ngoho a sa dzumbi a tshi sengiswa nga Pontio Pilato, ndi ri:

¹⁴ tevhedzani ndayo hei nga u fulufhedzea ni sa siedzi u swika ḓuvha ḽine Muṋe washu Yesu Khristo a ḓo vhonala.

¹⁵ Ane a ḓo ita uri a vhonale nga tshifhinga tsho fanelaho ndi Mudzimu murendwa, Ene Muvhusi e eṱhe, Khosi ya mahosi, Ene Muṋe wa vhaṋe,

¹⁶ Ene e eṱhe a sa fi, a dzulaho tshedzani tshi sa swikelwi nga muthu; ha athu vhonwa nga maṱo a muthu nahone ha nga vhuyi a vhonwa nga maṱo. Ene nga a huliswe a vhuse lini na lini. Amen.

¹⁷ Layani vho pfumaho fhano shangoni vha si ḓihudze vha si ḓitike nga zwithu zwi si na vhuṱanzi zwi ngaho lupfumo, tshavho hu vhe u ṱulutshela Mudzimu, Ene a no ri ṋea zwoṱhe zwi si na vhukono zwine ra ḓiphiṋa ngazwo.

¹⁸ Vha layeni uri vha ite zwivhuya, vha pfume mishumo mivhuya, vha vhe vhomapakulile, vha ḓiimisele u kovhekana na vhaṅwe.

¹⁹ Ndi hone vha tshi ḓo ḓikuvhanganyela lupfumopfumo lune lwa ḓo vha wone muteo wo khwaṱhaho wa zwa matshelo, vha vho ḓo kona u wana vhutshilo vhukuma.

²⁰ Timoti, vhulungani zwe na kumedzwa; ḓiiliseni zwiambo zwi sa ḓivhalei, na khani dzine vhaṅwe nga u sa ḓivha vha ri ndi yone “nḓivho”.

²¹ Vhaṅwe vho ri vha nayo, vha fhedza nga u xela nḓila ya lutendo. Ngavhe Mudzimu a tshi ni itela vhuthu nandi!