1 TIMOTI 5 - BIVHILI KHETHWA Mafhungo Madifha

Kukaidzelwe kwa miraḓo ya tshivhidzo

¹ Ni tshi kaidza mukalaha ni songo tou mu hambekanya, ni mu kwengweledze ni nge ni khou amba na khotsi aṋu; vhavhera ni vha fare sa vharathu vhaṋu;

² vhakegulu vhone ni vha fare sa vhomme; hone vhabvana ni vha fare sa dzikhaladzi, hu si na zwa vhuaḓa na kathihi.

Zwine zwa ṱoḓea kha dzitshilikadzi

³ Londolani tshilikadzi dzi si na vhalondoli.

⁴ Hone tshilikadzi i re na vhana vhayo kana vhaḓuhulu, vhenevho kha vha vhe vhone vhane vha ranga u vhavhalela shaka ḽavho, ha vha u guda u khunyeledza pfanelo dzavho dzo fanelaho Vhakhriste. Vha tshi ralo vha ḓo vha vha tshi livhuha zwe vhabebi vha vha itela. Hezwo ndi zwone zwi takadzaho Mudzimu.

⁵ Tshilikadzi i si na mulondoli yo lavhelesa Mudzimu, i dzula i tshi mu rabela vhusiku na masiari uri a i farise.

⁶ Hone tshilikadzi ine ya ḓikumedza kha zwa vhuaḓa, naho i tshi tshila zwi ḓi fana na musi yo ḓifela.

⁷ Vha laeni nga zwenezwo uri vha si solisee.

⁸ Zwi ḓi nga a sa londi mashaka awe, zwihulu vha muṱa wa hawe, onoyo o landula zwe a tenda, u vho fhirwa na nga a si mutendi.

⁹ He ha ṅwalwa madzina a dzitshilikadzi dzi shumelaho tshivhidzo hu songo vha na a sa athu vha na miṅwaha ya 60. U fanela u vha muthu we a vha a tshi fulufhedzea kha munna wawe,

¹⁰ e na bvumo kha u ita zwivhuya, zwi no nga sa: u alusa vhana vhawe zwavhuḓi, u takalela vhaeni, u ṱanzwa milenzhe ya vhatendi, u tikedza vhathu vha tambulaho, u ḓikumedza u ita zwivhuya nga hune a kona.

¹¹ Kha madzina eneo ni songo ṅwala tshilikadzi dzine dza kha ḓi vha vhathu vhaswa, vha sa ḓo ri vha tshi vho emula vhanna vha vho furalela Khristo vha tama u dzewa,

¹² vha vho wanala vhe na mulandu wa u laṱa zwe vha thoma u mu fulufhedzisa.

¹³ Zwi si izwo fhedzi: vha dovha vha ḓowela u tshinya tshifhinga nga u dala-dala vha tshi ṱanganya mitumba; zwa vho tou kalula musi vha tshi vho dzhena kha zwitshele na u dzhenelela kha zwa vhaṅwe, vha vhuya vha amba na zwi songo fanelaho u ambiwa.

¹⁴ Ndi zwine nda ri tshilikadzi dzi sa athu kegula dzi dzewe dzi bebe vhana, dzi londole miṱa yadzo, uri maswina a si wane tsha u ri sola ngatsho.

¹⁵ Ndi tshi ralo ndi uri dziṅwe tshilikadzi dzo no ḓi pambuwa kale, dzi vho tevhela Saṱhane.

¹⁶ Arali musadzi a re mutendi e na tshilikadzi muṱani wawe, u fanela u dzi londola a si lemedze tshivhidzo, uri tshone tshi kone u londola dzi si na vhalondoli.

Kufarelwe kwa vhalisa vha tshivhidzo

¹⁷ Vhalisa vhane vha ranga tshivhidzo phanḓa nga pfanelo vho fanela u pfufhiwa kavhili, zwihuluhulu vhane vha ḓinetisa vha tshi ḓivhadza ipfi ḽa Mudzimu na u funza.

¹⁸ Na Maṅwalo a ri, “Phulu i khou fhulaho ni songo i thivha mulomo,” a dovha a ri, “Mushumi o fanelwa nga malamba awe.”

¹⁹ Arali mulavhelesi a tshi pomokwa hu si na ṱhanzi mbili kana tharu ni songo zwi ita mafhungo.

²⁰ Vha tshinyaho ni vha kaidze phanḓa ha vhathu uri na vhaṅwe vha ofhe.

Dziṅwe ndaela

²¹ Ṱhanzi dzanga ndi Mudzimu na Khristo Yesu na vharuṅwa vhawe vho khethwaho: ndi a ni laya ndi ri: Tevhedzani idzi ndaela; ni songo dzula no haṱula muthu a sa athu ḓifhindulela, ni songo vha na tshiṱalula na kathihi.

²² Ni songo sokou ṱavhanyedza u vhea muthu zwanḓa na mu vhea mushumoni wa u shumela tshivhidzo, ni sa ḓo ri matshelo na wanala ni na mulandu-vho. Inwi dzulani no kuna.

²³ Ni songo tsha tou nwa maḓi fhedzi Timoti, ni ite ni tshi nwa na waininyana uri mala aṋu a kone u suka zwiḽiwa, ngauri ni dzula nga u lwala.

²⁴ Vhaṅwe vhathu vhutshinyi havho vhu khagala lune vha tshi swika tsengoni vha wana ho no vha ranga phanḓa, ngeno ha vhaṅwe vhu sa ṱavhanyi u vhonala.

²⁵ Sa zwenezwo na mishumo mivhuya i khagala; na i sa vhonali a i dzumbei.