1 SAMUELE 4 - BIVHILI KHETHWA Mafhungo Madifha

¹ Ipfi ḽa Samuele ḽa pfiwa nga Vhaisraele vhoṱhe. Muṅwe musi Vhaisraele vha bva pfumo vha yo lwa na Vhafilista. Vhaisraele vha ṱoka mishasha Ebenezere, Vhafilista vha ṱoka yavho Afeke.

Mbulungelo ya mulanga i tshi thubiwa

² Vhafilista vha bvisa mmbi yavho u yo ṱangana na Vhaisraele, govholano ḽa phaḓalala, Vhaisraele vha kundwa nga Vhafilista, ha vhulawa Vhaisraele vhane vha nga swika 4 000 henefho nndwani.

³ Musi vhanna vha tshi humela mishashani, vhahulwane vha Israele vha vhudzisa vha ri, “Ndi mini Muṋe washu o ita uri ri kundwe nga Vhafilista ṋamusi? Nga ri yo hwala mbulungelo ya mulanga ya Muṋe washu i re Shilo ri i ḓise fhano i tshimbile na riṋe, i ri lamulele kha maswina ashu.”

⁴ Ndi hone vhathu vha tshi ruma vhanna Shilo, vha vhuya na mbulungelo ya mulanga ya Muṋe washu Mulangazwoṱhe, we a dzula kha khuluṋoni vhukati ha vhakherube vhavhili. Vhana vha Eli vhavhili, Hofuni na Finiasi, vho vha vhe henefho vhe na mbulungelo ya mulanga ya Mudzimu.

⁵ Musi mbulungelo ya mulanga ya Muṋe washu i tshi dzhena mishashani, Vhaisraele vhoṱhe vha ṱavha mukosi mavu a tou dzinginyea.

⁶ Vhafilista vha tshi pfa uyo mukosi vha vhudzisa vha ri, “Mukosi uyo u re mishashani ya Vhaheberu ndi wa mini?” Musi vha tshi pfa uri mbulungelo ya Muṋe washu yo dzhena mishashani,

⁷ vha farwa nga nyofho vha ri, “Mudzimu wo dzhena mishashani. Zwo ri vhifhela! Zwa u rali a zwi athu vhuya zwa itea.

⁸ Ro welwa nga khombo! Ndi nnyi ane a ḓo ri lamulela zwanḓani zwa midzimu iyo ya maanḓa? Ndi vhaḽa vhadzimu vhe vha vhulaha Vhaegipita nga madwadze a sa konadzei ngei phangani.

⁹ Vhafilista, imani ni khwaṱhe! Ivhani vhanna ni sa ḓo vha phuli dza Vhaheberu unga vhone vho vha vhe phuli dzaṋu. Ivhani vhanna ni lwe!”

¹⁰ Ndi hone Vhafilista vha tshi lwa, Vhaisraele vha kundwa, muṅwe na muṅwe a shavhela hayani. Ha vhulawa vhanzhi, ha vhulawa vhanna vha Israele vha 30 000 vha no lwa vhá songo namela bere.

¹¹ Ha thubiwa na mbulungelo ya Mudzimu; vhana vha Eli vhavhili, Hofuni na Finiasi, na vhone vha vhulawa.

Lufu lwa Eli

¹² Musi wonoyo ha ḓa munna a no bva kha tsinde ḽa Benyamini, a gidima a tshi bva nndwani a ya Shilo; zwiambaro zwawe zwo vha zwo kherukana, ó ḓishela mavu ṱhohoni.

¹³ Musi a tshi swika a wana Eli o dzula kha tshidzulo tshawe tsini ha gondo ó lindela, ngauri o vha o dinalea nga mbulungelo ya Mudzimu. Uyo munna a tshi dzhena afho muḓini, a ḓivhadza zwe zwa itea, muḓi woṱhe wa vusa tshililo.

¹⁴ Eli a tshi pfa tshililo a vhudzisa a ri, “Tshililo itshi ndi tsha mini?” Uḽa munna a gidimela ha Eli u mu vhudza zwo iteaho.

¹⁵ Eli o vha o no vha na miṅwaha ya 98 nahone o pofula tshoṱhe.

¹⁶ Uḽa munna a vhudza Eli a ri, “Ndi kha ḓi bva u swika, ndi bva tshivhindini tsha nndwa, ndo shavha hone ṋamusi ḽino.” Eli a mu vhudzisa a ri, “Ho iteani ṅwananga?”

¹⁷ Uḽa muḓinḓa a fhindula a ri, “Vhaisraele vho pandamedzwa nga Vhafilista, ho tshinyala vhanzhi, na vhana vhavho vhavhili Hofuni na Finiasi vho vhulawa, na mbulungelo ya Mudzimu yo thubiwa.”

¹⁸ Uyo munna a ri u bula mbulungelo ya Mudzimu, Eli a mbo wa nga tshitiko e tshidzuloni tshawe tsini ha khoro. A vunḓea mutsinga a fa, ngauri o vha o kalaha nahone e na muvhili. O vha e murangaphanḓa wa Israele miṅwaha ya 40.

Lufu lwa tshilikadzi ya Finiasi

¹⁹ Musadzi wa Finiasi ṅwana wa Eli o vha a songo takala muvhili, e tsini na u vhofholowa. Musi a tshi pfa mafhungo a u ri mbulungelo ya Mudzimu yo thubiwa na uri khotsi a munna wawe na munna wawe vho fa, a farwa nga maṱungu a vhudzadze a mbo ḓi vhofholowa, a ṋoka.

²⁰ Musi a tshi khou fa, vhasadzi vhe vha vha vha tshi khou mu bebisa vha ri, “Ni songo ṱovhowa, no beba mutuka.” Hone ene ho ngo vhuya a fhindula kana a zwi londa.

²¹ 21 Mutukana uyo a ri u pfi Ikhabodo (Vhugala-vhu-ngafhi?), a ri, “Vhugala ha Mudzimu ho pfuluwa Israele,” ngauri ho thubiwa mbulungelo ya Mudzimu, ha fa khotsi a munna wawe na munna wawe.

²² Ndi zwe a ri, “Vhugala ha Mudzimu ho pfuluwa Israele, ngauri mbulungelo ya Mudzimu yo thubiwa.”