1 SAMUELE 30 - BIVHILI KHETHWA Mafhungo Madifha

Dafita a tshi lifhedzela Vhaamaleke

¹ Dafita na vhanna vhe a vha e navho vha swika Tsikilaga nga ḓuvha ḽa vhuraru. Zwino a wana Vhaamaleke vho ṱangula Negeve na Tsikilaga. Vho vha vho tshoṱhela na muḓi wa Tsikilaga vha u fhisa,

² vha thuba vhasadzi na vhoṱhe vhe vha vha vhe muḓini, vhahulwane na vhaṱuku. A vho ngo vhulaha na muthihi, vho tou thuba vhoṱhe musi vha tshi ṱuwa.

³ Musi Dafita na vhanna vhe a vha e navho vha tshi swika Tsikilaga, vha wana wo fhiswa nga mulilo, vhasadzi vhavho na vhana vhavho vha vhatuka na vha vhasidzana vho thubiwa.

⁴ Dafita na vhanna vhe a vha e navho vha lila vha tou ṱavha mukosi u swika vha tshi kulea nungo vha si tsha kona u lila.

⁵ Vhasadzi vha Dafita vhavhili na vhone vho vha vho thubiwa, Ahinuamu a no bva Jesriele na Abigaili, tshilikadzi ya Nabali wa Kharamele.

⁶ Dafita o vha e khomboni khulu ngauri vhanna vhe a vha e navho vho vha vha tshi vho amba ḽa u mu kanḓa nga matombo, nga u dinalea vha tshi humbula vhana vhavho. Hone Dafita a wana nungo kha Muṋe washu Mudzimu wawe.

⁷ Ndi hone Dafita a tshi amba na tshifhe Abiathara ṅwana wa Ahimelekhe a ri, “Nga vha nnḓisele luvhemba lwa u pakata.” Abiathara a mu ḓisela lwone.

⁸ Dafita a vhudzisa Muṋe washu a ri, “Ndi tevhele mmbi iyi? Ndi ḓo i fara?” Muṋe washu a fhindula a ri, “Vha tevhele. Vhukumakuma u ḓo vha fara wa lamukisa mathubwa.”

⁹ Dafita na vhanna vha 600 vhe vha vha vhe nae vha swika Pharani ya Besoro, vhaṅwe vha sala hone,

¹⁰ ngauri vhaṅwe vhanna vha 200 vho vha vho netesa vha sa koni u pfuka phara. Hone Dafita na vhanna vha 400 vha fhirela phanḓa.

¹¹ Vha ṱangana na muṅwe Muegipita ḓakani, vha mu ḓisa ha Dafita. Vha mu ṋea zwiḽiwa na maḓi a u nwa,

¹² vha mu ṋea na tshipiḓa tsha khekhe ya mpale wa mahuyu na khekhe mbili dza mpale wa nḓirivhe. Muthu uyo a ḽa a pfa o dzivhuluwa, ngauri o vha o fhedza maḓuvha mararu na vhusiku hao a songo ḽa zwiḽiwa, a songo nwa maḓi.

¹³ Dafita a mu vhudzisa a ri, “Muṋe waṋu ndi nnyi, ni bva ngafhi?” A fhindula a ri, “Nṋe ndi Muegipita, ndi phuli ya muṅwe Muamaleke. Muṋe wanga o nṱutshela ndi tshi khou lwala, zwino o no vha maḓuvha mararu.

¹⁴ Ro yo ṱangula Negeve ḽa Vhakherethe na shango ḽa Juda na Negeve ḽa Khalebe, ra fhisa Tsikilaga.”

¹⁵ Dafita a mu vhudzisa a ri, “Ni nga ntsumbedza tshigwada itsho tsha vhaṱanguli?” Munna uyo a fhindula a ri, “Nga vha nnyanele zwi tshi pfiwa nga Mudzimu uri a vha nga mmbulahi kana vha nkumedza muṋe wanga, ndi hone ndi tshi ḓo vha sumbedza vhone.”

¹⁶ Ndi hone a tshi sumbedza Dafita nḓila vha fhirela phanḓa, vha vha wana vho balangana na shango, vha tshi khou ḽa, vha tshi khou nwa, vha tshi khou ḓiphiṋa nge vha vha vhe na zwinzhi zwe vha ṱangula shangoni ḽa Vhafilista na ḽa Juda.

¹⁷ Dafita a lwa navho u bva nga lufhimavhaeni u swika nga ḽa matshelo nga madekwana, ha si vhe na muthihi wavho we a ponyoka, vhe vha shavha ndi vhaṱhannga vha 400 vhe vha namela dzigamela.

¹⁸ Dafita a dzhiulula zwoṱhe zwe Vhaamaleke vha vha vho dzhia, khathihi na vhasadzi vhawe vhavhili.

¹⁹ Ho vha hu si na tshi siho. Dafita o dzhiulula zwoṱhe a vhuya nazwo: vhathu vhahulwane na vhaṱuku, vhatukana na vhasidzana, zwe zwa vha zwo ṱangulwa na zwiṅwe zwoṱhe zwe vha vha vho dzhia.

²⁰ Dafita a dzhiulula masambi oṱhe a nngu na a kholomo, vhanna vhe a vha e navho vha zwi khada zwi phanḓa ha zwiṅwe zwifuwo, vha tshi ri, “Hezwi ndi zwo thubwaho nga Dafita.”

Dafita a tshi kaidza tshiṱalula

²¹ Ndi hone Dafita a tshi swika fhaḽa kha vhaḽa vhanna vha 200 vhe vha vha vho netesa vha si tsha kona u mu tevhela, vhe vha sala Pharani ya Besoro. Vha ḓa vha ṱanganedza Dafita na vhathu vhe a vha e navho. Musi Dafita na vhanna vhe a vha e navho vha tshi swika, Dafita a ya a vha resha nga dakalo.

²² Hone vhanna vhoṱhe vhavhi na vha sa ḓivhalei kha vhe vha vha vhe na Dafita vha ri, “Ri nga si kovhekane navho zwo ṱangulwaho zwe ra zwi dzhiulula, hufha vha songo ya na riṋe; vha nga tou dzhia vhasadzi vhavho na vhana vha ḓiṱutshele!”

²³ Huno Dafita a fhindula a ri, “A si zwone vha hashu, ni songo ita hezwo nga zwe Muṋe washu a ri ṋea. O ri tsireledza, mmbi dze dza lwa na riṋe a dzi kumedza zwanḓani zwashu.

²⁴ Ndi nnyi ane a nga pfesesa zwine na amba? Na kathihi! Mukovhe wa vhanna vho salaho na thundu wo fanela u eḓana na wa vhe vha ya nndwani. Vhoṱhe vha ḓo kovhelwa zwi eḓanaho.”

²⁵ Izwo Dafita a zwi ita mulayo na ndayo ya Vhaisraele u bva musi wonoyo, na ṋamusi.

²⁶ Musi Dafita a tshi swika Tsikilaga, zwiṅwe zwe zwa ṱangulwa a zwi rumela ha vhahulwane vha Juda, vhe vha vha vhe khonani dzawe, a ri, “Tshifhiwa tshaṋu ngetsho tshi no bva kha zwe ra ṱangula maswina a Muṋe washu.”

²⁷ A zwi isa kha vha Bethele na Ramotho Negeve na Jathiri,

²⁸ na kha vha Aruere na Sifimotho na Eshthemua,

²⁹ na Rakhala, na ḓorobo dza Vhajeramiele na Vhakeni,

³⁰ na vha re Horoma na Khorashani na Athakha

³¹ na Hebroni, na kha vha re huṅwe hoṱhe he Dafita na vhanna vhe a vha e navho vha vhuya vha tendeleka hone.