1 SAMUELE 3 - BIVHILI KHETHWA Mafhungo Madifha

Muṋe washu a tshi vhidza Samuele

¹ Mutukana Samuele o shumela Muṋe washu a tshi londolwa nga Eli. Misi iyo ipfi ḽa Muṋe washu ḽo vha ḽi sa anzeli u pfala, na mabono o vha a si manzhi.

² Maṱo a Eli o vha a sa tsha vhona zwavhuḓi. Muṅwe musi nga maḓautsha Eli a vha o ḓilalela vhulaloni hawe.

³ Luvhone lwa Mudzimu lwo vha lu sa athu dzima. Samuele ene o vha o eḓela thembeleni ya Muṋe washu he ha vha hu na mbulungelo ya mulanga ya Mudzimu.

⁴ Ndi hone Muṋe washu a tshi vhidza Samuele. Samuele a fhindula a ri, “Ndi fhano!”

⁵ Samuele a gidimela ha Eli a ri, “Ndi fhano, ndo pfa vha tshi mmbidza.” Huno Eli a ri, “A tho ngo ni vhidza, humani ni yo eḓela.” Samuele a huma a yo eḓela.

⁶ Muṋe washu a dovha a vhidza Samuele, a vuwa a ya ha Eli a ri, “Ndi fhano, ndo pfa vha tshi mmbidza.” Huno Eli a ri, “Ṅwananga, a tho ngo ni vhidza, humani ni yo eḓela.”

⁷ Huno Samuele o vha a sa athu ḓivha Muṋe washu, o vha a sa athu dzumbululelwa ipfi ḽa Muṋe washu.

⁸ Muṋe washu a vhidza Samuele lwa vhuraru, Samuele a vuwa a ya ha Eli a ri, “Ndi fhano, ndo pfa vha tshi mmbidza.” Ndi hone Eli a tshi ṱalukanya uri ndi Muṋe washu a khou vhidzaho Samuele.

⁹ A mu vhudza a ri, “Ṱuwani ni yo eḓela, arali na pfa a tshi dovha u ni vhidza, ni fhindule ni ri, ‘Muṋe washu, amba, muḓinḓa wau u khou thetshelesa!’ ” Samuele a ṱuwa a yo lala vhulaloni hawe.

¹⁰ Muṋe washu a ḓa a ima henefho, a vhidzelela u ḓi nga zwiḽa u rangani a ri, “Samuele, Samuele!” Samuele a fhindula a ri, “Muṋe washu amba, muḓinḓa wau u khou thetshelesa!”

¹¹ Muṋe washu a amba na Samuele a ri, “Ndi ṱoḓa u ita tshiṅwe tshithu kha ḽa Israele, tshi ḓo ita uri nḓevhe dza muṅwe na muṅwe ane a zwi pfa dzi lume.

¹² Musi wonoyo ndi ḓo khunyeledza zwoṱhe zwe nda vhudza Eli ndi tshi sanda muṱa wawe, u bva mathomoni u swika magumoni.

¹³ Ndo no ḓi mu vhudza uri ndi ḓo rwa muṱa wawe lini na lini nga mulandu wa vhuvhi he a vha a tshi vhu ḓivha, vhana vhawe vho nnyefula a si vha kaidze.

¹⁴ Ndi zwe nda anela nnḓu ya Eli nda ri, ‘Mulandu wa nnḓu ya Eli u nga si pfumelwe nga tshiṱhavhelo kana nga nduvho.’ ”

¹⁵ Samuele a yo eḓela ḽa vhuya ḽa tsha a konou vula miṋango ya nnḓu ya Muṋe washu. O vha a tshi ofha u vhudza Eli zwa bono ḽawe.

¹⁶ Huno Eli a mu vhidza a ri, “Samuele ṅwananga.” Samuele a fhindula a ri, “Ndi fhano.”

¹⁷ Eli a mu vhudzisa a ri, “Muṋe washu o ni vhudzani? Ni songo nnzumbela. Ngavhe Mudzimu a tshi ni pfisa vhuṱungu a dovha arali na nnzumbela na tshithihi tsha zwe a ni vhudza.”

¹⁸ Ndi hone Samuele a tshi mu vhudza zwoṱhe, a si vhuye a mu dzumbela na tshithihi. Eli a ri, “Ndi Muṋe washu, litshani a ite zwine a vhona zwi zwone.”

¹⁹ Muṋe washu o ḓi vha na Samuele musi a tshi aluwa, ho ngo vhuya a litsha ipfi ḽawe na ḽithihi ḽi tshi wela fhasi.

²⁰ Ḽoṱhe ḽa Israele u bva Dani u swika Bierisheba ḽa zwi vhona uri vhukumakuma Samuele ndi muporofita wa Muṋe washu.

²¹ Muṋe washu a ḓi vhonala Shilo, a ḓidzumbululela Samuele henefho nga ipfi ḽawe.