1 SAMUELE 26 - BIVHILI KHETHWA Mafhungo Madifha

Dafita a tshi dovha u khathutshela Saulo

¹ Vhazifi vha ya ha Saulo muḓini wa Gibia vha ri, “Dafita o dzumbama tshikwarani tsha Hakhila u livhana na soga ḽa Judia.”

² Saulo a mbo tsela phangani ya Zifi, e na vhanna vha 3 000 vhe a vha nanga kha Vhaisraele, u yo ṱoḓa Dafita henefho.

³ Saulo a ṱoka mishasha yawe tsini ha gondo tshikwarani tsha Hakhila u livhana na soga ḽa Judia, hone Dafita o vha a tshi kha ḓi vha henefho phangani. A tshi vhona uri Saulo o mu tevhela henefho,

⁴ a ruma dziṱholi, a pfa uri vhukumakuma Saulo o swika.

⁵ Ndi hone Dafita a tshi takuwa a livha fhethu he Saulo a ṱoka mishasha. Dafita a vhona he ha lala Saulo na Abinere ṅwana wa Nere a re mulangammbi. Saulo o vha o lala ngomu mishashani, o tangwa nga mmbi.

⁶ Ndi hone Dafita a tshi vhudzisa Ahimelekhe wa Muhithi na Abishai ṅwana wa Tseruya, murathu wa Juaba, a ri, “Ndi nnyi ane a ḓo ṱuwa na nṋe ra dzhena mishashani ra ya ha Saulo?” Abishai a fhindula a ri, “Nṋe ndi ḓo ya navho.”

⁷ Ndi hone Dafita na Abishai vha tshi ya vhusiku vha swika hune mmbi ya vha hone, vha wana Saulo henefho o lala ngomu mishashani, pfumo ḽawe ḽo ṱhavha fhasi tsini na ṱhoho yawe. Abinere na vhahali vho vha vho lala vho mu tanga.

⁸ Abishai a amba na Dafita a ri, “Ṋamusi Mudzimu o kumedza swina ḽavho zwanḓani zwavho. Zwino nga vha litshe ndi mu runge luthihi fhedzi nga pfumo ḽawe ndi mu nambatedze na fhasi, ndi nga si mu runge luvhili.”

⁹ Huno Dafita a amba na Abishai a ri, “Ni songo mu vhulaha! Ndi nnyi ane a nga isa tshanḓa kha mutiwa wa Muṋe washu a si ovhe mulandu?”

¹⁰ Dafita a isa phanḓa a ri, “Ndi ana nga Muṋe washu ndi ri, Muṋe washu Ene muṋe u ḓo mu vhulaha, tshifhinga tshawe tshi nga ḓi swika a dzama kana a ya nndwani a lovha.

¹¹ Hone Muṋe washu u a nnzivhisa ndi tshi isa tshanḓa kha mutiwa wawe. Zwine na nga ita dzhiani pfumo na mvuvhelo ya maḓi zwi re tsini na ṱhoho yawe, ri ṱuwe.”

¹² Ndi hone Dafita a tshi dzhia pfumo na mvuvhelo ya maḓi zwi re tsini na ṱhoho ya Saulo, vha ṱuwa. A hu na we a zwi vhona kana a zwi ḓivha, na we a vhuya a vuwa a hu na. Vhoṱhe vho vha vho fa nga khofhe ngauri Muṋe washu o vha o vha eḓedza khofhe khulu.

¹³ Dafita a wetshela seli na luḽa lwa govha, a ima nṱha ha tshikwara kulenyana, vhukati havho hú na tshikhala tsho aṱamaho.

¹⁴ Dafita a vhidzelela mmbi na Abinere ṅwana wa Nere a ri, “Abinere, ni ḓo mphindula naa?” Abinere a fhindula a ri, “Ndi iwe nnyi ane wa khou vhidzelela khosi?”

¹⁵ Dafita a ri, “Inwi ni munna a thi ri? Ane a nga inwi kha ḽa Israele ndi nnyi? Ndi mini ni songo linda khosi muṋe waṋu? Muṅwe muthu o vha o ḓa u lozwa khosi muṋe waṋu.

¹⁶ Zwe na ita a si zwavhuḓi. Ndi ana nga Muṋe washu a tshilaho ndi ri, inwi na vhanna vhane na vha navho no fanela u vhulawa, nge na si linde muṋe waṋu mutiwa wa Muṋe washu. Edzonu sedza, pfumo ḽa khosi na mvuvhelo ya maḓi zwe zwa vha zwi dziṱhohoni dzavho zwi ngafhi?”

¹⁷ Saulo a ḓivha ipfi ḽa Dafita a ri, “Dafita mukwasha wanga, ndi ipfi ḽaṋu iḽo?” Dafita a fhindula a ri, “Thovhele muṋe wanga, ndi ipfi ḽanga.”

¹⁸ Dafita a dovha a ri, “Ndi mini muṋe wanga vha tshi kha ḓi mpandamedza? Ndo itani? Ndo tshinyani?

¹⁹ Zwino thovhele nga vha thetshelese maipfi anga. Arali e Muṋe washu we a vha ṱuṱuwedza uri vha lwe na nṋe, khezwi vha sa mu pfumelwi nga nduvho i no nukhelela. Huno arali zwo itwa nga vhathu, nga vha teketelwe phanḓa ha Muṋe washu! Vho nthatha uri ndi si wane mukovhe shangoni ḽa Muṋe washu, vha ri, ‘Ṱuwa u yo shumela midzimu isili.’

²⁰ Zwino vha songo litsha malofha anga a tshi shulutshela fhasi kule na Muṋe washu. Khosi ya Israele yo bva i tshi yo ṱoḓa dzedze zwaḽo, zwa nga muthu a tshi zwima khanga thavhani.”

²¹ Saulo a fhindula a ri, “Ndo tshinya. Dafita mukwasha wanga, vhuyani! Ndi nga si dovhe nda linga u ni vhulaha, ngauri ṋamusi no vhona vhutshilo hanga vhu ha mutengo muhulu. Vhukumakuma ndo vha tsilu, ndo khakha zwihulu.”

²² Dafita a fhindula a ri, “Pfumo ḽa thovhele ngeḽi. Nga vha rume muṅwe wa vhaṱhannga vhavho a wetshele ngeno a ḓe a ḽi dzhie.

²³ Muṋe washu u pfufha muṅwe na muṅwe ane a ita zwi re zwone, a fulufhedzea. Muṋe washu ṋamusi o vha kumedza zwanḓani zwanga, hone a tho ngo kona u isa tshanḓa tshanga kha mutiwa wa Muṋe washu.

²⁴ Vhunga ndo litsha u vha vhulaha ṋamusi, ngavhe na nṋe Muṋe washu a tshi ntsireledza nda si fe, a ntshidza khomboni dzoṱhe.”

²⁵ Ndi hone Saulo a tshi amba na Dafita a ri, “Dafita mukwasha wanga, ngavhe ni tshi vha na mashudu, ni ḓo ita zwithu zwihulu, vhukumakuma zwi ḓo ni nakela.” Ndi hone Dafita a tshi ḓiṱutshela, Saulo a vhuelela hayani.