1 SAMUELE 24 - BIVHILI KHETHWA Mafhungo Madifha

Dafita a tshi khathutshela Saulo

¹ Musi Saulo a tshi vhuya u pandamedza Vhafilista a vhudzwa upfi, “Dafita u phangani ya Engedi.”

² Saulo a dzhia vhanna vha 3 000 vho tou nangiwa kha Vhaisraele vhoṱhe, a bva a yo ṱoḓa Dafita na vhanna vhe a vha e navho tsini ha matombo a Mbudzi dza Ḓaka.

³ Saulo a swika mapakoni a u valela nngu tsini ha nḓila, henefho ho vha hu na bako, Saulo a dzhena khaḽo uri a ḓithuse. Matsina Dafita na vhanna vhe a vha e navho vho vha vhe bvungwi henefho bakoni ḽeneḽo.

⁴ Vhanna avho vha ri, “Heḽi ndi ḽone ḓuvha ḽiḽa ḽe Muṋe washu a ḽi amba zwiḽa a tshi vha vhudza a ri, ‘Swina ḽau ndi ḓo ḽi kumedza zwanḓani zwau wa ita zwine wa funa ngaḽo.’ ” Ndi hone Dafita a tshi ḓa nga u tou ṋengeledza, a tshea khuḓa ya phuraphura ya Saulo.

⁵ Ngavhuya luvalo lwa Dafita lwa thoma u mu dina nge a tshea khuḓa ya phuraphura ya Saulo.

⁶ Dafita a amba na vhanna vhe a vha e navho a ri, “Ngavhe Muṋe washu a sa tendi ndi tshi ita muṋe wanga zwithu zwa u ralo, hufha e mutiwa wa Muṋe washu. Ndi songo vhuya nda isa tshanḓa khae, ndi mutiwa wa Muṋe washu.”

⁷ Nga maipfi eneo Dafita a kaidza vhanna vhe a vha e navho, a si vha tendele vha tshi lwa na Saulo. Saulo a ṱuwa afho bakoni a fara nḓila yawe.

⁸ Ndi hone Dafita a tshi bva bakoni, a vhidzelela Saulo a ri, “Thovhele muṋe wanga!” Saulo a rembuluwa a tshi sedza, Dafita a wa nga tshifhaṱuwo a luvha.

⁹ Dafita a vhudzisa Saulo a ri, “Ndi mini vha tshi thetshelesa vhathu vha tshi ri, ‘Dafita u ṱoḓa u vha huvhadza’?

¹⁰ Ṋamusi ḽino vho zwi vhona nga avho maṱo zwe Muṋe washu a vha kumedza zwanḓani zwanga ngei bakoni. Ndo vha ndo humbula u vha vhulaha, hone nda litsha u vha vhulaha, nda ri, ‘Ndi nga si ise tshanḓa tshanga kha muṋe wanga, ngauri ndi mutiwa wa Muṋe washu.’

¹¹ Makhulu wanga, nga vha sedze nandi, nga vha sedze tshipiḓa hetshi tsha phuraphura yavho tshe nda tshi fara! Ndo tshea khuḓa ya phuraphura yavho ndi si vha vhulahe. Zwino nga vha pfesese uri nṋe a thi na mulandu wa u vha khakhela kana u vha shandukela. Nṋe a tho ngo vha khakhela, hone vhone vha khou nndonda uri vha mmbulahe.

¹² Ngavhe Muṋe washu a tshi haṱula a vhona a re na mulandu kha nṋe na vhone. Nahone ngavhe Muṋe washu a tshi nndifhedzela zwe vhone vha nkhakhela, hone tshanḓa tshanga tshi nga si vhuye tsha vha kwama.

¹³ Vhunga murero wa vha kale u tshi ri, ‘Vhuvhi vhu itwa nga vhavhi,’ zwenezwo tshanḓa tshanga tshi nga si vhuye tsha vha kwama.

¹⁴ Khosi ya Israele yo vha i tshi khou londa nnyi? Vha khou pandamedza nnyi? Mmbwa yo faho? Dzedze?

¹⁵ Ngavhe Muṋe washu a tshi vha muhaṱuli washu, a vhona a re na mulandu kha riṋe. Ngavhe a tshi sedza mafhungo anga a nndamulela, ngavhe a tshi sumbedza uri a thi na mulandu, nga u mponyokisa zwanḓani zwavho.”

¹⁶ Musi Dafita a tshi fhedza u amba, Saulo a ri, “Dafita mukwasha wanga, ndi ipfi ḽaṋu iḽo?” Saulo a vusa tshililo lwe a tou ṱavha mukosi.

¹⁷ Saulo a ri, “Ni ita zwi re zwone u fhira nṋe. No nnyitela vhuthu, ngeno nṋe ndo ni ita zwo vhifhaho.

¹⁸ Zwenezwino ni kha ḓi bva u mmbudza zwivhuya zwe na nnyita, Muṋe washu o vha o nkumedza zwanḓani zwaṋu ni si mmbulahe.

¹⁹ Arali munna a wana a re swina ḽawe, u a mu litsha a ṱuwa a songo mu huvhadza naa? Ngavhe Muṋe washu a tshi ni pfufha zwavhuḓi nge na nnyitela vhuthu ṋamusi.

²⁰ Vhukumakuma ndi a zwi ḓivha uri ni ḓo vha khosi, na uri muvhuso wa Israele u ḓo khwaṱha nga inwi.

²¹ Zwino nnyaneleni nga Muṋe washu uri a ni nga vhulahi vhaḓuhulu vhanga uri dzina ḽanga na ḽa muṱa wanga ḽi si hangwiwe tshoṱhe.”

²² Ndi hone Dafita a tshi anela Saulo. Saulo a humela hayani, hone Dafita na vhanna vhe a vha e navho vha humela vhudzumbamoni havho.