1 SAMUELE 23 - BIVHILI KHETHWA Mafhungo Madifha

Dafita a tshi tshidza vhathu vha Keila

¹ Dafita a vhudzwa upfi, “Vhafilista vha khou lwa na vhathu vha Keila nahone vha khou tswa mavhele ane a kha ḓi bva u kaṋiwa.”

² Dafita a vhudzisa Muṋe washu a ri, “Ndi ye ndi yo lwa na Vhafilista naa?” Muṋe washu a fhindula a ri, “Tshimbila u lwe na Vhafilista u lamukise muḓi wa Keila.”

³ Huno vhanna vhe vha vha vhe na Dafita vha mu vhudza vha ri, “Hufha fhano kha ḽa Juda ri tshi ofha. Zwino ri tshi ḓo ya Keila ra lwa na Vhafilista zwi ḓo tou ngani?”

⁴ Dafita a dovha a vhudzisa Muṋe washu, Muṋe washu a mu fhindula a ri, “Tsela Keila; ndi ḓo kumedza Vhafilista zwanḓani zwau.”

⁵ Ndi hone Dafita na vhanna vhe a vha e navho vha tshi ya Keila, vha lwa na Vhafilista, vha dzhia thakha yavho vha ṱuwa nayo. O vhulaha Vhafilista vhanzhi, u ralo ha vha u tshidza vhathu vha Keila.

⁶ Ndi uri Abiathara ṅwana wa Ahimelekhe a tshi shavhela ha Dafita muḓini wa Keila, o ṱuwa na luvhemba lwa u pakata, lwa u vhudzisa Muṋe washu ngalwo.

Saulo a tshi tevhela Dafita

⁷ Saulo a vhudzwa upfi Dafita o ya Keila, ene a ri, “Mudzimu o mu kumedza zwanḓani zwanga; Dafita o ḓihoṋela dzhele nge a dzhena muḓini u re na dzigethe na matsimbi.”

⁸ Saulo a ramba mmbi yawe yoṱhe uri i bve pfumo, i tsele Keila, i govhele Dafita na vhanna vhe a vha e navho.

⁹ Musi Dafita a tshi pfa uri Saulo u khou mu itela tshimbevha, a amba na tshifhe Abiathara a ri, “Nga vha ḓise luvhemba lwa u pakata.”

¹⁰ Dafita a ri, “Yawee Muṋe washu Mudzimu wa Israele, nṋe muḓinḓa wau ndo zwi pfa uri Saulo u khou dzudzanya u ḓa Keila, uri a lozwe uyo muḓi nga mulandu wanga.

¹¹ Vhadzulapo vha Keila vha ḓo nkumedza ene naa? Vhukumakuma Saulo u ḓo ḓa sa zwe nda pfa? Yawee Muṋe washu Mudzimu wa Israele, mmbudze.” Muṋe washu a fhindula a ri, “Saulo u ḓo ḓa.”

¹² Dafita a dovha a vhudzisa a ri, “Vhadzulapo vha Keila vha ḓo dzhia nṋe na vhanna vhane nda vha navho vha ri kumedza Saulo naa?” Muṋe washu a fhindula a ri, “Vha ḓo ni kumedza Saulo.”

¹³ Ndi hone Dafita na vhanna vhe a vha e navho vhane vha nga vha 600 vha tshi ṱuwa Keila vha ḓi fhirela phanḓa vha tshi bva fhano vha tshi dzhena fhano. Musi Saulo a tshi vhudzwa upfi Dafita o shavha Keila, a si tsha mu tevhela.

Dafita e phangani ya Zifi

¹⁴ Dafita a dzula vhudzumbamoni ha phangani na mivhunduni ya phanga ya Zifi. Saulo a mu ṱoḓa misi yoṱhe, hone Mudzimu a si kumedze Dafita zwanḓani zwa Saulo.

¹⁵ Musi Dafita e Horeshe phangani ya Zifi, a pfa uri Saulo u khou ḓi ṱoḓa u mu vhulaha.

Dafita na Jonathani vha tshi vusulusa mulanga wavho

¹⁶ Jonathani ṅwana wa Saulo a ya ha Dafita muḓini wa Horeshe a mu khuthadza uri a fulufhele Mudzimu.

¹⁷ Jonathani a ri, “Ni songo ofha tshithu. Khotsi anga Saulo vha nga si vhuye vha ni ita tshithu. Ni ḓo vha khosi ya Israele, nṋe ndi ḓo tou vha tshanḓa tshaṋu. Na khotsi anga Saulo vha a zwi ḓivha.”

¹⁸ Vhuvhili havho vha vhofha mulanga phanḓa ha Muṋe washu. Ndi hone Jonathani a tshi humela hayani, Dafita a sala Horeshe.

¹⁹ Vhaṅwe vhathu vha no bva Zifi vha ya ha Saulo muḓini wa Gibia vha ri, “Dafita o dzumbama shangoni ḽashu ngei Horeshe thavhani ya Hakhila, tshipembe ha soga ḽa Judia.

²⁰ Zwino thovhele nga vha ḓe shangoni ḽashu zwenezwo vha tshi zwi takalela, riṋe ri ḓo mu fara ra mu kumedza thovhele.”

²¹ Saulo a fhindula a ri, “Ngavhe Muṋe washu a tshi ni shudufhadza nge na nnyitela vhuthu.

²² Tshimbilani ni dovhe ni vhe na ngoho. Wanani uri Dafita u anzela u ya ngafhi na uri ndi nnyi we a mu vhona henefho. Ndi pfa upfi ho ngo thanya zwone.

²³ Wanani hoṱhe hune a dzumbama hone, ni konou vhuya na mafhungo a vhukuma. Ndi hone ndi tshi ḓo ṱuwa na inwi, arali e shangoni ḽeneḽo, ndi ḓo mu londa kha mitupo yoṱhe ya Juda.”

²⁴ Ndi hone vha tshi takuwa vha livha Zifi vha ranga Saulo phanḓa. Zwino Dafita na vhanna vhe a vha e navho vho vha vhe phangani ya Maoni vhukati ha soga, tshipembe ha phanga ya Judia.

²⁵ Saulo na vhanna vhawe vha thoma u ṱoḓa, musi Dafita a tshi zwi pfa, a tsela Tomboni, a dzula phangani ya Maoni. Saulo a tshi zwi pfa, a londa Dafita phangani ya Maoni.

²⁶ Saulo a vha a tshi khou tshimbila kha ḽino bama, Dafita na vhanna vhe a vha e navho vhone vha tshi khou tshimbila kha ḽiḽa, vha tshi tou gidima uri vha shavhe Saulo. Hezwi Saulo na mmbi yawe vha tshi khou govhela Dafita na vhanna vhe a vha e navho uri vha vha fare,

²⁷ ha ḓa muḓinḓa ha Saulo a ri, “Nga vha ṱavhanye vha ḓe! Vhafilista vha khou tshoṱhela shango.”

²⁸ Zwenezwo Saulo a litsha u londa Dafita, a yo ṱangana na Vhafilista. Ndi zwine fhethu afho ha pfi Luwa lwa Phandakano.

²⁹ Dafita a ṱuwa a gonya vhudzumbamoni ha Engedi a dzula hone.