1 SAMUELE 22 - BIVHILI KHETHWA Mafhungo Madifha

Dafita e Adulamu na Mitsipha

¹ Dafita a ṱuwa Gathi a shavhela bakoni ḽa Adulamu. Musi vhakomana vhawe na vha nnḓu ya khotsi awe vha tshi zwi pfa, vha ya khae henefho.

² Vhoṱhe vhe vha vha vho kandeledzwa kana vhe na milandu kana vha songo rudza mbilu vha kuvhangana khae, ene a vha murangaphanḓa wavho. O vha na vhanna vhane vha nga swika 400.

³ U bva henefho Dafita a ya Mitsipha kha ḽa Muaba, a amba na khosi ya Muaba a ri, “Vha nga litsha khotsi anga na mme anga vha ḓa vha dzula navho ndi vhuye ndi ḓivhe zwine Mudzimu a ḓo nnyitela?”

⁴ Ndi hone a tshi vha sia na khosi ya Muaba, vha dzula nayo misi yoṱhe Dafita a tshee o dzumbama bakoni.

⁵ Huno muporofita Gadi a amba na Dafita a ri, “Ni songo dzula bakoni. Iyani shangoni ḽa Juda.” Ndi hone Dafita a tshi ṱuwa a ya maṱakani a Herethe.

Saulo a tshi vhulaha vhotshifhe vha Nobo

⁶ Zwino Saulo a zwi pfa uri Dafita na vhanna vhe a vha e navho vho wanala. Saulo o vha o dzula fhasi ha muri wa muṱamarisiki, ó fara pfumo, muvhunduni u re Gibia, e na magota awe.

⁷ Saulo a amba navho a ri, “Inwi vhanna vha Benyamini, thetshelesani! Ṅwana wa Isai a nga ni ṋea noṱhe masimu na masimu a minḓirivhe naa? Noṱhe a nga ni ita vhalangammbi na vhalangagomane naa?

⁸ Kani ndi zwone zwe noṱhe na nnyitela tshimbevha? A hu na na muthihi ane a mmbudza musi ṅwana wanga a tshi vhofha mulanga na ṅwana wa Isai. A hu na na muthihi waṋu ane a mpfela vhuṱungu kana a mmbudza uri ṅwana wanga o ṱuṱuwedza gota ḽanga uri ḽi nndalele, sa zwine a zwi ita ṋamusi.”

⁹ Hone Doege wa Muedomo o vha o ima henefho na magota a Saulo, a ri, “Ndo vhona ṅwana wa Isai a tshi ḓa kha Ahimelekhe ṅwana wa Ahitubu muḓini wa Nobo.

¹⁰ Ahimelekhe a mu vhudzisela kha Muṋe washu, a ita na u mu ṋea mbuvha na banga ḽa Goliada wa Mufilista.”

¹¹ Ndi hone khosi i tshi vhidzisa tshifhe Ahimelekhe ṅwana wa Ahitubu na muṱa woṱhe wa khotsi awe, vhe vha vha vhe vhotshifhe henefho Nobo, vhoṱhe vha ḓa ha khosi.

¹² Saulo a ri, “Iwe ṅwana wa Ahitubu, zwino thetshelesa.” Ahimelekhe a fhindula a ri, “Ndi zwone muṋe wanga.”

¹³ Saulo a mu vhudza a ri, “Ndi mini u tshi nnyitela tshimbevha, iwe na ṅwana wa Isai, wa mu ṋea zwiḽiwa na banga wa ita na u mu vhudzisela ha Muṋe washu, a ntshandukela, a nndalela, sa zwine a khou zwi ita ṋamusi?”

¹⁴ Ahimelekhe a fhindula khosi a ri, “Ndi nnyi wa magota avho oṱhe ane a fulufhedzea unga Dafita mukwasha wa thovhele, muhulwane wa vhane vha vha linda, ane a huliswa nga nnḓu yavho?

¹⁵ Kani-ha iḽo ḓuvha ḽo vha ḽi ḽone ḽa u thoma ndi tshi mu vhudzisela ha Mudzimu? A zwo ngo ralo na kathihi! Thovhele vha songo mpomoka kana vha pomoka muṱa wa khotsi anga, ngauri nṋe mafhungo ayo oṱhe a thi a ḓivhi.”

¹⁶ Huno khosi ya ri, “Vhukumakuma u ḓo fa iwe Ahimelekhe, iwe na muṱa wa khotsi au woṱhe.”

¹⁷ Ndi hone khosi i tshi vhudza vhalindi vha re henefho tsini ya ri, “Vhulahani vhotshifhe vha Muṋe washu, ngauri na vhone vho ima na Dafita. Vho zwi ḓivha uri u khou shavha, naho zwo ralo vha si ntsevhe.” Hone magota a khosi a vho ngo tenda u angaladza tshanḓa vha vhulaha vhotshifhe vha Muṋe washu.

¹⁸ Ndi hone khosi i tshi vhudza Doege ya ri, “Iwe u vhulahe vhotshifhe havha.” Doege wa Muedomo a mbo vha vhulaha. Ḓuvha heḽo o vhulaha vhanna vha 85 vhe vha vha vho pakata luvhemba lwa lukhaha.

¹⁹ Saulo a ita na u vhulahisa vhadzulapo vhoṱhe vha muḓi wa Nobo hune ha dzula avho vhotshifhe: vhanna na vhasadzi na vhana na dzitshetshe na kholomo na donngi na nngu.

Abiathara a tshi shavhela ha Dafita

²⁰ Hone Abiathara, ṅwana wa Ahimelekhe ṅwana wa Ahitubu, a ponyoka a shavhela ha Dafita.

²¹ Ene a vhudza Dafita uri Saulo o vhulaha vhotshifhe vha Muṋe washu.

²² Ndi hone Dafita a tshi vhudza Abiathara a ri, “Ḽiḽa ḓuvha musi Doege wa Muedomo e hone, ndo zwi ḓivha uri u ḓo vhudza Saulo. Muṱa wa khotsi aṋu u tshi vhulawa woṱhe ndi mulandu wanga.

²³ Dzulani na nṋe, ni songo ofha tshithu, munna ane a khou ṱoḓa u ni vhulaha u ṱoḓa u vhulaha na nṋe. Ni na nṋe ni ḓo tsireledzea.”