1 SAMUELE 16 - BIVHILI KHETHWA Mafhungo Madifha

Saulo na Dafita (16 – 31) U sumbiwa ha we Mudzimu a dzula o mu ta

¹ Muṋe washu a amba na Samuele a ri, “U ḓo ḽa mbilu nga Saulo u swika lini? Ndo mu landula, a nga si tsha vha khosi ya Israele. Ḓadza luṋanga lwau mapfura u fare lwendo, ndi khou u ruma ha Isai wa Betlehema. Ndo nanga muṅwe wa vhana vhawe vha vhatuka uri a vhe khosi.”

² Huno Samuele a ri, “Ndi ḓo ya hani? Saulo a zwi pfa u ḓo mmbulaha.” Muṋe washu a ri, “Ṱuwa na tholehadzi u swike u ri, ‘Ndo ḓa u ṋekedza Muṋe washu tshiṱhavhelo.’

³ U vhidze Isai a ḓe afho tshiṱhavheloni, ndi ḓo u sumbedza zwine wa fanela u ita. U nnḓodzele ane nda mu sumba.”

⁴ Samuele a ita zwe Muṋe washu a amba. Musi a tshi swika Betlehema, vhahulwane vha muḓi vha tetemela vha tshi mu ṱanganedza. Vha vhudzisa vha ri, “Vha ḓa nga mulalo?”

⁵ Samuele a fhindula a ri, “Ndi ḓa nga mulalo, ndo ḓa u ṋekedza Muṋe washu tshiṱhavhelo. Ḓikumedzeni Mudzimu ri ṱuwe roṱhe ri yo ṋekedza tshiṱhavhelo.” Ndi hone Isai na vhana vhawe a tshi vha kumedza Mudzimu, a ṱuwa navho vha yo ṋekedza tshiṱhavhelo.

⁶ Musi vha tshi swika Samuele a vhona Eliaba, a elekanya a ri, “Vhukumakuma mutiwa wa Muṋe washu ngoyu!”

⁷ Hone Muṋe washu a vhudza Samuele a ri, “U songo sedza tshivhumbeo tshawe na vhulapfu hawe, uyo ndo mu landula. Yahavee ha sedzi zwithu zwine muthu a sedza. Muthu u sedza zwine a zwi vhona nga maṱo, Yahavee u sedza mbilu.”

⁸ Ndi hone Isai a tshi vhidza Abinadaba a ita uri a fhire phanḓa ha Samuele. Hone Samuele a ri, “Muṋe washu na onoyu ho ngo mu nanga.”

⁹ Isai a ita uri hu fhire Shama, hone Samuele a ri, “Muṋe washu na onoyu ho ngo mu nanga.”

¹⁰ Isai o ita uri vhana vhawe vha vhatuka vhaṱanu na vhavhili vha fhire phanḓa ha Samuele, hone Samuele a ḓi mu vhudza a ri, “Muṋe washu ho ngo vha nanga havha.”

¹¹ Ndi hone Samuele a tshi vhudzisa Isai a ri, “Vhana vhavho ndi vhenevha fhedzi?” Isai a fhindula a ri, “Hu kha ḓi vha na phedzi, ene u khou lisa nngu.” Samuele a ri, “Nga vha mu vhidzise, ri nga si ḽe ene a sa athu swika.”

¹² Ndi hone a tshi mu vhidzisa a ḓiswa. O vha e na vala ḽavhuḓi na tshivhumbeo tsho nakaho na maṱo a penyaho. Ndi hone Muṋe washu a tshi ri, “Takuwa u mu ḓodze, ndi onoyo.”

¹³ Ndi hone Samuele a tshi dzhia luṋanga lwa mapfura a mu ḓodza vhakomana vhawe vha tshi zwi vhona. U bva musi wonoyo Muya wa Muṋe washu a thoma u shuma kha Dafita e na maanḓa. Samuele a konou humela Rama.

Dafita a tshi dzula pfamoni ya Saulo

¹⁴ Zwino Muya wa Muṋe washu o vha o ṱutshela Saulo, a vho tambudzwa nga muya wo ruṅwaho nga Muṋe washu.

¹⁵ Vhalanda vha Saulo vha amba nae vha ri, “Ri khou zwi vhona vha tshi ofhiswa nga muya muvhi wo ruṅwaho nga Mudzimu.

¹⁶ Nga vha ri rume muṋe washu, ri yo vha ṱoḓela muthu ane a kona u lidza haripa. Hu ḓo ri musi muya muvhi wo ruṅwaho nga Mudzimu u tshi vha ḓela, a vha lidzela, vha pfa vhe khwiṋe.”

¹⁷ Saulo a amba na vhalanda vhawe a ri, “Wanani muthu ane a kona u lidza zwavhuḓi ni mu ḓise kha nṋe.”

¹⁸ Muṅwe wa vhashumi a vhudzisa a ri, “Ndo vhona ṅwana wa Isai wa Betlehema ane a kona u lidza haripa. Ene u na tshivhindi nahone ndi muhali. Ndi makone wa u amba, u na tshivhumbeo tshavhuḓi. Muṋe washu u nae.”

¹⁹ Ndi hone Saulo a tshi ruma vhaḓinḓa ha Isai a ri, “Nga vha rume ṅwana wavho Dafita a no khou lisa nngu a ḓe.”

²⁰ Ndi hone Isai a tshi dzhia donngi yo hwala vhurotho na mukumba u na waini na mbudzana a ruma ṅwana wawe Dafita a ṱuwa nazwo a zwi isa ha Saulo.

²¹ Dafita a swika ha Saulo a mu shumela. Saulo a takalela Dafita nga maanḓa, a vha muhwali wa zwihali zwa Saulo.

²² Ndi hone Saulo a tshi swikisa ipfi ha Isai ḽi no ri, “Nga vha litshe Dafita a ntshumele, ndi a mu takalela.”

²³ Musi muya wo ruṅwaho nga Mudzimu u tshi ḓela Saulo, Dafita o vha a tshi ḓi dzhia haripa a mu lidzela. Zwenezwo Saulo a dzivhuluwa, a pfa e khwiṋe, muya muvhi wa mu ṱutshela.