1 SAMUELE 14 - BIVHILI KHETHWA Mafhungo Madifha

¹ Muṅwe musi Jonathani ṅwana wa Saulo a vhudza muṱhannga we a vha o mu hwalela zwihali a ri, “Iḓani ri wetshele kha gomane ya Vhafilista.” Hone Jonathani a si vhudze khotsi awe ayo mafhungo.

² Saulo o vha e Migironi masakhani a Gibia, o dzula fhasi ha mugranada. O vha e na vhanna vhane vha nga vha 600.

³ Tshifhe o ambaraho luvhemba lwa u pakata o vha e Ahia, ṅwana wa mukomana wa Ikhabodo, ane a pfi Ahitubu, ṅwana wa Finiasi, ṅwana wa Eli, tshifhe wa Muṋe washu muḓini wa Shilo. Vhanna avho vho vha vha sa ḓivhi uri Jonathani o ṱuwa.

⁴ Ho vha hu na luwa masia oṱhe a phara ye Jonathani a vha a tshi ṱoḓa u fhira khayo uri a swike kha gomane ya Vhafilista, luṅwe lwo vha lu tshi pfi Botsetse, luṅwe lu tshi pfi Sene.

⁵ Luṅwe lwo vha lu thungo ya devhula lwo livhana na Mikhimashi, luṅwe lu thungo ya tshipembe lwo livhana na Geba.

⁶ Jonathani a vhudza muṱhanngana o mu hwalelaho zwihali a ri, “Iḓani ri wetshele mishashani ya mashuvhuru haaḽa. Khamusi Muṋe washu u ḓo ri farisa. A hu na tshine tsha kundisa Muṋe washu u tshidza vhathu, a nga vha tshidza nga vhathu vhanzhi, kana a vha tshidza nga vha si gathi.”

⁷ Muhwali wawe wa zwihali a ri, “Nga vha ite zwoṱhe zwi re mbiluni yavho. Nga vha fhire phanḓa, ndi na vhone nga mbilu yanga yoṱhe.”

⁸ Jonathani a ri, “Zwino iḓani, nga ri wetshele seli ri ye kha havhaḽa vhanna uri vha ri vhone.

⁹ Arali vha amba na riṋe vha ri, ‘Imani henefho ri vhuye ri swike kha inwi,’ ri ḓo ima henefho hune ra vha hone, ra si ye khavho.

¹⁰ Hone arali vha ri, ‘Iḓani ngeno!’ ri ḓo gonya ra ya, ngauri itsho tshi ḓo vha tshone tshiga tsha uri Muṋe washu o vha kumedza zwanḓani zwashu.”

¹¹ Ndi hone vhuvhili havho vha tshi ḓisumbedza vha vhonwa nga Vhafilista. Vhafilista vha ri, “Vhonani! Vhaheberu vho bva milindini ye vha dzumbana khayo.”

¹² Vhanna vha gomane vha vhidzelela Jonathani na muhwali wa zwihali zwawe vha ri, “Iḓani ngeno, ri ḓo ni sumbedza.” Ndi hone Jonathani a tshi vhudza muhwali wa zwihali zwawe a ri, “Ntevheleni, Muṋe washu o vha kumedza zwanḓani zwa Vhaisraele.”

¹³ Jonathani a gonya a tshi tou kokovha nga zwanḓa na ṋayo, muhwali wa zwihali zwawe a tshi khou mu tevhela. Jonathani a dzhena Vhafilista nga pfumo a vha kunda, muhwali wa zwihali zwawe a tevhela, a vhulaha vho waho.

¹⁴ Kha nndwa iyo ya u thoma Jonathani na muhwali wawe wa zwihali vha vhulaha vhanna vha 20 fhethu hune ha nga ita hafu ya hekhitha.

¹⁵ Ndi hone gomane yoṱhe i tshi farwa nga nyofho, vha re mishashani na shangoni, vhalindi na vhaṱanguli, na fhasi ha dzinginyea. Idzo dzo vha dzi nyofho dzo ḓiswaho nga Mudzimu.

Vhafilista vha tshi kundwa

¹⁶ Vhalindi vha Saulo vha re Gibia shangoni ḽa Benyamini vha vhona hu na vilinga Vhafilista vha tshi gidimela ngeno na ngei.

¹⁷ Ndi hone Saulo a tshi vhudza vhanna vhe vha vha vhe nae a ri, “Vhalani vhahali ni vhone vha siho.” Vha tshi vhala vha wana uri Jonathani na muṱhannga wawe wa u hwala zwihali a vhaho.

¹⁸ Ndi hone Saulo a tshi amba na tshifhe Ahia a ri, “Ḓisani luvhemba lwa u pakata.” Misi iyo mbulungelo ya Mudzimu yo vha i na Vhaisraele.

¹⁹ Musi Saulo a tshi kha ḓi amba na tshifhe, vilinga ḽi re mishashani ya Vhafilista ḽa ḓi hulela. Saulo a vhudza tshifhe a ri, “A hu tshee na tshifhinga tsha u ṱwa ri tshi vhudzisa Muṋe washu!”

²⁰ Ndi hone na Saulo na vhanna vhawe vhoṱhe vha tshi kuvhangana, vha dzhena nndwani. Vha wana Vhafilista vho vilingana tshoṱhe, vha tshi vho rungana nga tshavho.

²¹ Vhaheberu vhaḽa vhe u rangani vha vha vhe na Vhafilista vhó gonya navho mishashani yavho, vha vhuelela ha Vhaisraele vhe vha vha vhe na Saulo na Jonathani.

²² Musi Vhaisraele vhoṱhe vhe vha vha vho dzumbama mivhunduni ya Efraimi vha tshi pfa uri Vhafilista vha khou shavha, na vhone vha dzhena iyo nndwa vha vha pandamedza.

²³ Musi wonoyo Muṋe washu a tshidza Vhaisraele. Nndwa ya lwiwa ya vhuya ya fhira Bethe Avene.

Jonathani a tshi ḽa mutoli

²⁴ Zwino Vhaisraele vho vhaisala heḽo ḓuvha nge Saulo a vha o vhofha vhathu nga muano, a ri, “Khombo nga i wele munna ane a ḽa zwiḽiwa ḽi sa athu kovhela, ndi sa athu lifhedza maswina anga!” Zwenezwo ha si vhe na muthihi wa vhahali we a kwama zwiḽiwa.

²⁵ Mmbi yoṱhe ya swika ḓakani ho ḓalaho ṋotshi, zwigili zwo ḓala mutoli.

²⁶ Musi vha tshi wana ṋotshi vha vhona dzo ḓala, naho zwo ralo ha si vhe na we a longa tshithu mulomoni, ngauri vho vha vha tshi ofha zwe vha ana.

²⁷ Huno Jonathani o vha a songo zwi pfa uri khotsi awe o vhofha vhathu nga muano, zwenezwo a ṱhavha tshigili tsha ṋotshi nga ṱhodzi ya lubaḓa lwe a vha o lu fara, a takusa tshanḓa tshawe a isa mulomoni, a konou pfa e na nungo.

²⁸ Ndi hone muṅwe wa vhahali a tshi mu vhudza a ri, “Khotsi aṋu vho vhofha mmbi nga muano vha ri, ‘Munna ane a ḽa zwiḽiwa ṋamusi u ḓo welwa nga khombo!’ Ndi zwine vhanna avha vha si vhe na nungo.”

²⁹ Jonathani a ri, “Khotsi anga vho ḓisa khombo shangoni. Edzonu vhona uri ndi na nungo hani nge nda thetshelanyana ṋotshi idzi.

³⁰ Ngavhe avha vhanna vha vhe vho ḽa zwe vha ṱangula maswina ndi musi zwo vha zwi khwiṋe. Vho vha vha tshi ḓo vha vho vhulaha Vhafilista vhanzhi.”

³¹ Musi wonoyo Vhaisraele vha vhulaha Vhafilista u bva Mikhimashi u swika Ayaloni, vha vhuya vha neta tshoṱhe.

³² Vha mbo ḓi wela zwe vha thuba, vha dzhia nngu na kholomo na ṋamana, vha zwi shidzhela henefho fhasi, vha zwi ḽa khathihi na malofha.

³³ Ndi hone muṅwe a tshi vhudza Saulo a ri, “Nga vha dzou vhona, vhanna avha vha khou khakhela Muṋe washu nga u ḽa ṋama khathihi na malofha.” Saulo a ri, “No khakha. Ṱavhanyani ni kunguluse tombo ḽihulu ni ḽi ḓise ngeno kha nṋe.”

³⁴ Ndi hone a tshi ri, “Ibvani ni yo vhudza vhanna ni ri, ‘Noṱhe ḓisani kholomo dzaṋu na nngu, ni dzi ṱhavhe fhano, ni dzi ḽe. Ni songo khakhela Muṋe washu nga u ḽa ṋama i kha ḓi vha na malofha.’ ” Muṅwe na muṅwe a ḓisa phulu yawe vhusiku honoho a i ṱhavha henefho.

³⁵ Ndi hone Saulo a tshi fhaṱela Muṋe washu aḽiṱari. Ndi yone aḽiṱari ye a thoma u i fhaṱa.

³⁶ Saulo a ri, “Nga ri tse ri yo londa Vhafilista vhusiku, ri vha ṱangule u swika ḽi tshi tsha, nahone ri songo vhuya ra litsha na muthihi wavho a tshila.” Vhanna vha fhindula vha ri, “Nga vha ite zwine vha vhona zwo tea.” Huno tshifhe a ri, “Nga ri range u vhudzisa Mudzimu.”

³⁷ Ndi hone Saulo a tshi vhudzisa Mudzimu a ri, “Ndi tse ndi yo londa Vhafilista? U ḓo vha kumedza zwanḓani zwa Vhaisraele?” Hone Mudzimu a si mu fhindule heḽo ḓuvha.

³⁸ Ndi hone Saulo a tshi ri, “Noṱhe inwi vharangaphanḓa vha mmbi iḓani fhano, nga ri wane zwe ra tshinya ṋamusi.

³⁹ Ndi ana nga Muṋe washu a tshilaho ane a lamulela Vhaisraele, naho a vha ṅwananga Jonathani o tshinyaho, u fanela u fa.” Hone ha si vhe na munna na muthihi we a fhindula.

⁴⁰ Ndi hone Saulo a tshi vhudza Vhaisraele vhoṱhe a ri, “Imani henengeo, nṋe na Jonathani ṅwananga ri ḓo ima nga ngeno.” Vhanna vha fhindula vha ri, “Nga vha ite zwine vha vhona zwo tea.”

⁴¹ Ndi hone Saulo a tshi rabela Muṋe washu Mudzimu wa Israele a ri, “Mphindule zwi re zwone.” Jonathani na Saulo vha farwa nga madeṅwa, vhathu vhone vha wanala vho ṱamba.

⁴² Saulo a ri, “Nṋe na ṅwananga Jonathani ri vhoniseni nga madeṅwa.” Madeṅwa a mvaṱa Jonathani.

⁴³ Ndi hone Saulo a tshi amba na Jonathani a ri, “Mmbudzeni tshe na ita.” Jonathani a mu vhudza a ri, “Ndo tou thetshela mutolinyana nga ṱhodzi ya mbaḓa yanga. Ndi a fa zwanga.”

⁴⁴ Saulo a ri, “Jonathani, arali na sa fa, Mudzimu nga a nthwe a dovhe.”

⁴⁵ Hone vhanna vha vhudza Saulo vha ri, “Hu fe Jonathani we a lamulela Israele zwingafhangafha? Na kathihi! Ri ana nga Muṋe washu a tshilaho, luvhudzi na luthihi lwa ṱhoho yawe lu nga si wele fhasi, ngauri zwe a ita ṋamusi o vha a tshi khou fariswa nga Mudzimu.” Vhanna vha mbo pfumelela Jonathani, a si vhulawe.

⁴⁶ Ndi hone Saulo a tshi litsha u pandamedza Vhafilista, vha humela mashangoni avho.

⁴⁷ Saulo o ri u vhumbwa khosi ya Israele a lwa na maswina avho masia oṱhe: Vhamuaba na Vhaamoni na Vhaedomo na mahosi a Tsoba na Vhafilista. Hoṱhe he a lwa o kunda.

⁴⁸ O lwa nga vhuhali a kunda Vhaamaleke, a lamulela Israele zwanḓani zwa avho vhe vha vha ṱangula.

Nnḓu ya Saulo

⁴⁹ Vhana vha Saulo vha vhatuka vho vha vhe Jonathani na Ishivi na Malakhishua. Ṅwananyana wawe muhulwane o vha a tshi pfi Meraba, muṱuku a tshi pfi Mikhala.

⁵⁰ Mufumakadzi wawe o vha a tshi pfi Ahinuamu, ṅwananyana wa Ahimaatsi. Mulangi wa mmbi ya Saulo o vha a tshi pfi Abinere, ṅwana wa Nere. Nere o vha e khotsimunene wa Saulo.

⁵¹ Kishi khotsi a Saulo na Nere, khotsi a Abinere, vho vha vhe vhana vha Abiele.

⁵² Saulo a tshi kha ḓi vha hone o vha a tshi ḓi dzula a tshi lwa na Vhafilista, nahone Saulo o vha a tshi ri u vhona munna wa maanḓa kana wa vhuhali a mu dzhenisa mmbini yawe.