1 SAMUELE 10 - BIVHILI KHETHWA Mafhungo Madifha

Muya wa Mudzimu a tshi dzhena kha Saulo

¹ Ndi hone Samuele a tshi dzhia dzhomela ḽa mapfura a muolivi a a shela ṱhohoni ya Saulo, a mu kuvhatedza, a ri, “Mudzimu o ni ta uri ni vhe murangaphanḓa wa vhathu vhawe.

² Ni tshi ṱuwa fhano kha nṋe ṋamusi, ni ḓo ṱangana na vhanna vhavhili tsini ha tshalo tsha Rahele, ngei Tseletsa masakhani a ḽa Benyamini. Vha ḓo ni vhudza vha ri, ‘Donngi dze na bva ni tshi yo dzi ṱoḓa dzo wanala. Zwino khotsi aṋu a vha tsha vhuya vha dzi humbula, vha vho ḽa mbilu nga inwi, vha ḓi ṱolou gungula vha tshi ri: Zwino ṅwananga u ngafhi?’

³ “U bva henefho ni ḓo tshimbila na swika murini muhulu wa Thaboro. Henefho ni ḓo ṱangana na vhanna vhararu vhane vha khou ya ha Mudzimu Bethele. Muṅwe u ḓo vha e na mbudzana tharu, muṅwe o hwala mikonde miraru ya vhurotho, muṅwe o hwala gumbu ḽa mukumba ḽa waini.

⁴ Vha ḓo ni resha vha ni ṋekedza mikonde mivhili ya vhurotho. Ni i ṱanganedze.

⁵ Ngavhuya ni ye muvhunduni wa Mudzimu u re Gibia hune ha vha na mishasha ya Vhafilista. Ni tshi dzhena muḓini ni ḓo ṱangana na vhaporofita vho rwa muduba vha tshi bva mivhunduni hu tshi khou lidzwa haripa na mirumba na zwiṱiringo na ngwala phanḓa havho, vhone vha tshi khou porofita.

⁶ Muya wa Muṋe washu u ḓo ḓa kha inwi e na maanḓa, na inwi na porofita navho, na shanduka na vha muṅwe muthu.

⁷ Musi zwiga izwo zwo no khunyelela, ni ite zwine na vhona zwi tshi ṱoḓea, ngauri Mudzimu u na inwi.

⁸ Tselani Giligala ni nthange phanḓa. Ndi ḓo ni tevhela nda ṋekedza tshiṱhavhelo tshi fhiswaho na nduvho dza vhuthihi, hone ni nndindele maḓuvha maṱanu na mavhili ndi vhuye ndi swike ha inwi ndi ni vhudze zwine na fanela u ita.”

⁹ Saulo a ri u rembuluwa a tshi fhambana na Samuele, Mudzimu a mbo shandukisa mbilu ya Saulo, zwiga zwiḽa zwoṱhe zwa khunyelela musi wonoyo.

¹⁰ Musi vha tshi swika Gibia, a ṱangana na vhaporofita vho rwa muduba; Muya wa Mudzimu a ḓa khae e na maanḓa, na ene a porofita navho.

¹¹ Musi vhoṱhe vhe vha vha vha tshi mu ḓivha kale vha tshi vhona a tshi porofita na vhaporofita, vha vhudzisana vha ri, “Ndi tshini tsho welaho ṅwana wa Kishi? Saulo na ene o no vha muporofita naa?”

¹² Muṅwe munna wa muḓi wonoyo a mu nyefula a ri, “Khotsi avho ene ndi nnyi?” Ndi he ha thoma maambele a no ri, “Saulo na ene o no vha muporofita naa?”

¹³ Musi Saulo o no fhedza u porofita, a gonya muvhunduni.

¹⁴ Zwino malume wa Saulo vha mu vhudzisa na phuli yawe, vha ri, “No vha ni ngafhi?” Saulo a ri, “Ro vha ri tshi khou ṱoḓa donngi. Huno ri tshi vhona dzi sa wanali, ra ya ha Samuele.”

¹⁵ Malume wa Saulo vha ri, “Mmbudzeni zwe Samuele a ni vhudza.”

¹⁶ Saulo a fhindula a ri, “Samuele o ri vhudza uri donngi dzo wanala.” Hone a si vhudze malume wawe zwe Samuele a mu vhudza nga vhuhosi.

Saulo a tshi vhumbwa khosi

¹⁷ Samuele a kuvhanganya Vhaisraele muḓini wa Mitsipha,

¹⁸ a vha vhudza a ri, “Muṋe washu Mudzimu wa Israele u ri, ‘Ndo pfulusa Vhaisraele Egipita, nda ni lamulela kha maanḓa a Vhaegipita, na kha mivhuso yoṱhe ye ya vha i tshi ni kandeledza.’

¹⁹ Huno zwino inwi no landula Mudzimu waṋu, Ene ane a ni lamulela khomboni dzoṱhe na kha zwi lemelaho. Huno inwi no ri, ‘Aiwa, ri vhumbele khosi ine ya ḓo ri vhusa.’ Zwino-ha, iḓani phanḓa ha Muṋe washu zwi tshi ya nga matsinde aṋu na mitupo yaṋu.”

²⁰ Ndi hone Samuele a tshi sendedza matsinde oṱhe a Vhaisraele, ha nangwa tsinde ḽa Benyamini.

²¹ Samuele a sendedza tsinde ḽa Benyamini, mutupo nga mutupo, ha nangiwa mutupo wa Mathiri. Ha fhedzwa nga u nangwa Saulo ṅwana wa Kishi. Hone vha tshi mu ṱoḓa, a si wanale.

²² Vha vhudzisa Muṋe washu vha ri, “Munna uyo o no swika fhano naa?” Muṋe washu a fhindula a ri, “Ee, o dzumbama thunduni!”

²³ Vha gidima vha yo mu bvisa, musi o ima vhukati ha vhathu a vhonala a tshi vha fhira vhoṱhe nga u lapfa vha tshi mu guma kha mutsinga.

²⁴ Samuele a vhudza vhathu vhoṱhe a ri, “Munna we a nangwa nga Muṋe washu ni khou mu vhona? Vhukuma a hu na ane a nga ene kha vhathu vhoṱhe.” Ndi hone vhathu vha tshi fhululedza vha ri, “Khosi nga i lalame!”

²⁵ Samuele a ṱalutshedza vhathu ndayo dza vhuhosi. A dzi ṅwala kha bugu, a i vhea phanḓa ha Muṋe washu. Ndi hone Samuele a tshi vhofholola vhathu, muṅwe na muṅwe a livha hayani hawe.

²⁶ Saulo na ene a livha hayani hawe Gibia, a fhelekedzwa nga vhanna vha vhuhali vhe Mudzimu a kwama mbilu dzavho.

²⁷ Huno vhaṅwe vha sa ḓivhalekani vha ri, “Muthu uyu a nga ri lamulela hani?” Vha mu nyadza vha si mu ṋee nduvho. Hone Saulo a si zwi londe.