1 MAHOSI 6 - BIVHILI KHETHWA Mafhungo Madifha

Solomoni a tshi fhaṱa thembele

¹ Solomoni o thoma u fhaṱela Muṋe washu thembele hó no fhela miṅwaha ya 480 tshee Vhaisraele vha pfuluwa Egipita, nga ṅwaha wa vhuṋa tshee a thoma u vhusa Vhaisraele, nga ṅwedzi wa vhuvhili, ṅwedzi wa Zivi.

² Thembele ye khosi Solomoni a i fhaṱela Muṋe washu, yo vha i na vhunavha ha mitha dza 30 na vhuphara ha mitha dza fumi, na mitha dza 15 u lapfela nṱha.

³ Vhuambarelo ho vha vhu mitha ṱhanu, vhuphara haḽo vhu mitha dza fumi, vhuphara hone vhu tshi eḓana na Hukhethwa hone huṋe.

⁴ Mbondo dza thembele dzo vha dzi na mabuli o thivhiwa nga sase.

⁵ U mona na mbondo dza nnḓa matungo na murahu ha thembele ho vha ho fhaṱiwa lufhera lu na zwitizi zwiraru.

⁶ Lufhera lwa fhasi lwo vha lu na vhuphara ha mitha 2,5, tshitizi tsha vhukati tshi na vhuphara ha mitha tharu, tshitizi tsha nṱha tshi na vhuphara ha mitha 3,5. Luvhondo lwa thembele lwo vha lwo ḓi sekena lu tshi gonya na zwitizi, u itela uri phera dzi kone u ima nṱha ha luvhondo uri thanda dza phera dzi si dzhene luvhondoni lwa thembele.

⁷ Matombo e a fhaṱa thembele o vha o vhaḓiwa ngei nnḓa he a bwiwa, lwe ha si pfale phosho ya hamula kana tshezela kana iṅwe-vho tsimbi ine ha shumiwa ngayo musi thembele i tshi khou fhaṱwa.

⁸ Muṋango wa tshitizi tsha fhasi-fhasi wo vha u thungo ya tshipembe ya thembele, hú na zwiṱepisi zwine wa gonya ngazwo kha tshitizi tsha vhuvhili na tsha vhuraru.

⁹ Huno khosi Solomoni a fhedza u fhaṱa thembele, a i fulela nga thanda na mabulannga a mukedara.

¹⁰ A fhaṱa phera dza matungo oṱhe u lapfa na thembele. Vhulapfu ha lufhera luṅwe na luṅwe u ya nṱha ho vha hu mitha 2,5, nahone dzo vha dzo ṱumetshedzwa kha thembele nga thanda dza mukedara.

¹¹ Ipfi ḽa Muṋe washu ḽa ḓa ha Solomoni ḽa ri,

¹² “Thembele iyi ine wa khou i fhaṱa, arali wa tevhedza ndaela dzanga, wa ita zwine ndayo dzanga dza amba, wa vhulunga milayo yanga, wa i thetshelesa, ndi ḓo khunyeledza nga iwe zwe nda fulufhedzisa Dafita khotsi au.

¹³ Ndi ḓo dzula na Vhaisraele, nda si ṱutshele vhathu vhanga Vhaisraele.”

¹⁴ Huno Solomoni a vuledza u fhaṱa thembele.

Matanda a ngomu ha thembele

¹⁵ Mbondo dza ngomu dzo vha dzo tibedzwa nga mabaphathi a mukedara u bva fhasi u swika kha silini, fhasi thembeleni hó adziwa mabulannga a mupaini.

¹⁶ Kamara ya ngomu-ngomu ine ya pfi Hukhethwakhethwa, yo vha yo fhaṱwa bvungwi ha thembele. Yone yo vha i na vhunavha ha mithara dza fumi, yó fhandekanywa na hukhethwa nga mabaphathi a mukedara u bva fhasi u swika kha silini.

¹⁷ Kamara i re phanḓa ha Hukhethwakhethwa yo vha i na vhunavha ha mithara dza 20.

¹⁸ Mabulannga a mukedara o vha o nakiswa nga phaphana na maluvha o vuleaho, zwó koriwa khao, ngomu hoṱhe ho vha ho tibedzwa nga mukedara, matombo a mbondo a sa vhonali.

¹⁹ Bvungwi ha thembele ho vha ho fhaṱwa hukhethwa ha ngomu-ngomu he ha vha ho vhewa mbulungelo ya mulanga ya Muṋe washu.

²⁰ Hukhethwa ha ngomu-ngomu ho vha hu na vhunavha ha mitha dza fumi na vhuphara ha mitha dza fumi na vhulapfu u ya nṱha ha mitha dza fumi, ngomu hoṱhe hó fhomiwa musuku u songo vangiwaho. Aḽiṱari yo itwaho nga mutanda a mukedara, na yone ya fhomiwa musuku.

²¹ Solomoni o fhoma ngomu ha thembele musuku u songo vangiwaho, phanḓa ha hukhethwa ha ngomu ha rambaladzwa geḓane dza musuku, na hone ha fhomiwa musuku.

²² Ngomu ha thembele hoṱhe a hu fhoma musuku. Aḽiṱari ya hukhethwa ha ngomu-ngomu na yone a i fhoma musuku.

²³ Hukhethwa ha ngomu-ngomu a ita vhakherube vhavhili nga thanda ya muolivi, muṅwe na muṅwe e na vhulapfu ha mitha ṱhanu.

²⁴ Lufhafha luthihi lwa mukherube wa u thoma lwo vha lu na vhulapfu ha mitha 2,5, luṅwe lufhafha lu mitha 2,5. U bva ṱhodzini ya luṅwe lufhafha u swika ṱhodzini ya luṅwe vhulapfu hadzo ho vha hu mitha ṱhanu.

²⁵ Mukherube wa vhuvhili na ene o vha e mitha ṱhanu, ngauri vhakherube avho vhavhili vho vha vha tshi fana nga vhuhulu na nga tshivhumbeo.

²⁶ Tshiimo tsha mukherube muṅwe na muṅwe tsho vha tshi mitha ṱhanu.

²⁷ Solomoni a vhea avho vhakherube kamarani ya ngomu-ngomu ya thembele, phapha dzavho dzó ṱharamuwa. Lufhafha lwa muṅwe mukherube lwa kwama luvhondo, lwa uḽa muṅwe na lwone lwa kwama luṅwe luvhondo, phapha dzavho dzone dza kwamana vhukati ha kamara.

²⁸ Vhakherube avho a vha fhoma musuku.

²⁹ Mbondoni hoṱhe u mona na thembele, hoṱhe kamarani ya ngomu na ya nnḓa ho vha ho ṱamiwa nga vhakherube vho vhaḓiwaho na miri ya mitshevho na maluvha o vuleaho.

³⁰ Fhasi ha kamara ya ngomu-ngomu na ya nnḓa ya thembele a ita na u hu shula nga musuku.

³¹ Muṋangoni wa hukhethwa ha ngomu a kwea mahothi a thanda ya muolivi, mihangammbwa yao i na khuḓa ṱhanu.

³² Mahothi o vha o vhaḓwa nga thanda ya muolivi, khao a vhaḓa vhakherube na mitshevho na maluvha o vuleaho, vhakherube na miri ya mitshevho a zwi fhoma musuku wo fuliwaho.

³³ Muṋangoni wa Hukhethwa a longa mihangammbwa ya khuḓa nṋa ya thanda ya muolivi nga u ralo.

³⁴ A vhaḓa na mahothi mavhili a mupaini, ḽiṅwe na ḽiṅwe ḽi na zwipiḓa zwivhili zwi tshi kona u vulwa nga u fhandekanywa.

³⁵ A kora vhakherube na mitshevho na maluvha o vuleaho khao, afho ho koriwaho a hu fhoma nga musuku wo fuliwaho.

³⁶ Solomoni a fhaṱa lutambwe u mona na thembele, guvha ḽí na maalo mararu a matombo o vhaḓiwaho na ḽialo ḽithihi ḽa thanda dza mukedara dzo tumulelwaho, maalo mararu a matombo, ḽithihi ḽa thanda ya mukedara, ḽi tshi ḓi gonya nga u ralo.

³⁷ Muteo wa thembele ya Muṋe washu wa tewa nga ṅwaha wa vhuṋa, nga ṅwedzi wa vhuvhili, ṅwedzi wa Zivi.

³⁸ Nga ṅwaha wa 11 wa muvhuso wa Solomoni, nga ṅwedzi wa vhu-8, ṅwedzi wa Bulu, ha vha hu hone thembele yo fhela tshoṱhe u fhaṱiwa nga he ya dzudzanywa ngaho. Solomoni o fhedza miṅwaha miṱanu na mivhili a tshi i fhaṱa.