1 MAHOSI 21 - BIVHILI KHETHWA Mafhungo Madifha

Tsimu ya Nabotho ya minḓirivhe

¹ Ngavhuya ha itea mafhungo haano: Nabotho wa Jesriele o vha e na tsimu ya minḓirivhe henefho Jesriele, i tsini na pfamo ya Ahaba khosi ya Samaria.

² Muṅwe musi Ahaba a vhudza Nabotho a ri, “Litshani ndi dzhie tsimu yaṋu ya minḓirivhe ndi lime miroho khayo, ngauri i tsini na pfamo yanga. Ndi ḓo ni ṋea tsimu ya khwiṋe ya minḓirivhe kana arali ni tshi funa ndi tou i renga kha inwi nga mutengo wo teaho.”

³ Huno Nabotho a fhindula a ri, “Muṋe washu ha tendi ndi tshi vha fha ifa ḽa vhokhotsi anga.”

⁴ Ahaba a ṱuwa a ya hayani ó ṱungufhala, ó sinyuwa nge Nabotho wa Jesriele a ri, “Ndi nga si vha fhe ifa ḽa vhokhotsi anga.” Ahaba a lala vhulaloni hawe o ṱungufhala, a hana u ḽa zwiḽiwa.

⁵ Mufumakadzi wawe Jesebele a dzhena a mu vhudzisa a ri, “Khezwi vho tou ṱungufhala? Ndi mini vha sa ṱoḓi u ḽa zwiḽiwa?”

⁶ Ahaba a fhindula a ri, “Ndo amba na Nabotho wa Jesriele nda ri, ‘Nthengisele tsimu yau ya minḓirivhe, kana arali u tshi funa ndi u fhe iṅwe tsimu ya minḓirivhe ya u thivha iyi.’ Hone ene a ri, ‘Ndi nga si u fhe tsimu yanga ya minḓirivhe.’ ”

⁷ Jesebele mufumakadzi wawe a ri, “A si vhone khosi i no vhusa Israele naa? Nga vha vuwe vha ḽe zwiḽiwa vha takale. Nṋe ndi ḓo vha wanela heyo tsimu ya minḓirivhe ya Nabotho wa Jesriele.”

⁸ Ndi hone Jesebele a tshi ṅwala maṅwalo nga dzina ḽa Ahaba, a a kandisa nga luswayo lwawe, a a rumela vhahulwane na vhaḓivhalea vha no dzula muḓini muthihi na Nabotho.

⁹ Maṅwaloni eneo a ṅwala a ri, “Ḓivhadzani ḓuvha ḽa u ḓidzima zwiḽiwa, ni rambe vhathu, Nabotho ni mu vhee hune ha dzule vhaḓivhalea.

¹⁰ Ni dzudze vhanna vhavhili vha sa ḓivhalekani u livhana nae, ni ri vha ṱanzilele uri o sema Mudzimu na khosi. Ni mu bvisele nnḓa, ni mu kanḓe nga matombo ni mu vhulahe.”

¹¹ Ndi hone vhahulwane na vhaḓivhalea vhane vha dzula na Nabotho muḓini muthihi vha tshi ita zwe Jesebele a vha laya maṅwaloni e a vha ṅwalela.

¹² Vha ḓivhadza ḓuvha ḽa u ḓidzima zwiḽiwa, vha ramba vhathu, vha dzudza Nabotho hune ha dzula vhaḓivhalea.

¹³ Ha ḓa vhanna vhavhili vha sa ḓivhalekani vha dzula u livhana na Nabotho, vha mu pomoka vhathu vha tshi zwi pfa vha ri, “Nabotho o sema Mudzimu na khosi.” Ndi hone vha tshi mu bvisela nnḓa ha muḓi, vha mu kanḓa nga matombo vha mu vhulaha.

¹⁴ Vha ruma vhaḓinḓa ha Jesebele vha swika vha ri, “Nabotho o kanḓwa nga matombo, o fa.”

¹⁵ Jesebele a tshi pfa uri Nabotho o kanḓwa nga matombo o fa, a vhudza Ahaba a ri, “Zwino nga vha yo dzhia tsimu ya minḓirivhe ya Nabotho wa Jesriele ye a hana u vha rengisela. Ha tsha tshila, o fa.”

¹⁶ Musi Ahaba a tshi pfa upfi Nabotho o fa, a ṱuwa a yo dzhia tsimu ya Nabotho ya minḓirivhe ya vha yawe.

¹⁷ Ipfi ḽa Muṋe washu ḽa ḓa ha Elia muporofita wa Thishibe ḽa ri,

¹⁸ “Itsa u yo ṱangana na Ahaba khosi ya Israele ane a vhusa e Samaria. U ḓo mu wana tsimuni ya minḓirivhe ya Nabotho, o yo i dzhia uri i vhe yawe.

¹⁹ U swike u mu vhudze u ri, ‘Yahavee u ri: Wo vhulaha muthu, zwino u khou dzhia na thundu yawe? Ndi zwone; Yahavee u ri: Henefhaḽa he mmbwa dza ṋanzwa malofha a Nabotho, dzi ḓo ṋanzwa au-vho!’ ”

²⁰ Ahaba a tshi vhona Elia a mu vhudza a ri, “Ndi hone wo nngwana iwe swina ḽanga?” Elia a fhindula a ri, “Ndo vha wana ngauri vho ḓikumedza kha u ita zwine Muṋe washu a vhona zwi zwivhi.

²¹ Muṋe washu u ri, ‘Ndi ḓo u ḓisela khombo nda u lozwa. Ndi ḓo lozwa vhaḓuhulu vhau, nda vhulaha vhaḓuhulu vhoṱhe vha Ahaba vha vhanna kha ḽa Israele, vhaṱuku na vhahulwane.

²² Nnḓu yau ndi ḓo i ita unga nnḓu ya Jerobiamu ṅwana wa Nebati na nnḓu ya Baasha ṅwana wa Ahia, nge wa ntsinyusa, wa ita uri Vhaisraele vha tshinye.’

²³ “Muṋe washu a tshi amba Jesebele u ri, ‘Mmbwa dzi ḓo ḽa muvhili wa Jesebele mutsheṱoni wa muḓi wa Jesriele.’

²⁴ Mashaka a Ahaba vhane vha fela muḓini vha ḓo ḽiwa nga mmbwa, vhane vha fela ḓakani vha ḓo ḽiwa nga maṋoni.”

²⁵ A ho ngo vhuya ha vha na munna a no nga Ahaba, we a ḓikumedza kha u ita zwi sa takadzi Muṋe washu a tshi ṱuṱuwedzwa nga Jesebele mufumakadzi wawe.

²⁶ O ita vhuvhi vhu nengisaho nga u luvha midzimu ya tshika unga Vhaamori vhe Muṋe washu a vha thatha musi Vhaisraele vha tshi swika.

²⁷ Musi Ahaba a tshi pfa maipfi a Elia, a kherukanya zwiambaro zwawe, a ambara madzanganda, a ḓidzima zwiḽiwa. A lala o ambara madzanganda, a tendeleka o ṱungufhala.

²⁸ Ndi hone ipfi ḽa Muṋe washu ḽi tshi ḓa ha Elia wa Thishibe ḽa ri,

²⁹ “Wo zwi vhona uri Ahaba u ḓiṱukufhadza hani phanḓa hanga? Vhunga o ḓiṱukufhadza, a thi tsha ḓo mu ḓisela khombo a tshi kha ḓi tshila, ndi ḓo i ḓisela nnḓu yawe misi ya ṅwana wawe.”