1 MAHOSI 18 - BIVHILI KHETHWA Mafhungo Madifha

Elia na vhaporofita vha Baali

¹ Hó no fhela tshifhinga tshilapfu, nga ṅwaha wa vhuraru, ipfi ḽa Muṋe washu ḽa ḓa ha Elia ḽa ri, “Ṱuwa u yo ḓiswikisa ha khosi Ahaba, ndi ḓo nisa mvula shangoni.”

² Ndi hone Elia a tshi ṱuwa a ya ha Ahaba. Samaria ho vha ho wa nḓala khulu,

³ Ahaba a vhidzisa Obadia we a vha a tshi langa pfamo. Obadia o vha a tshi hulisa Muṋe washu nga mbilu yoṱhe.

⁴ Musi Jesebele a tshi vhulaha vhaporofita vha Muṋe washu, Obadia o dzhia vhaporofita vha ḓana a vha dzumba mapakoni mavhili, kha liṅwe na ḽiṅwe a dzumba vha 50, a tshi vha ṋea zwiḽiwa na maḓi.

⁵ Ahaba a amba na Obadia a ri, “Nga ri buḓekanye shango ḽoṱhe ri ye hu re na zwisima na magovha, khamusi ri nga wana hatsi ra tshidza bere na meila uri ri si fhufhudze tshifuwo tshashu na tshithihi.”

⁶ Vha kovhekana shango, Ahaba a livha buḓo ḽiṅwe, Obadia a livha ḽiṅwe.

⁷ Musi Obadia a tshi khou tshimbila, a ṱangana na Elia. Obadia a ḓivha Elia, a gwadama fhasi a ri, “Vhukuma ndi vhone Elia muṋe wanga?”

⁸ Elia a fhindula a ri, “Ndi nṋe. Iyani ni ntswikise ha muṋe waṋu.”

⁹ Obadia a vhudzisa a ri, “Ndo tshinyani zwine vha nkumedza Ahaba uri a mmbulahe?

¹⁰ Nga Yahavee Mudzimu wavho a tshilaho, muṋe wanga vho ruma vhathu kha tshakha dzoṱhe na kha mashango oṱhe u yo ṱoḓa vhone. Arali muvhusi wa ulwo lushaka a ri vhone a vhaho, Ahaba o vha a tshi mu anisa uri vhone a vha wanali.

¹¹ Huno zwino vhone vha mmbudza uri ndi yo vha swikisa ha muṋe wanga.

¹² Nṋe a thi ḓivhi hune Muya wa Muṋe washu a ḓo vha hwala a vha isa hone musi ndi tshi vha ṱutshela. Arali nda yo vha swikisa ha Ahaba, a si vha wane, u ḓo mmbulaha. Naho zwo ralo nṋe ndo ḓi luvha Muṋe washu u bva hanani hanga.

¹³ Vhone a vho ngo zwi pfa zwe nda ita musi Jesebele a tshi vhulaha vhaporofita vha Muṋe washu? Ndo dzumba vhaporofita vha Muṋe washu vha ḓana mapakoni mavhili, kha ḽiṅwe na ḽiṅwe nda dzumba 50, nda vha ṋea zwiḽiwa na maḓi.

¹⁴ Zwino vhone vha mmbudza uri ndi yo vha swikisa ha muṋe wanga! Ahaba u ḓo mmbulaha!”

¹⁵ Elia a ri, “Nga Muṋe washu Mulangazwoṱhe a tshilaho ane nda vha muḓinḓa wawe, vhukuma nṋe ndi ḓo ḓiswikisa ha Ahaba ṋamusi.”

¹⁶ Ndi hone Obadia a tshi ṱuwa a yo ṱangana na Ahaba a swikisa Elia, Ahaba a ṱuwa a yo ṱangana na Elia.

¹⁷ Musi Ahaba a tshi vhona Elia a mu vhudza a ri, “Ndi inwi naa, inwi mufhiriṱanyi wa Israele?”

¹⁸ Elia a fhindula a ri, “A si nṋe mufhiriṱanyi wa Israele, mufhiriṱanyi wa Israele ndi vhone na vha nnḓu ya khotsi avho. No ṱutshela ndayo dza Muṋe washu na luvha Mabaali.

¹⁹ Zwino nga vha rambe vhathu vha ḓe vha tshi bva kha ḽoṱhe ḽa Israele vha ṱangane na nṋe thavhani ya Kharamele. Vha ḓe na vhaporofita vha Baali vha 450 na vhaporofita vha Ashera vha 400 vhane vha ṱunḓelwa nga Jesebele.”

²⁰ Ndi hone Ahaba a tshi ramba Vhaisraele vhoṱhe na vhaporofita vha Baali uri vha kuvhangane thavhani ya Kharamele.

²¹ Elia a ima phanḓa ha vhathu a ri, “Ni ḓo litsha lini u vha na muya wa murwelahoṱhe? Arali Muṋe washu e Mudzimu, mu luvheni, arali Baali e Mudzimu, luvhani ene.” Hone vhathu vha si fhindule tshithu.

²² Ndi hone Elia a tshi vha vhudza a ri, “Ndi nṋe wa vhaporofita vha Muṋe washu ndo salaho ndi ndoṱhe, hone Baali u na vhaporofita vha 450.

²³ Ri waneleni mboho mbili. Vhaporofita vha Baali nga vha ḓinangele nthihi vha i ṱhavhe, vha i tumukanye, vha i vhee kha khuni, hone vha songo funga mulilo. Na nṋe ndi ḓo ita iḽa iṅwe mboho nga u ralo, nda i vhea kha khuni, nda si funge mulilo.

²⁴ Zwenezwo ni rabele mudzimu waṋu, nṋe-vho ndi ḓo rabela Muṋe washu. Ane a fhindula nga u ḓisa mulilo, ndi Ene Mudzimu.” Vhathu vhoṱhe vha tenda vha ri, “Ndi zwone!”

²⁵ Elia a vhudza vhaporofita vha Baali a ri, “Nga hu thome inwi ni re vhanzhi u nanga mboho ni i ṱhavhe ni i tumukanye. Rabelani mudzimu waṋu, hone ni songo funga mulilo.”

²⁶ Vha dzhia mboho ye vha ṋewa, vha i tumukanya, vha rabela Baali u bva nga matsheloni u swika masiari tshivhangalala. Vha ṱavha mukosi vha ri, “Baali, ri fhindule!” Hone phindulo ye ndi bva vhubvo, ha si vhe na a fhindulaho. Vha ḓi tshina vha tshi mona na aḽiṱari ye vha ḓifhaṱela yone.

²⁷ Masiari tshivhangalala Elia a thoma u vha goḓa a ri, “Ṱavhesani mukosi! Hufha e mudzimu! Khamusi u tshee o ya shangoni kana o farakanea kana o fara lwendo. Khamusi o eḓela, u fanela u vusiwa.”

²⁸ Ndi hone vha tshi ṱavhesa mukosi vha ḓirandekanya nga mapanga na mafumo, vha tshi tevhedza maitele avho, vha vhuya vha bva malofha.

²⁹ Ḓuvha ḽa vhuya ḽa fhambanya ṱhoho vha tshi kha ḓi porofita ha vhuya ha swika tshifhinga tsha nduvho ya madekwana, hone ho vha hu si na phindulo, hu si na ane a fhindula, hu si na ane a zwi londa.

³⁰ Ndi hone Elia a tshi amba na vhathu vhoṱhe a ri, “Iḓani fhano hune nda vha hone.” Vhathu vha ḓa khae, a vusa aḽiṱari ya Muṋe washu ye ya vha i dumba.

³¹ Elia a dzhia matombo a 12, ḽiṅwe na ḽiṅwe ḽo imela tsinde ḽithihi ḽa vhaḓuhulu vha Jakopo we ipfi ḽa Muṋe washu ḽa ḓa khae ḽa ri, “Dzina ḽau ḽi ḓo pfi Israele.”

³² Elia a fhaṱela Muṋe washu aḽiṱari nga ayo matombo, a bwa mugero u mona nayo wa hula lune wa nga kona u fara mbeu ya litha dzine dza nga vha 14.

³³ A thopha khuni, a tumukanya iyo mboho, a i vhea kha khuni. Ndi hone a tshi vha vhudza a ri, “Ḓadzani nkho nṋa nga maḓi ni a shele nṱha ha tshiṱhavhelo tshi re kha khuni.”

³⁴ Elia a ri, “Dovhani!” Vhone vha dovha. Elia a vha vhudza a ri, “Dovhani lwa vhuraru!” Vha dovha lwa vhuraru.

³⁵ Maḓi a ela a tshi mona na aḽiṱari, a ita na u ḓadza mugero.

³⁶ Nga tshifhinga tsha nduvho ya madekwana, muporofita Elia a sendela aḽiṱarini a rabela a ri, “Muṋe washu, Mudzimu wa Abrahamu na Isaka na Israele, nga zwi ḓihwe ṋamusi uri Iwe u Mudzimu wa Israele na uri nṋe ndi muḓinḓa wau, ndo ita zwoṱhe hezwi nge Iwe wa nndaya.

³⁷ Muṋe washu, mphindule, mphindule nandi, uri vhathu havha vha ḓivhe uri Mudzimu ndi Iwe Muṋe washu, na uri u khou dovha u rembulusa mbilu dzavho uri dzi livhe ha Iwe.”

³⁸ Ndi hone mulilo wa Muṋe washu u tshi wela fhasi wa fhisa tshiṱhavhelo na khuni na matombo na mavu wa xisa maḓi a re mugeroni.

³⁹ Vhathu vhoṱhe vha tshi zwi vhona, vha wa nga zwifhaṱuwo vha vhidzelela vha ri, “Muṋe washu ndi Ene Mudzimu! Muṋe washu ndi Ene Mudzimu!”

⁴⁰ Elia a vha vhudza a ri, “Farani vhaporofita vha Baali. Ni songo vhuya na litsha na muthihi a tshi shavha!” Vhathu vha vha fara vhoṱhe, Elia a ri vha ḓiswe Govhani ḽa Kishoni, a vha vhulahela henefho.

Gomelelo ḽi tshi fhela

⁴¹ Elia a vhudza khosi Ahaba a ri, “Nga vha ṱuwe vha yo ḽa, vha nwe, ngauri hu khou unga mvula khulu.”

⁴² Ndi hone Ahaba a tshi ṱuwa u yo ḽa na u nwa, hone Elia a gonya muṱumba wa thavha ya Kharamele, a kotamela fhasi, ṱhoho yawe ya vha vhukati ha magona awe.

⁴³ Elia a vhudza mushumi wawe a ri, “Iyani ni sedze siani ḽa lwanzhe.” Mushumi wawe a gonya a sedza, a tshi vhuya a ri, “A hu na tshithu.” Elia a vhudza mushumi wawe a ita kaṱanu na kavhili a tshi ḓi ri, “Humani ni yo sedza.”

⁴⁴ Lwa vhuṱanu na vhuvhili a tshi vhuya a ri, “Ndo vhona kukole kune kwa eḓana na tshanḓa tsha muthu ku tshi khou raha ku tshi bva lwanzheni.” Ndi hone Elia a tshi vhudza mushumi wawe a ri, “Iyani ha khosi Ahaba ni mu vhudze ni ri, ‘Nga vha dzhene garikini yavho vha tsele hayani mvula i sa ḓo vha fara.’ ”

⁴⁵ Vha tshi kha ḓi amba, makole a nzwinzwimala lutomboni, ha vuwa muya, ha vhuya mvula khulu, Ahaba a namela gariki yawe a livha Jesriele.

⁴⁶ Maanḓa a Muṋe washu a ḓa kha Elia, a vhofha phuraphura yawe nga bannda khunduni, a gidima phanḓa ha Ahaba u vhuya u swika Jesriele.