1 MAHOSI 14 - BIVHILI KHETHWA Mafhungo Madifha

Khaṱhulo ya Jerobiamu na nnḓu yawe

¹ Zwenezwo Abia ṅwana wa khosi Jerobiamu a lwala.

² Jerobiamu a vhudza mufumakadzi wawe a ri, “Edzonu ḓikhakhisa hu si vhe na ane a ḓivha uri ni mufumakadzi wanga, ni ye Shilo hune ha dzula muporofita Ahia, uḽa we a mmbudza uri ndi ḓo vha khosi ya vhathu havha.

³ Ṱuwani na mikonde ya fumi ya vhurotho na dzikhekhe na mvuvhelo ya ṋotshi ni mu fhe. U ḓo ni vhudza zwine zwa ḓo itea kha hoyu mutukana.”

⁴ Mufumakadzi wa Jerobiamu a ita zwe munna wawe a amba, a ya muṱani wa Ahia u re Shilo. Zwino Ahia o vha a si tsha kona u vhona nge a vha o no kalaha.

⁵ Hone Muṋe washu o vha o no ḓi vhudza Ahia a ri, “Mufumakadzi wa Jerobiamu u khou ḓa u u vhudzisa nga ṅwana wawe ane a lwala, u mu fhindule nga u rali na nga u rali. Musi a tshi swika u ḓo vha o ḓikhakhisa.”

⁶ Musi Ahia a tshi pfa mutsindo vothini a ri, “Dzhenani mufumakadzi wa Jerobiamu. Ndi mini ni tshi ḓikhakhisa? Ndo laedzwa uri ndi ni vhudze mavhi.

⁷ Tshimbilani ni yo vhudza Jerobiamu uri Muṋe washu Mudzimu wa Israele u ri, ‘Ndo u hulisa vhukati ha vhathu, nda u ita murangaphanḓa wa vhathu vhanga Vhaisraele.

⁸ Ndo dzhiela nnḓu ya Dafita muvhuso, nda u ṋea iwe, hone iwe a wo ngo nga mulanda wanga Dafita we a tevhedza ndayo dzanga, a ntevhela nga mbilu yawe yoṱhe a tshi ita zwi ntakadzaho.

⁹ Wo ita vhuvhi vhu no fhira ha vhoṱhe vhe vha vha hone iwe u sa athu vha hone. Wo ḓiitela miṅwe midzimu, zwitungulo zwo fulwaho nga tsimbi, wo nṱunga wa ntsinyusa, wa mpfuralela.

¹⁰ Nga mulandu wa zwenezwo, ndi ḓo ḓisa khombo kha nnḓu ya Jerobiamu. Ndi ḓo vhulaha vhaḓuhulu vhoṱhe vha Jerobiamu vha vhanna kha ḽa Israele, hu si sale na muthihi. Ndi ḓo lozwa vha nnḓu ya Jerobiamu unga muthu a tshi swielela vhutoko kule, vha vhuya vha fhela vhoṱhe.

¹¹ Vha Jerobiamu vha no fela muḓini vha ḓo ḽiwa nga mmbwa, vhane vha fela ḓakani vha ḓo ḽiwa nga maṋoni. Ho amba Nṋe Yahavee!’

¹² “Zwino inwi humelani hayani. Ni tshi tou dzhena muḓini mutukana u ḓo fa.

¹³ Vhaisraele vhoṱhe vha ḓo mu lila, vha mu swiṱa. Ndi ene e eṱhe a re wa Jerobiamu a no ḓo swiṱwa, ngauri ndi ene e eṱhe kha vha nnḓu ya Jerobiamu we Muṋe washu Mudzimu wa Israele a vhona hu na tshivhuya khae.

¹⁴ “Muṋe washu u ḓo ḓivhetshela khosi ine ya ḓo vhusa Israele, onoyo u ḓo fhedza nnḓu ya Jerobiamu kathihi, ha nga lengi.

¹⁵ Muṋe washu u ḓo lifhedza shango ḽa Israele, ḽa khura sa luṱanga lu maḓini. U ḓo tupula Vhaisraele shangoni heḽi ḽavhuḓi ḽe a ḽi ṋea vhomakhulukuku wavho, a vha balanganya seli ha mulambo wa Yufuratha, nge vha ṱunga Muṋe washu vha mu sinyusa nga u vhaḓa zwitungulo zwa thanda zwa Ashera mudzimu wa musadzi.

¹⁶ Muṋe washu u ḓo ṱutshela Vhaisraele nga vhuvhi he Jerobiamu a vhu ita, a dovha a ita uri na Vhaisraele vha tshinye.”

¹⁷ Ndi hone mufumakadzi wa Jerobiamu a tshi takuwa a ṱuwa a livha Thiritsa. Hezwi a tshi tou pfuka tshiukhuvha tsha nnḓu, mutukana a mbo ḓi fa.

¹⁸ Vha mu swiṱa, Vhaisraele vhoṱhe vha mu lila, nga he Muṋe washu a amba nga mulomo wa mulanda wawe muporofita Ahia.

Lufu lwa Jerobiamu

¹⁹ Maṅwe mafhungo oṱhe a zwe khosi Jerobiamu a ita, a dzinndwa dze a lwa na a kuvhusele kwawe, o ṅwalwa kha bugu ya Histori ya Mahosi a Israele.

²⁰ Jerobiamu o vhusa a fhedza miṅwaha ya 22, a dzama, a swiṱwa, ṅwana wawe Nadaba a vha khosi vhudzuloni hawe.

Khosi Rehabiamu wa Juda (931-915 BC)

²¹ Rehabiamu ṅwana wa Solomoni o vha khosi ya Juda e na miṅwaha ya 41, a vhusa a fhedza miṅwaha ya 17 e Jerusalema, muḓi we Muṋe washu a u nanga kha mitupo yoṱhe ya Israele uri a vhee dzina ḽawe hone. Mme a Rehabiamu o vha e Naama wa Amoni.

²² Vha Juda vha ita zwi sa takadzi Muṋe washu, vha mu sinyusa nga vhuvhi he vha vhu ita, vha ita zwi no fhira zwa vhokhotsi avho,

²³ vha ḓifhaṱela zwitembele zwikwarani, vha fhaṱa na phuphu dza matombo, vha vhaḓa na zwitungulo zwa thanda zwa Ashera mudzimu wa musadzi, zwikwarani zwoṱhe zwi re na muṱumba na fhasi ha miri yoṱhe yo bvukaho.

²⁴ Tshe tsha vha tshi tshi nengisa ndi vhanna na vhasadzi vhe vha vha vha tshi luvha midzimu nga vhupombwe henefho zwitembeleni. Vhathu vha Juda vho vha vha tshi edzisa zwoṱhe zwi nengisaho zwe zwa vha zwi tshi itwa nga vhathu vhe Muṋe washu a vha thatha shangoni zwiḽa Vhaisraele vha tshi swika.

²⁵ Nga ṅwaha wa vhuṱanu wa muvhuso wa Rehabiamu, khosi Shishaka wa Egipita a dia Jerusalema.

²⁶ A hwala lupfumo lwoṱhe lwa thembele ya Muṋe washu na lupfumo lwa pfamo ya musanda a ṱuwa nalwo. A dzhia zwoṱhe, na zwiṱangu zwa musuku zwe zwa itwa nga Solomoni.

²⁷ Khosi Rehabiamu a ita zwiṱangu zwa musinaseṱha zwa u thivha izwo, a zwi ṋea magota a vhalindi vha no linda muṋango u yaho pfamoni ya musanda.

²⁸ Musi khosi i tshi ya thembeleni ya Muṋe washu, vhalindi vho vha vha tshi ḓi fara zwiṱangu, ngavhuya vha konou zwi humisela rumuni ya vhalindi.

²⁹ Mafhungo maṅwe oṱhe a zwe Rehabiamu a ita o ṅwalwa buguni ya Histori ya Mahosi a Juda.

³⁰ Rehabiamu na Jerobiamu vho vha vha tshi dzulela u lwa.

³¹ Rehabiamu a dzama, a swiṱwa na vhokhotsi awe Muḓini wa Dafita. Mme awe o vha e Naama wa Amoni. Ṅwana wawe Abia a vha khosi vhudzuloni hawe.