1 MAHOSI 13 - BIVHILI KHETHWA Mafhungo Madifha

¹ Bethele ha ḓa muḓinḓa wa Mudzimu a tshi bva Juda o ruṅwa nga Muṋe washu, a tshi swika a wana Jerobiamu o ima aḽiṱarini a tshi ṱoḓa u ṋekedza tshiṱhavhelo.

² Uyo munna a ṱavha mukosi a teketela iyo aḽiṱari ó laiwa nga Muṋe washu a ri, “Iwe aḽiṱari, aḽiṱari wee! Muṋe washu u ri, ‘Hu ḓo bebwa ṅwana a no pfi Josiasi kha nnḓu ya Dafita. Henefha kha iwe ene u ḓo ṱhavha vhotshifhe vha zwitembele zwa zwikwarani vhane vha ṋekedza zwiṱhavhelo fhano, hu ḓo fhiswa marambo a vhathu kha iwe.’ ”

³ Musi wonoyo muḓinḓa wa Mudzimu a ita tshiga a ri, “Ngetshi tshiga tshe tsha ḓivhadzwa nga Muṋe washu u ri: Aḽiṱari hei i ḓo fhanduwa, milora yo kamaho mapfura ya balangana.”

⁴ Musi khosi Jerobiamu a tshi pfa zwe muḓinḓa wa Mudzimu a teketela aḽiṱari i re Bethele, a imisa tshanḓa tshawe o ima aḽiṱarini a ri, “Mu fareni!” Hone itsho tshanḓa tshe a tshi imisa tshi tshi sumba uyo munna tsha mbo ḓi kongonyala, a si tsha kona u tshi humisela murahu.

⁵ Aḽiṱari ya mbo ḓi fhanduwa, milora ya balangana, zwi tshi tevhedza tshiga tshe tsha ambiwa nga muḓinḓa wa Mudzimu ó laiwa nga Muṋe washu.

⁶ Ndi hone khosi i tshi amba na muḓinḓa wa Mudzimu ya ri, “Mpfumedzanyeni na Yahavee Mudzimu waṋu, ni nthabelele uri tshanḓa tshanga tshi fhole.” Muḓinḓa wa Mudzimu a mu ambela na Muṋe washu, tshanḓa tsha khosi tsha fhola, tsha vhuelelela ngonani.

⁷ Khosi ya amba na muḓinḓa wa Mudzimu ya ri, “Nga ri ṱuwe roṱhe ri ye hayani ni yo ḽa, ndi ḓo ni ṋea na tshifhiwa.”

⁸ Huno muḓinḓa wa Mudzimu a fhindula khosi a ri, “Naho vho vha vha tshi nga mpha hafu ya lupfumo lwavho, ndo vha ndi sa nga ṱuwi navho kana nda ḽa zwiḽiwa kana nda nwa maḓi fhano.

⁹ Muṋe washu o nndaya a ri, ‘U songo ḽa zwiḽiwa kana wa nwa maḓi kana wa huma nga nḓila ye wa ḓa ngayo.’ ”

¹⁰ Ndi hone a tshi fara iṅwe nḓila, a si tsha huma nga nḓila ye a ya ngayo Bethele.

Muporofita wa Bethele

¹¹ Zwino ho vha hu na muṅwe muporofita wa mukalaha a tshi dzula Bethele, vhana vhawe vha ḓa vha mu vhudza zwoṱhe zwe uḽa muḓinḓa wa Mudzimu a ita henefho Bethele musi wonoyo, na zwoṱhe zwe a vhudza khosi Jerobiamu.

¹² Khotsi avho a vha vhudzisa a ri, “O ṱuwa nga nḓila ifhio?” Vhana vhawe vha mu sumbedza nḓila ye uyo muḓinḓa wa Mudzimu a no bva Juda a i fara.

¹³ Ene a vhudza vhana vhawe a ri, “Vhelesani donngi.” Vha mu vhelesela donngi, a namela,

¹⁴ a tevhela uḽa muḓinḓa wa Mudzimu, a mu wana o dzula fhasi ha muri muhulu, a mu vhudzisa a ri, “Ndi vhone muḓinḓa wa Mudzimu a no bva Juda?” Munna uyo a fhindula a ri, “Ndi nṋe.”

¹⁵ Ndi hone muporofita a tshi mu vhudza a ri, “Nga ri ṱuwe roṱhe ri ye hayani ri yo ḽa zwiḽiwa.”

¹⁶ Muḓinḓa wa Mudzimu a ri, “Ndi nga si humele murahu nda ṱuwa navho kana nda ḽa zwiḽiwa kana nda nwa maḓi navho fhano fhethu.

¹⁷ Muṋe washu o mmbudza a ri, ‘U songo ḽa zwiḽiwa kana wa nwa maḓi henefho kana wa vhuya nga nḓila ye wa ṱuwa ngayo.’ ”

¹⁸ Muporofita uyo wa mukalaha a fhindula a ri, “Na nṋe ndi muporofita unga vhone. Muṋe washu o ruma muruṅwa a ḓa a mmbudza a ri, ‘Huma nae u mu ise muṱani wau uri a ḽe zwiḽiwa, a nwe maḓi.’ ” Hone muporofita uyo wa mukalaha o vha a tshi khou mu zwifhela.

¹⁹ Ndi hone muḓinḓa wa Mudzimu a tshi huma na uyo muporofita wa mukalaha a yo ḽa zwiḽiwa, a nwa muṱani wawe.

²⁰ Musi vha tshee vho dzula ḓafulani, ipfi ḽa Muṋe washu ḽa ḓa ha muporofita uyo wa mukalaha we a huma nae,

²¹ a vhidzelela a tshi vhudza muḓinḓa wa Mudzimu a no bva Juda a ri, “Muṋe washu u ri, ‘Wo nyadza ipfi ḽa Yahavee, a wo ngo tevhedza ndaela ye wa fhiwa nga Muṋe washu Mudzimu wau.

²² Wo huma wa yo ḽa zwiḽiwa, wa nwa maḓi fhethu he a u vhudza uri u songo ḽa, u songo nwa. Zwenezwo tshitumbu tshau a tshi nga swiṱwi tshaloni tsha vhokhotsi au.’ ”

²³ Musi uyo muḓinḓa wa Mudzimu o no fhedza u ḽa na u nwa, muporofita we a huma nae a mu vhelesela donngi yawe.

²⁴ Musi e lwendoni a ṱangana na ndau nḓilani ya mu vhulaha, tshitumbu tshawe tsha kudzwa nḓilani, donngi na ndau vhuvhili hazwo zwa ima tsini hatsho.

²⁵ Vhaṅwe vhathu vhe vha fhira henefho vha vhona tshitumbu tsho rambalala henefho fhasi, ndau yo ima tsini ha tshitumbu, vha swikisa ayo mafhungo muḓini hune muporofita wa mukalaha a dzula hone.

²⁶ Uḽa muporofita we a mu humisa lwendoni lwawe a tshi zwi pfa a ri, “Ndi muḓinḓa wa Mudzimu we a nyadza ndaela ya Muṋe washu. Muṋe washu o mu kumedza ndau, ya mu zhongondedza, ya mu vhulaha, nga he ipfi ḽa Muṋe washu ḽa mu vhudza.”

²⁷ Muporofita a vhudza vhana vhawe a ri, “Mmbeleseleni donngi.” Vha ita nga u ralo,

²⁸ a namela a ṱuwa. A wana tshitumbu tsho rambalala nḓilani, donngi na ndau zwo ima tsini hatsho. Ndau yo vha i songo ḽa itsho tshitumbu, na donngi í songo i zhongondedza.

²⁹ Ndi hone muporofita a tshi takula tshitumbu tsha muḓinḓa wa Mudzimu, a tshi hwesa donngi, a humela natsho Bethele uri a mu lile, a mu swiṱe.

³⁰ Ndi hone a tshi swiṱa itsho tshitumbu tshaloni tshawe, vha mu lila vha ri, “Yawee, shaka ḽanga!”

³¹ Musi vho no mu swiṱa a vhudza vhana vhawe a ri, “Musi ndi tshi fa ni ntswiṱe tshaloni tshe uyu muḓinḓa wa Mudzimu a swiṱwa khatsho, ni ladze marambo anga tsini ha marambo awe.

³² Ndi uri mafhungo e a ḓivhadzwa nga ipfi ḽa Muṋe washu hu tshi teketelwa aḽiṱari ya Bethele na zwitembele zwa zwikwarani miḓini ya Samaria, vhukuma ha nga weli fhasi.”

Vhuvhi ho lozwaho nnḓu ya Jerobiamu

³³ Naho ho itea hezwo, khosi Jerobiamu wa Israele ho ngo laṱa vhuvhi hawe, a ḓi nanga vhotshifhe kha miṱa zwayo uri vha shume zwitembeleni zwa zwikwarani. Muṅwe na muṅwe we a vha a tshi funa u vha tshifhe o vha a tshi mu vhumba tshifhe wa zwitembele zwa zwikwarani.

³⁴ Uho ndi hone vhukhakhi ha vha nnḓu ya Jerobiamu he ha ita uri zwi si vha nakele, vha vhuya vha lovha tshoṱhe vha si tsha vha hone fhano fhasi.