1 MAHOSI 1 - BIVHILI KHETHWA Mafhungo Madifha

Khosi Dafita ó no kalaha

¹ Khosi Dafita o vha o no kalaha, o lalama, naho vha tshi mu ambadza zwifuko a si tsha pfa vhududo.

² Ndi hone vhalanda vhawe vha tshi amba nae vha ri, “Thovhele nga vha litshe ri vha ṱoḓele musidzana a sa athu ḓivha munna a dzule navho a tshi vha londola. U ḓo lala tsini havho uri thovhele muṋe wanga vha dudelwe.”

³ Ndi hone vha tshi ṱoḓa musidzana o nakaho kha ḽa Israele ḽoṱhe, vha wana Abishaga wa Shuneme, vha mu ḓisa ha khosi.

⁴ Musidzana uyo o vha o nakesa. O vha a tshi ṱwa na khosi a tshi i londola, hone khosi a yo ngo vhuya ya mu dzhenisa nḓuni.

Adonia a tshi vhanga vhuhosi

⁵ Zwino Adonia, ṅwana wa Dafita na musadzi wawe Hagithi, a ḓivhea phanḓa a ri, “Ndi nṋe ane nda ḓo vha khosi.” A ḓiwanela gariki na dzibere na vhanna vha 50 vhane vha ḓo gidima phanḓa hawe.

⁶ Khotsi vho vha vho mu lema, vha si mu kaidze vha mu vhudzisa vha ri, “Ni itelani nga u ralo?” Ho ri u bebwa Abisalomo ha bebwa ene. Na ene o vha o naka.

⁷ Adonia a amba na Juaba ṅwana wa Tseruya na tshifhe Abiathara, vhenevho vha mu tikedza.

⁸ Hone tshifhe Tsadoko na Benaya ṅwana wa Jehoyada na muporofita Nathani na Shimei na Rei na vhahali vha Dafita vha si ime na Adonia.

⁹ Muṅwe musi Adonia a ṋekedza tshiṱhavhelo tsha dzinngu na dzikholomo na ṋamana dzo noniswaho Tomboni ḽa Ṋowa tsini ha tshisima tsha Eni Rogele. A ramba vharathu vhawe vhoṱhe, vhana vha khosi, na vhanna vhoṱhe vha Juda vhe vha vha vhe magota a musanda,

¹⁰ hone muporofita Nathani na Benaya na vhahali vha khosi na murathu wawe Solomoni a si vha rambe.

Solomoni a tshi vhumbwa khosi (971-932 BC)

¹¹ Ndi hone Nathani a tshi vhudzisa Batshiba mme a Solomoni a ri, “A vho ngo zwi pfa uri Adonia ṅwana wa Hagithi o vha khosi muṋe washu Dafita vha sa zwi ḓivhi?

¹² Zwino-ha, nga vha litshe ndi vha eletshedze uri vha kone u ḓitshidza vha tshidze na ṅwana wavho Solomoni.

¹³ Nga vha ye ha khosi Dafita vha mu vhudze vha ri, ‘Thovhela muṋe wanga, a thi ri vho mpfulufhedzisa vha ri: Vhukumakuma Solomoni ṅwana wau u ḓo tevhela nṋe vhuhosini, a dzula kha khuluṋoni yanga? Zwino ndi mini Adonia o no vha ene khosi?’

¹⁴ Musi vhone vha tshee henengei vha tshi khou amba na khosi, nṋe ndi ḓo mbo ḓi dzhena nda khwaṱhisa zwe vha amba.”

¹⁵ Ndi hone Batshiba a tshi yo amba na khosi pfamoni yayo. Khosi yo vha yo no kalahesa, i tshi khou londolwa nga Abishaga wa Shuneme.

¹⁶ Batshiba a khotha a losha khosi. Khosi ya vhudzisa ya ri, “Ni ṱoḓa mini?”

¹⁷ Batshiba a amba na khosi a ri, “Thovhele vho nnyanela nga Muṋe washu Mudzimu wavho vha ri Solomoni ṅwananga u ḓo tevhela vhone vhuhosini, a dzula kha khuluṋoni yavho.

¹⁸ Hone zwino Adonia o no vha ene khosi nahone thovhele muṋe wanga a vha zwi ḓivhi.

¹⁹ O ṱhavha kholomo nnzhi na ṋamana dzo noniswaho, na nngu, a ṋekedza tshiṱhavhelo, a vhidza vhana vhoṱhe vha thovhele na tshifhe Abiathara na mulangammbi Juaba, hone ṅwana wavho Solomoni ho ngo vhidzwa.

²⁰ Thovhela muṋe wanga, maṱo a Vhaisraele vhoṱhe o sedza vhone, uri vha pfe nga vhone uri a no ḓo dzula kha khuluṋoni yavho musi thovhele muṋe wanga vha si tsheeho ndi nnyi!

²¹ Zwa sa ralo, musi une vhone thovhele muṋe wanga vha dzama vha ladzwa na vhokhotsi avho, nṋe na ṅwananga Solomoni a ri nga ḽi lu ḓifhaho.”

²² Batshiba a tshi kha ḓi amba na khosi, muporofita Nathani a mbo ḓi swika.

²³ Vha vhudza khosi vha ri, “Muporofita Nathani u fhano.” A ya phanḓa ha khosi a wa nga tshifhaṱuwo.

²⁴ Nathani a ri, “Kani-ha thovhele muṋe wanga vho amba uri Adonia u ḓo tevhela vhone vhuhosini, a dzula kha khuluṋoni yavho naa?

²⁵ Ndi amba ngauri ṋamusi o no ṱhavha kholomo nnzhi na ṋamana dzo noniswa na nngu, a ṋekedza tshiṱhavhelo. O vhidza vhana vhoṱhe vha thovhele na vhalangammbi na tshifhe Abiathara. Zwenezwino vha khou ḽa nae, vha khou nwa nae vha tshi ri, ‘Thovhele Adonia nga a lalame!’

²⁶ Hone nṋe na tshifhe Tsadoko na Benaya ṅwana wa Jehoyada na ṅwana wavho Solomoni ho ngo ri vhidza.

²⁷ Kani izwi ndi zwe vhone thovhele muṋe wanga vha ita vhá songo ḓivhadza vhalanda vhavho uri ane a ḓo dzula kha khuluṋoni yavho musi thovhele muṋe wanga vha si tsheeho ndi ufhio?”

²⁸ Ndi hone khosi Dafita a tshi ri, “Vhidzani Batshiba a ḓe a dzhene.” Batshiba a ḓa a ima phanḓa ha khosi.

²⁹ Khosi ya ana ya ri, “Nga Muṋe washu a tshilaho, we a nndamukisa khomboni dzanga dzoṱhe,

³⁰ vhukumakuma ṋamusi ndi ḓo khunyeledza zwe nda ni anela nga Muṋe washu Mudzimu wa Israele nda ri, ‘Solomoni ṅwana waṋu u ḓo tevhela nṋe vhuhosini a dzula kha khuluṋoni yanga vhudzuloni hanga.’ ”

³¹ Ndi hone Batshiba a tshi wa nga tshifhaṱuwo, a losha khosi a ri, “Ngavhe thovhele muṋe wanga vha tshi tshila lini na lini!”

³² Khosi Dafita a ri, “Vhidzani tshifhe Tsadoko a ḓe fhano na muporofita Nathani na Benaya ṅwana wa Jehoyada.” Musi vha tshi swika phanḓa ha khosi,

³³ ya vha vhudza ya ri, “Ṱuwani na vhalindi vhanga, ni yo namedza Solomoni meila yanga, ni tsele nae tshisimani tsha Gihoni.

³⁴ Henefho tshifhe Tsadoko na muporofita Nathani vha mu ḓodze mapfura vha mu vhumbe khosi ya Israele. Ni lidze phalaphala ni ṱavhe mukosi ni ri, ‘Khosi Solomoni nga a lalame!’

³⁵ Ni gonye nae, a ḓe a dzule kha khuluṋoni yanga, a vhuse vhudzuloni hanga. Ndo mu vhea uri a vhe muvhusi wa Israele na Juda.”

³⁶ Benaya ṅwana wa Jehoyada a fhindula khosi a ri, “Amen! Ngavhe Muṋe washu Mudzimu wa thovhele muṋe wanga a tshi zwi khwaṱhisa.

³⁷ Vhunga Muṋe washu o vha e na thovhele muṋe wanga, ngavhe a tshi ḓi vha-vho na Solomoni, a ita uri muvhuso wawe u hule u fhira na wa muṋe wanga khosi Dafita!”

³⁸ Ndi hone tshifhe Tsadoko na muporofita Nathani na Benaya ṅwana wa Jehoyada, na Vhakhrita na Vhaphelethe vhalindi vha musanda vha tshi yo namedza Solomoni meila ya khosi Dafita, vha mu isa tshisimani tsha Gihoni.

³⁹ Tshifhe Tsadoko a dzhia luṋanga lwa mapfura denndeni khethwa, a ḓodza Solomoni. Vha konou lidza phalaphala, vhathu vhoṱhe vha ṱavha mukosi vha ri, “Khosi Solomoni nga a lalame!”

⁴⁰ Vhathu vhoṱhe vha tevhela Solomoni, vha tshi khou lidza zwiṱiringo, vha tshi khou pembela zwihulu, lwe mavu a dzinginyea nga mutsindo.

⁴¹ Adonia na vhaeni vhoṱhe vhe a vha e navho vha zwi pfa musi vha tshi khou fhedzisa vhuṱambo havho. Juaba a ri u pfa phalaphala i tshi lila, a vhudzisa a ri, “Mukosi uyo u re muḓini ndi wa mini?”

⁴² Juaba a tshi kha ḓi amba, Jonathani ṅwana wa tshifhe Abiathara a vha o no swika. Adonia a ri, “Dzhenani. Muḓivhalea a no nga inwi o fanela u vha a tshi khou ri ḓela na mafhungo mavhuya.”

⁴³ Jonathani a fhindula a ri, “Na kathihi! Khosi Dafita muṋe washu o vhumba Solomoni khosi.

⁴⁴ Khosi yo ruma tshifhe Tsadoko na muporofita Nathani na Benaya ṅwana wa Jehoyada khathihi na Vhakhrita na Vhaphelethe vhalindi vha musanda, vha mu fhelekedza vhó mu namedza meila ya khosi,

⁴⁵ tshifhe Tsadoko na muporofita Nathani vha mu ḓodza mapfura vha mu vhumba khosi tshisimani tsha Gihoni. U bva henefho vha gonya vha tshi pembela, muḓi wa tou bvuma. Ndi wone mukosi une na u pfa.

⁴⁶ Solomoni zwino o dzula kha khuluṋoni ya musanda.

⁴⁷ Na magota a musanda vho ḓa u fhululedza muṋe washu khosi Dafita vha tshi ri, ‘Ngavhe Mudzimu wavho a tshi ita uri dzina ḽa Solomoni ḽi vhe na bvumo ḽi no fhira ḽavho, muvhuso wawe wa hula u fhira wavho!’ Khosi Dafita a kotama a luvha e vhulaloni hawe,

⁴⁸ a ri, ‘Nga hu rendwe Muṋe washu Mudzimu wa Israele, we a tendela maṱo anga uri ṋamusi a vhone ane a ḓo vha khosi vhudzuloni hanga.’ ”

⁴⁹ Vhaeni vhoṱhe vha Adonia vha ri u pfa zwenezwo vha takuwa vho tshenuwa, vha balangana, muṅwe na muṅwe a fara nḓila yawe.

⁵⁰ Huno Adonia, nga u ofha Solomoni, a ṱuwa a ya a farelela ṋanga dza aḽiṱari.

⁵¹ Solomoni a vhudzwa ha pfi, “Adonia u ofha khosi Solomoni, o farelela ṋanga dza aḽiṱari, u ri, ‘Khosi Solomoni nga a mpfulufhedzise ṋamusi uri ha nga mmbulahi nga pfumo.’ ”

⁵² Solomoni a fhindula a ri, “Arali Adonia a ḓisumbedza uri ndi muthu-muthu, na luvhudzi na luthihi lwa ṱhoho yawe a lu nga weli fhasi, hone arali a wanala e na vhukwila, u ḓo fa.”

⁵³ Ndi hone khosi Solomoni a tshi ruma vhanna, vha yo mu dzhia kha aḽiṱari. Adonia a ḓa a gwadamela khosi Solomoni, Solomoni a ri, “Ṱuwani ni ye hayani haṋu.”