1 JOHANISI 1 - BIVHILI KHETHWA Mafhungo Madifha

Ipfi ḽi ri ṋeaho vhutshilo

¹ Ri ni ṅwalela nga Ipfi ḽi ri ṋeaho vhutshilo, ḽe ḽa vha ḽi hone u bva mathomoni. Ro zwi pfa nga dzashu nḓevhe, ra zwi vhona nga ashu maṱo, ra zwi sedza, ra zwi kwama nga zwanḓa zwashu.

² Vhutshilo honoho ro vhu dzumbululelwa ra vhu vhona; ri ṱhanzi dzazwo. Zwino riṋe fhano ri ni ḓivhadza zwa vhutshilo vhu sa gumi he ha vha vhu na Khotsi, ha vhuya ha dzumbululelwa riṋe.

³ Ndi zwone, zwe ra zwi vhona ra zwi pfa ri zwi ḓivhadza-vho na inwi, uri na inwi ni vhe vhathihi na riṋe; iṱali roṱhe ro no vha vhathihi na Khotsi na Murwa wawe Yesu Khristo.

⁴ Ri ni ṅwalela hezwi uri ri takale tshoṱhe.

Mudzimu ndi tshedza

⁵ Zwino-ha ndaedzo ye ra pfa ngae, ine zwino ra ni ḓivhadza yone ngei: Mudzimu ndi tshedza, khae a hu na swiswi na kathihi.

⁶ Zwenezwo arali ri tshi ri ri vhathihi nae, hone ri tshi ḓi tshila swiswini, ndi mazwifhi fhedzi, ro no bva ngohoni.

⁷ Hone arali ri tshi tshila tshedzani unga Ene e tshedzani, ndi hone ri tshi ḓo vha na vhukonani nga tshashu, malofha a Yesu Murwa wawe a ri ṱanzwa vhutshinyi hoṱhe.

⁸ Arali ra ri a ri khakhi, ndi u ḓifhura, a ro ngo ima ngohoni.

⁹ Hone arali ri tshi tenda zwe ra tshinya, Mudzimu u a ri hangwela a ṱanzwa vhuvhi hashu hoṱhe; ha khakhi, zwe a ri fulufhedzisa u a zwi ita.

¹⁰ Arali ra ri a ri athu tshinya, ri khou mu ita muzwifhi; zwenezwo na ipfi ḽawe a ro ngo vhuya ra ḽi swielela.