Tyuteronome 9 - Intas Etipup

Nuarin tas alupas 9.

Et asuptecnaig nedo imipalea et acheiachei ura a Moses va eri jim aktaktai ara um ika et upene nedo ura.

¹ Ak nup Isreel, akumu atahaijeg aijaua: Akupu algaunyi Jortan aijaua an nopan inig, um apan um ohuun niji pece era ahinag um esjilid iramia natimi iran, im niji maliyum et arehed nathatahau iran, um ahlaujai an nohatag,

² era alupas um ijinies a nup uran pece, nikavaig, ilpu mapoi Enak, eka ato ra aijaua, eris lep ika vai ra, Et emda a di natidai vaig an nuhup u ilpu mapoi Enak!

³ Akumu ato aijaua an nopan inig mika, et atga um uhup iramia a Ihova Atua unyimia; etpu auahas ra aien et idivaig incap et atnamud itai, etpu lep imiasuol ra aien an nuhup unyimia: akupu lep ahlo ra aijaua, um auroauro um auahas ra, et idivaig is asaig ehelemia a Ihova.

⁴ Etu wit ahlo ra a Ihova Atua unyimia, akumu jim aktaktai an liinmopomia aijaua, um ika, Is imiapam caija par ohuun inpece inigki a Ihova va nedo upene uja: ja et ahlo nup urai pece iji igki a Ihova an nuhup unyimia va nedo has ura.

⁵ Akupu eti apan aijaua um ohuun inpece ura va nedo upene unyimia, ka vai inliinmopomia upene: ja et ahlo nup urai pece iji igki a Ihova Atua unyimia, an nuhup unyimia va nedo has ura, mika yi ehneijid intas is asaig a Ihova ehele ehtaij etpomia, nan, Ebraham, im Aisak, im Jekob.

⁶ Akumu ato aijaua mika, et eti alupai caua inpece upene inigki a Ihova Atua unyimia mika akis ohuun aijaua va nedo upene un-yimia; et idim ipjin inliinmopomia aijaua.

⁷ Akumu aktaktai aijaua um imiehva, mika akis auahas inliinmopoi Ihova Atua unyimia aijaua an namasacen: akis atupun aijaua um imipalea Ihova an nopan iyehki akis udei inpece Ijipt aijaua, um imihum pam an nopan inig akis ham igcaki aijaua.

⁸ Akis lep auahas inliinmopoi Ihova aijaua an nedoon Horeb, is lep edemda vai caua a Ihova um ika yi auahas caua.

⁹ Kis wat aridjai ainyak an lolan nedoon par leh inhat apalapal, inhat erahki is amen iran intas etipup u Ihova ehelemia, kis amen ainyak an lolan nedoon ira adiat is forte im nepig is forte; kis eti caig tah nitai caig ainyak um eti umnyi inwai:

¹⁰ is ati imi nyak inhat apalapal is ero a Ihova, is aged an nupsikman a Atua; eris aged iran is idivaig intas asega is asaig ehelemia a Ihova an lolan nedoon juju anliin cap, an nadiat asjapicnaig.

¹¹ Is wat ti pan itac nadiat is forte im nepig is forte, is ati imi nyak inhat apalapal is ero a Ihova, inhat erahki is amen iran intas etipup o un.

¹² Is ika ehelek a Ihova, Atidai aiek, um auroauro um asuol; eris auahas ra a natimi iji igki as iknipagki ra an pece Ijipt aiek: era mun auroauro ara um udei nedo inigki kis asaig ehele ra ainyak; era mun ago natmasimai hat imi ra ara.

¹³ Is lep tas ehelek a Ihova, um ika, Ek mun almoi atimi iji igki ainyak, ja et idim ipjin inliinmopora ara:

¹⁴ udei nyak, ekpu auahas ra ainyak, um atipagki nidara ithan nohatag: ja ekpu ika ainyak eri ahes ehelum natimi eri esjilid um ahinag ira ra ara.

¹⁵ Kis ahidai nyak ainyak um ahes an lolan nedoon um asuol, is lep cas nedoon an cap: is amen an nikmak ero inhat erahki is amen intas etipup iran.

¹⁶ Kis almoi ainyak mika akis idim ago nedo has vai Ihova Atua unyimia aijaua, um ago inhakli kurimatau irai colt imi caua: akis auroauro aijaua um udei nedo inigki is asaig ehelemia a Ihova.

¹⁷ Kis leh inhat erahki ainyak, um ethaig an nikmak ero, um ahtagrei an nuhup unyimia.

¹⁸ Kis lep atpuse an nuhup u Ihova ainyak ira adiat is forte im nepig is forte, et idivaig kis upyi ago ainyak: kis eti caig tah nitai caig ainyak um eti umnyi inwai, va nedo has asega unyimia akis ago aijaua, im nauatatimi unyimia an nuhup u Ihova, im nauahas vaig inliinmopon.

¹⁹ Kis imtitaig nedemda u Ihova ainyak im intavaitap alupas o un, is edemda vai caua aien, um ika yi auahas caua. Ja is lep atahaijeg intas unyak a Ihova an nopan iyehki.

²⁰ Is edemda alupas a Ihova vai Eron um ika yi auahas yin: ja kis lep ago nalaigaheni vai Eron ainyak an nopan iyehki.

²¹ Kis atipagki nitai has iyehki unyimia ainyak, inhakli kurimatau akis ago aijaua, um atnamud an cap, um auud, um ehtoplecoplec mika yi ahrenahren, is idim ahrenahren um haklin is idivaig inmah an nobohtan: kis erekhaig nahrenahren iran ainyak an wai yah is ahes an nedoon um asuol.

²² Akis lep auahas inliinmopoi Ihova aijaua Tabera, im Masa, im Kibrod-hateava.

²³ Is wat abrai caua a Ihova Ketes-barnea, um ika, Akumu apan aijaua um ohuun inpece iyehki kis alupai caua ainyak; akis imipalea intas alep u Ihova Atua unyimia aijaua, um imiisjis nahcil intas o un, um eti atahaijeg nohran.

²⁴ Akis atimi imipalea Ihova aijaua an nopan iyehki kis upyi ato caua ainyak um imihum pam an nopan inig.

²⁵ Kis idim atpuse an nuhup u Ihova ainyak ira adiat is forte im nepig is forte, is idivaig kis upyi ago ainyak; is idim asaig a Ihova mika etpu auahas caua aien.

²⁶ Kis ugyi Ihova ainyak, um ika. Ak Ihova Natimarid unyima, namu jim auahas ilpu atimi unyum aiek im ilpu atimi na ohuun ra aiek, as imiatamai ra aiek an nemda unyum, as iknipagki ra an pece Ijipt aiek an nikmam emda.

²⁷ Namu imiehva ehtaij aheca unyum aiek, nan, Ebraham, im Aisak, im Jekob; jim almoi nedo ipjin u atimi iji igki, im nauatatimi ura, im nedo has ura:

²⁸ va eri jim ika a nup man pece iyehki as iknipagki cama iran aiek, Is auatialidi a Ihova nimiapan ra vaig an pece iyehki is upyi asaig ehele ra aien, is lep amcel vai ra aien, va nitai inigki is iknipagki ra aien mika yi atgei ra an namasacen.

²⁹ Ja era ilpu atimi unyum ara im ilpu atimi na ohuun ra aiek, as iknipagki ra aiek an nikmam adai, im lep an nemda esjilid unyum.