Tyuteronome 8 - Intas Etipup

Nuarin tas alupas 8.

Intas ahugni ra mika eri imiaiji intas alep u Atua ara va nedo aiheuc o un vai ra.

¹ AKUMU aktaktai um imiaiji intas alep iji igki asega aijaua ek asaig ehelemia ainyak an nadiat inigki, va akupu umumoh aijaua, um asvalav, um apan um ohuun inpece iyehki is asaig a Ihova ehele ehtaij etpomia.

² Akumu imiehva nedo asega u Ihova Atua unyimia vai caua irai mesese is forte iji ehki an namasacen, par imiasuol caua, um ahilek inliinmopomia, um ato nedo unyimia, kit akupu imiaiji intas alep o un aijaua, ka oʼo.

³ Is imiasuol caua aien, is wat ehtele caua aijaua is um alaamia manna inig aien, akis eti ato aijaua, eris lep eti ato a ilpu retpomia; mika aki ato aijaua, nikavaig, era eti umumoh natimi vai nitai caig ache, ja era umumoh natimi va nitai asega iji ig et ikni vaig a Ihova.

⁴ Is eti mohtan napelumai unyimia akis aso caua iran aijaua, is lep eti atop neduomia irai mesese is forte iji ehki.

⁵ Akumu lep aktaktai an liinmopomia aijaua mika, et ated caua a Ihova Atua unyimia, et idivaig et ated inhal o un tah natimi.

⁶ Va nitai inigki akumu apos intas alep u Ihova Atua unyimia aijaua, um ago nedo o un, um imtitai yin.

⁷ Et imiapan caua an pece upene a Ihova Atua unyimia, inpece et amen iran nofowai, im inwai ahlau ohua jai, im netpen wai et ahes irai iskanse im lola edoon;

⁸ inpece inig et amen iran hwiit, im barle, im vaine, im na-teg, im pomcranet; inpece inig et amen iran narakei oliv, im hune;

⁹ inpece inig akupu caig nitai caig iran aijaua jam eti ahtahni, um eti ihki atimi an tah nitai; inpece inig et aiurn inhat iran, er lep ucji koper irai edoon iran.

¹⁰ Aku wit hag aijaua um geije, akumu ago naaurinig vai Ihova Atua unyimia aijaua vai inpece upene is alupai caua aien.

¹¹ Akumu aktaktai aijaua va aki jim eti imiehva Ihova Atua unyimia aijaua, um eti apos intas o un, im nedo o un, im intas alep o un, ek asaig ehelemia ainyak an nadiat inigki:

¹² aku wit hag aijaua um geije, um ago neom upene, um amen iran;

¹³ eru wit ahinag kurimatau unyimia im siip unyimia, etu wit ahinag silver unyimia im colt unyimia, etu wit ahinag niji itai asega unyimia;

¹⁴ etmu jim ijinies inliinmopomia aijaua, um jim ahnag irai Ihova Atua unyimia, is iknipagki caua aien an pece Ijipt, an nuarin u nauanaheca unyimia;

¹⁵ is lep atau iramia aien an namasacen iyehki is alupas um has, eris amen iran nimyeuv has, im nispeuv has, is mese, um ti inwai iran; is lep ika aien yi ahes inwai lumamia an hat ipjin;

¹⁶ is alaamia manna inig aien an namasacen, eris eti ato a ilpu retpomia, mika yi imiasuol caua aien, um ahilek inliinmopomia, ja par apitac um ago nedo upene vai caua;

¹⁷ um jim ika an liinmopomia aijaua, Ecris asjapicnaig natimi alupas unyima aijama va nemda unyima, im nauritai u nikmama.

¹⁸ Ja akumu imiehva Ihova Atua unyimia aijaua: aien aigki is alupai caua nemda aien par asjapicnaig itai, mika yi ehneijid intas upyi asaig o un aien is asaig ehele ilpu retpomia aien, et idivaig an nadiat inigki.

¹⁹ El eka eti imiehva Ihova Atua unyimia aijaua, um apitac ilpu atmas u nup urai iji pece um aheca ura, um ago nalaigaheni vai ra, ek idim asaig ehelemia ainyak an nadiat inigki mika akupu idim emesmas aijaua.

²⁰ Akupu emesmas aijaua, et idivaig nup urai pece iji igki is auahas ra a Ihova an nuhup unyimia; va nedo unyimia, nikavaig, akis esjum aijaua nimiaiji vaig intas o Ihova Atua unyimia.