Tyuteronome 7 - Intas Etipup

Nuarin tas alupas 7.

1 Eri jim uhum jipe ehele nup urai iji pece, 4 va eri jim ago nedo apat ara, 6 mika eri amen ilpu atimi upene ara, 9 va nedo aiheuc u Atua im nedo atoh o un, 17 vaig inig nikavaig, et ika a Atua eri esjilid ira ra.

¹ ETU wit imiapan caua a Ihova Atua unyimia an pece iyehki, akupu apan iran aijaua um ohuun, um ahlo nup urai pece et ahinag an nuhup unyimia, nup u Hed, im nup u Circas, im nup Emor, im nup u Kenan, im nup u Piris, im nup u Haivai, im nup u Jibus, nup urai pece et seven era ahinag um esjilid iramia ara;

² etu wit atcijai ra a Ihova Atua unyimia an nuhup unyimia; akumu auud ra aijaua, um auahas ehni ra; um jim asa nigpa ehele ra, um jim aiheuc vai ra:

³ um jim asa atmehgan ehele ra, um jim atcijaig ilpu halav atahig unyimia imi ilpu halav atamaig ura, um jim lucsei ilpu halav atahig ura imi ilpu halav atamaig unyimia.

⁴ Erupu imiahnag ilpu halav atamaig unyimia ara va eri jim apitac nyak ara, mika eri aheca u ilpu atmas ura ara: va nitai inigki etpu atavaitap vai caua a Ihova, um auroauro um auahas caua.

⁵ Etmu uce nedo unyimia vai ra; akumu auahas natau ura aijaua, um auahas nalmuitai ura, um atai niji tap ura, um atnamud niji atmasimai ura an cap.

⁶ Eka ilpu atimi itap vai Ihova Atua unyimia aijaua: is ehtai caua a Ihova Atua unyimia mika aki ilpu atimi o un aijaua, is esjilid naiheuc o un vai caua ira atimi asega an nobohtan.

⁷ Is eti aiheuc vai caua a Ihova um ehtai caua, va nahinag iramia irai nup urai iji pece; akis idim eti elpat aijaua ira atimi asega:

⁸ ja is aiheuc vai caua a Ihova, um aktaktai intas upyi asaig o un ehele ehtaij etpomia, va nitai inigki is iknipagki caua a Ihova an nikman emda, um imiatamaig caua an nuarin eris auaraheca iran, va nikmai Fero natimarid an pece Ijipt.

⁹ Akumu ato aijaua mika et Atua a Ihova Atua unyimia, Atua inveijec, et aktaktai intas upyi asaig o un aien, um aiheuc vai ra et aiyu inliinmopora ara vai yin, um apos intas alep o un, um yetpan irai iji mesese;

¹⁰ et lep aru ira ra aien era amcel vai yin ara an nuhup ura, um auahas ra: inyi eti atumop aien vai ra sji igki era amcel vai yin ara, etpu aru ira ra aien an nuhup ura.

¹¹ Akumu apos intas alep aijaua, im intas asuptecnaig, im nedo iji igki, ek asaig ehelemia ainyak an nadiat inigki, mika aki ago aijaua.

¹² El eka aktaktai nedo iji igki aijaua, um imiaiji, um ago, etpu aktaktai intas upyi asaig o un a Ihova Atua unyimia, im naiheuc iyehki is tas vaig aien ehele ehtaij etpomia:

¹³ etpu aiyu inliinmopon aien vai caua, um acis yi alwai caua, um ika aki ahinag aijaua: etpu lep acis yi alwai ilpu hal unyimia aien, im nohwai itai an nobohtan, nohwai korn unyimia, im nohwai vaine unyimia, im narakei unyimia, im inhakli kurimatau unyimia, im siip unyimia, an pece iyehki is asaig ehele ilpu retpomia aien mika uhpu alupai caua.

¹⁴ Akupu ahesmoij aijaua ira atimi asega: inyi eti eteuc tah natamaig, ka tah intakata, ka tah nitai eklim edo irai pece unyimia, et eti asvalav.

¹⁵ Etpu atipagki nemehe asega iramia a Ihova, um eti ikni iramia tah nemehe has an pece Ijipt eka ato aijaua; ja etpu ikni ira ra asega aien era amcel vai caua ara.

¹⁶ Akumu auahas natimi asega iji ehki aijaua etpu atcijai ra imi caua a Ihova Atua unyimia; akumu jim aiheuc vai ra aijaua: um jim aheca u ilpu atmas ura; nitai oop caua nigki.

¹⁷ El eta ika an liinmopomia aijaua, Era esjilid iraija a nup urai uari pece iji igki; inta auatialidi akaija nahlo ra vaig.

¹⁸ Akumu jim imtitai ra aijaua: akumu imiehva aijaua nedo o Ihova vai Fero im nup Ijipt asega;

¹⁹ nohocred esjilid iji ig akis almoi aijaua, im niji itai asjaaic-naig, im niji itai imiali, im nikman emda, im nikman adai, is iknipagki caua iran a Ihova Atua unyimia: etpu lep ago nedo inigki a Ihova vai natimi asega iji ehki eka imtitai ra aijaua.

²⁰ Etpu lep abraig pan ehele ra numehe a Ihova Atua unyimia, um imihum pan an nopan iyehki, uhpu auahas ra sji ehki erupu amen ara, um atpuh vai caua.

²¹ Akumu jim imtitai ra aijaua: et amen ehelemia a Ihova Atua unyimia, Atua esjilid um emda.

²² Etpu eklim ahlo nup urai pece iji ehki a Ihova Atua unyimia an nuhup unyimia: akumu jim auroauro aijaua um auahas ra, va eri jim ahinag niji itai eklim edo irai pece aleg ehelemia.

²³ Etpu idim atcijai ra imi caua a Ihova Atua unyimia, um auahas ra an nitai auahas ra esjilid, um imihum pan an nopan iyehki erupu atiih ara.

²⁴ Etpu atcijaig ilpu atimarid ura irai ikmamia aien, akumu lep iknipagki nidara aijaua an noboh-tan: inyi eti emda tah natimi natidai vaig an nuhup unyimia, um imihum pan an nopan iyehki akupu auahas ehni ra aijaua.

²⁵ Akumu atnamud an cap nalmui atmas ura aijaua: akumu jim merit vai silver im colt iran aijaua, um jim lucsei, va aki jim ecen iran aijaua: et itai amcel vaig nigki an nuhup u Ihova Atua unyimia.

²⁶ Um jim imiapan anliin neom unyimia tah nitai has, va uhpu jim auahas caua, inyi tup ethi ache pan iran: akumu esjum vaig aijaua, um amcel vaig; et itai has esjilid nigki.