Tyuteronome 6 - Intas Etipup

Nuarin tas alupas 6.

1 Et ati intas alep a Atua mika eri imiaiji natimi. 3 Intas ahugni ra vaig.

¹ INTAS alep, im intas asuptecnaig, im nedo iji igki, is asaig a Ihova Atua unyimia mika uhpu esege imi caua, mika aki ago aijaua an pece iyehki akupu apan iran aijaua um ohuun:

² va akupu imtitai Ihova Atua unyimia aijaua, um apos nedo asega o un, im intas alep o un, ek asaig ehelemia ainyak, aijaua, im ilpu hal unyimia, im ilpu mapomia, irai iji adiat an numumoh vaig unyimia; va etpu ahinag nadiat iramia.

³ Ak nup Isreel, akumu atahaijeg aijaua, um imiaiji; va akupu ahinag acen aijaua, um lep amen upene, et idivaig is upyi asaig a Ihova Atua u ilpu retpomia, an pece iyehki et alupas nidenided im hune iran.

⁴ Ak nup Isreel, akumu atahaijeg aijaua: Et Ihova et ethi ache a Ihova Atua uja:

⁵ etmu aiyu inliinmopomia aijaua vai Ihova Atua unyimia an liinmopomia asega, im nesgamia asega, im nemda asega unyimia.

⁶ Etmu amen an liinmopomia intas iji igki, ek asaig ehelemia ainyak an nadiat inigki:

⁷ akumu lep esege upene imi ilpu hal unyimia aijaua, um tas vaig, aku wit ateuc iraili eom unyimia aijaua, um atga an nefalaig, um asjeucse, um atidai.

⁸ Um arore an nikmamia mika yi itai asjaaicnaig, etpu lep idivaig itai imiehva juju an niblan nesganimtamia.

⁹ Um aged ira auicai irai eom unyimia, im lep irai eucse irahed unyimia.

¹⁰ Etu wit imiapan caua an pece iyehki a Ihova Atua unyimia, is upyi asaig ehele ehtaij etpomia, nan, Ebraham, im Aisak, im Jekob, par alupai caua niji maliyum alupas um esjilid, akis eti ago aijaua,

¹¹ im niji eom et ohua niji itai upene iran, akis eti ikni aijaua, im nehpaiwai eris ucji, ja akis eti ucji aijaua, im niji okoro vaine im niji cai oliv, akis eti ahwaig aijaua;

¹² aku wit hag aijaua um geije, akumu aktaktai aijaua va aki jim eti imiehva Ihova aijaua, is iknipagki caua aien an pece Ijipt, an nuarin auaraheca iran.

¹³ Akumu imtitai Ihova Atua unyimia aijaua, um aheca o un, um asan tas ipjin unyimia an nidan.

¹⁴ Akumu jim apitac ilpu atmas aijaua, irai ilpu atmas u nup urai pece era amen arehed iramia ara;

¹⁵ (et Ihova a Atua unyimia et amen ehelemia aien, et idivaig nedemda u natimi oporei nedemda u Atua,) vai yi jim edemda vai caua a Ihova Atua unyimia, um auahas caua an nobohtan.

¹⁶ Akumu jim auahas inliinmopoi Ihova Atua unyimia aijaua, et idivaig akis auahas inliinmopon aijaua Masa.

¹⁷ Akumu apos upene intas alep u Ihova Atua unyimia aijaua, im intas asuptecnaig o un, im nedo o un, is asaig ehelemia aien.

¹⁸ Akumu ago nedo atoh im nedo upene an nuhup u Ihova aijaua: va akupu amen upene aijaua, um apan um ohuun inpece upene iyehki is asaig a Ihova ehele ehtaij etpomia,

¹⁹ um ahlo pan itac ilpu atimi tak atimi iramia asega an nuhup unyimia, et idivaig is asaig a Ihova.

²⁰ Eru wit ahodai caua a ilpu hal unyimia an taka opan, um ika, Nesgai tas iji igki, im intas alep iji igki, im nedo iji igki, nevitai, is asaig ehelemia a Ihova Atua uja?

²¹ Akumu asuptecnaig ehele ilpu hal unyimia aijaua, um ika, Ecris ilpu aheca u Fero aijama an pece Ijipt; ja is iknipagki cama an pece Ijipt a Ihova an nikman emda:

²² is ehvaig niji itai asjaaicnaig a Ihova, im niji itai imiali, im niji itai esjilid irai up Ijipt, im Fero, im lep ra an nimnim o un, an nuhup unyima:

²³ is iknipagki cama eahki aien, mika yi imiapam cama igcaki aien, um alupai caija inpece inig is upyi asaig ehele ehtaij etpoija aien.

²⁴ Is asaig eheleija a Ihova, mika inti imiaiji intas alep asega iji igki akaija, um imtitai Ihova Atua uja, um amen upene irai iji adiat, va etpu imiatamaig caija aien, et idivaig an nopan inig.

²⁵ El eta apos intas alep asega iji igki akaija an nuhup u Ihova Atua uja, uhpu aiheuc vai caija, et idivaig is asaig eheleija aien.