Tyuteronome 5 - Intas Etipup

Nuarin tas alupas 5.

1 Intas etipup an nedoon Horeb. 6 Intas alep et ten. 22 El wat ugyi yin natimi et leh intas alep a Moses ehele Atua.

¹ IS asjapicnaig nup Isreel asega a Moses, um ika ehele ra, Ak nup Isreel, akumu atahaijeg intas alep im nedo ek asaig ehelemia ainyak an nadiat inigki, mika aki ato aijaua, um apos, um ago.

² Is asan tas etipup o un eheleija a Ihova Atua uja an nedoon Horeb.

³ Is eti asan tas etipup inigki ehele ilpu retpoija ache a Ihova, ja eheleija marom, inta umumoh igcaki akaija an nadiat inigki.

⁴ Is idim tas ehelemia a Ihova an nedoon juju an cap,

⁵ (kis aiji ainyak an niblai Ihova im lep caua au nopan iyehki, par asuptecnaig ehelemia intas o Ihova: akis imtitaig aijaua vai incap, um eti aridjai an nedoon;) um ika,

⁶ Ek Ihova Atua unyimia ainyak; kis iknipagki caua ainyak an pece Ijipt, an nuarin akis aheca iran aijaua.

⁷ Namu jim apol ira tak atua aiek an nuhup unyak.

⁸ Namu jim ago tah natmasimai imi euc aiek, ka nalmui tah nitai ijinies an nohatag, ka sepamki an nobohtan, ka an jap itlian nobohtan:

⁹ namu jim atpuse an nuhup ura aiek, um aheca ura: ek Ihova ainyak Atua unyimia, et idivaig nedemda u natimi oporei nedemda unyak, ek aru nedo has u ilpu atmil ura irai ilpu hal ura, um yetpan irai ilpu mapoi ra sji igki era amcel vai nyak ara,

¹⁰ jam aiheuc va atimi, im ilpu hal ura, im ilpu mapora, um itu ira ra, et aiyu inliinmopora ara vai nyak um apos intas alep unyak.

¹¹ Namu jim tup asaig nidai Ihova Atua unyum aiek: etpu idim aru ira ra a Ihova era tup asaig nidan ara.

¹² Imiehva nadiat atumop, um apos upene, et idivaig is asaig ehelum a Ihova Atua unyum.

¹³ Namu auanaheca aiek ira adiat et siks, um ago nauritai asega unyum:

¹⁴ ja et adiat atumop u Ihova Atua unyum nadiat sevend: namu jim ago tah nauritai iran aiek, im inhalav atamaig unyum, im inhalav atahig unyum, im naheca atamaig unyum, im naheca atahig unyum, im kurimatau unyum, im togke unyum, im tah nitai eklim edo irai pece unyum, im natimi an taka pece anliin nokoro unyum; va etpu atumop a naheca atamaig unyum im naheca atahig unyum et idivai euc.

¹⁵ Um imiehva mika as aheca aiek an pece Ijipt, ja is iknipagki euc eahki a Ihova Atua unyum an nikman adai im nikman emda: va nitai inigki is asaig ehelum a Ihova Atua unyum mika an apos upene nadiat atumop aiek.

¹⁶ Namu ago nedo ecen aiek vai etmam im risum, et idivaig is asaig ehelum a Ihova Atua unyum; va etpu ahinag nadiat iram, im lep upene namen unyum, an pece et alupai euc a Ihova Atua unyum.

¹⁷ Namu jim atgei atmas aiek.

¹⁸ Namu jim ago ingeijid aiek.

¹⁹ Namu jim ehnegitai aiek.

²⁰ Namu jim asan tas ahcil aiek va atimi eblaamnem unyum.

²¹ Etmu jim has iram aiek ehgai natimi eblaamnem unyum, um jim has iram neom o natimi eblaamnem unyum, im uman, im naheca atamaig o un, im naheca atahig o un, im kurimatau o un, im togke o un, im tah nitai et eteuc ehele natimi eblaamnem unyum.

²² Is asan tas iji igki ehelemia asega a Ihova an lolan nedoon juju an cap, im napat, im inmehcim alupas, an nohran esjilid: um eti lep asaig tah nitai. Is aged aien an hat is ero, um ati ehelek.

²³ Akis wat atahaijeg nohran aijaua juju an napat, (is idim cas nedoon an cap,) akis ham ubutpotet ehelek aijaua, ilpu atimi alupas asega irai iji elcau unyimia, im ilpu atimi esjilid unyimia;

²⁴ akis ika aijaua, Et mun idim ehvaig ehelemia natimi alupas o un a Ihova Atua uja im nemda o un, ecris lep atahaijig nohran aijama juju an cap: ecra mun almoi aijama an nadiat inigki mika et tas ehele atimi a Atua, ja era umumoh ara.

²⁵ Ecra a uri aijama par emesmas? etpu auahas cama incap alupas inigki: el ecra lep atahaijeg nohrai Ihova Atua uja aijama, ecrupu emesmas aijama.

²⁶ Natimi inig yek eda is atahaijeg nohrai Atua umoh aien intas vaig juju an cap, et idivaig cama, ja par umoh?

²⁷ Namu apan ubutpotet aiek, um atahaijeg intas asega etpu asaig a Ihova Atua uja: um asuptecnaig ehelema nitai iji igki asega etpu asaig ehelum a Ihova Atua uja; ecrumu atahaijeg aijama, um ago.

²⁸ Is atahaijeg intas unyimia ehelek a Ihova, akis wat tas ehelek aijaua; is lep ika ehelek a Ihova, kis atahaijeg intas o natimi iji igki ainyak, era mun asaig ehelum ara: et upene intas asega ura.

²⁹ Ek merit ainyak mika yi amen ehele ra inliinmopora imtitaig nyak, im inliinmopora apos intas alep asega unyak irai iji adiat, va erupu amen upene ara, im ilpu hal ura, im ilpu mapora, irai iji mesese!

³⁰ Namu apan aiek ehele ra, um ika, Akumu lep apan iraili eom atga unyimia aijaua.

³¹ Ja namu aiji igcaki aiek ubutpotet ehelek, ekpu asuptecnaig ehelum ainyak intas, im intas alep, im nedo iji igki, namu esege imi ra aiek, mika eri ago ara an pece iyehki ekpu alupai ra ainyak mika eri ohuun ara.

³² Akumu aktaktai aijaua um ago et idivaig is asaig ehelemia a Ihova Atua unyimia: um jim ahidaig pan caua an matamia ka inmauumia.

³³ Akumu atga irai efalaig asega aijaua is asaig ehelemia a Ihova Atua unyimia, va akupu umumoh aijaua, um amen upene, um ahinag nadiat iramia an pece akupu ohuun aijaua.