Tyuteronome 4 - Intas Etipup

Nuarin tas alupas 4.

1 Er ahugni ra mika eri imiaiji intas o Atua. 41 Et ikni inmaliyum et eseij a Moses par ahapan iran an nahaijin Jortan igcapam.

¹ AK nup Isreel, akumu imiaiji intas alep im nedo inigki aijaua, kis esege imi caua ainyak, um ago, va akupu umumoh aijaua, um apan um ohuun inpece inig et alupai caua a Ihova Atua u ilpu retpomia.

² Akumu jim ehcilpun tas inigki ek asaig ehelemia ainyak, um jim iknipagki iran, mika aki imiaiji intas alep u Ihova Atua unyimia ek asaig ehelemia ainyak.

³ Akis almoi nitai inigki aijaua is ago a Ihova vai Beal-pior: is auahas atimi asega iramia a Ihova eris apol irai Beal-pior ara.

⁴ Ja eka umumoh um umihum pam an nopan inig aijaua asega akis apol ira Atua unyimia.

⁵ Kis esege imi caua ainyak intas alep im nedo iji igki, is asaig ehelek a Ihova Atua unyak, mika aki ago aijaua an pece iyehki akupu apan iran aijaua par ohuun.

⁶ Akumu apos aijaua um ago; akupu arapakau aijaua um ato itai va nedo inigki an nuhup u nup urai pece iji igki, erupu atahaijeg intas alep iji igki ara, um ika, Era idim arapakau um ato itai a nup uran pece esjilid inigki.

⁷ Era eti esjilid a nup uran taka pece um idivaig inig; et eti amen ubutpotet ehele ra a Atua ura, et idivaig et amen eheleija a Ihova Atua uja irai iji itai asega inta ugyi yin vaig akaija.

⁸ Era lep eti esjilid a nup uran taka pece, um eti amen ehele ra intas alep im nedo upene, et idivaig intas alep asega inigki, ek mun ati an nuhup unyimia ainyak an nadiat inigki;

⁹ jam aktaktai caua aijaua, um aminjinaig upene inliinmopomia, va aki jim eti imiehva aijaua nitai iji igki akis almoi an nesganimtamia aijaua, um lep tiih an liinmopomia ira adiat asega an numoh vaig unyimia: jam esege imi ilpu hal unyimia aijaua, im ilpu mapomia;

¹⁰ jam esjilid an nopan iyehki akis atidai aijaua an nuhup u Ihova Atua unyimia an nedoon Horeb, is wat ika ehelek a Ihova, Namu asjapicnaig pam atimi aiek, mika eri atahaijeg intas unyak ara, va erupu ato ara par imtitaig nyak ira adiat asega erupu amen an nobohtan ara, um lep esege imi ilpu hal ura.

¹¹ Akis apan ubutpotet aijaua um aiji an nohuun nedoon; is alaume incap um yetpan an nohatag, is epig, um apat, um mehcim alupas.

¹² Is tas ehelemia a Ihova juju an niblan cap: akis ahgei nohran tas aijaua, jam eti ecetai tah nitai; akis ahgei nohran ache aijaua.

¹³ Is asuptecnaig intas etipup o un ehelemia aien, is asaig aien mika aki imiaiji aijaua, intas alep is ten o un marom; is lep aged aien an hat is ero aien.

¹⁴ Is asaig ehelek a Ihova an nopan iyehki mika ki esege imi caua ainyak intas alep im nedo o un, mika aki imiaiji aijaua an pece iyehki akupu apan iran aijaua par ohuun.

¹⁵ Akumu aktaktai upene aijaua; akis idim eti almoi tah nitai aijaua an nopan iyehki is tas a Ihova ehelemia an nedoon Horeb juju an niblan cap:

¹⁶ va aki jim imiahnag caua aijaua, um ago tah natmasimai et idivaig tah nitai, kit et idivaig natamaig ka natahig,

¹⁷ et idivaig tah nitai eklim edo irai pece an nobohtan, ka et idivaig tak inman et ae an nohatag,

¹⁸ ka et idivaig tah nitai et atahas an nobohtan, ka et idivaig tah numu et amen an jap ithan nobohtan:

¹⁹ va aki jim easji pan an nohatag aijaua, um almoi nagesega, im inmohoc, im inmoijeuv, im niji itai asega an nohatag, um imiisjis, um atpuse, um ago nalaigaheni vai ra, is ikni a Ihova Atua unyimia va nup urai iji pece asega itlian nohatag.

²⁰ Ja is lucsei caua a Ihova, um iknipagki caua an cap alupas an pece Ijipt, mika aki ilpu atimi o un aijaua, et idivaig an nopan inig.

²¹ Is lep edemda vai nyak a Ihova va nedo unyimia, um asan tas aktit o un mika ki jim algaunyi Jortan ainyak, um eti apan an pece upene iyehki ainyak, et alupai caua a Ihova mika aki ohuun aijaua:

²² ekpu mas ainyak an pece inigki, er idim ika inki eti algaunyi Jortan ainyak: ja akupu algaunyi aijaua, um ohuun inpece upene naico.

²³ Akumu aktaktai upene aijaua, va aki jim eti imiehva intas etipup u Ihova Atua unyimia, is asaig ehelemia aien: um ago natmasimai, ka nalmui tah nitai is acaiji caua a Ihova Atua unyimia.

²⁴ Et cap atnamud itai a Ihova Atua unyimia, um Atua edemda.

²⁵ Aku wit apos ilpu hal unyimia aijaua, im ilpu mapomia, um amen an pece yi itu iramia, um auahas caua, um ago natmasimai, ka nalmuitai, um ago nedo has an nuhup u Ihova Atua unyimia, um auahas inliinmopon:

²⁶ ek ahlaig vai nohatag ainyak im nobohtan par asuptecnaig vai caua an nadiat inigki, mika aki auroauro aijaua um emesmas an pece iyehki akupu algaunyi Jortan aijaua par ohuun; akupu eti amen iran aijaua yi itu iramia, ja uhpu auahas ehni caua.

²⁷ Etpu imiterimterim caua irai iji pece a Ihova, akupu eti elpat aijaua irai taka pece iji ehki, etpu imiapan caua iran a Ihova.

²⁸ Akupu atpuse an nuhup u takitai eahki aijaua, nauritai irai ikma atimi, nauncai im inhat, et eti alum itai, um eti ahgei itai, um eti hag, um eti ipni itai.

²⁹ Ja el eka ahilek Ihova Atua unyimia eahki aijaua, akupu ecet yin aijaua, el eka ahilek yin aijaua an liinmopomia asega im lep an nesgamia asega.

³⁰ Aku wit ohocred aijaua, etu wit lep yetpam iramia nitai iji igki asega, ira adiat apitac marom, el eka ahidaig pam caua ehele Ihova Atua unyimia, um imiaiji nohran;

³¹ (et Atua aiheuc va atimi a Ihova Atua unyimia;) inyi eti udei caua aien, um eti auahas caua, ja etpu imiehva intas upyi asaig ehele ilpu retpomia is asaig ehele ra aien.

³² Akumu ahodaig aijaua va nedo eris ago itu acen, um atupun an nopan iyehki is ati natimi an nobohtan a Atua um imihum pam an nopan inig, um lep ahodaig an nahaijin nohatag um yetpan an nahaijin, kit is eteuc tah nitai et idivaig nitai esjilid inigki, ka eris atahaijeg vaig.

³³ Natimi iji igki eda eris atahaijeg nohrai Atua ara intas vaig juju an cap, et idivaig akis atahaijeg aijaua, um umumoh?

³⁴ Is lep eti ika a Ihova yi apan um iknipagki nup uran pece is ethi imi yin an pece is eche, irai ohocred, im niji itai asjaaicnaig, im nedoa, im nikman emda, im nikman adai, im nedo er imtitaig alupas vaig, et idivaig is ago vai caua a Ihova Atua unyimia an nuhup unyimia.

³⁵ Eris ehvaig ehelemia mika aki ato aijaua, mika et Atua a Ihova; et eti lep eteuc tah.

³⁶ Akis atahaijeg nohran aijaua an nohatag, mika yi esege imi caua aien: akis lep almoi incap alupas o un aijaua an nobohtan; akis lep atahaijeg intas o un aijaua juju an cap.

³⁷ Is aiheuc vai ilpu retpomia aien, va nitai inigki is ehtai ilpu mapora aien, um iknipagki caua an pece Ijipt an nemda esjilid o un;

³⁸ um ahlo nup urai pece alupas um esjilid iramia an nuhup unyimia, um imiapam caua, um alupai caua inpece ura mika aki ohuun aijaua, et idivaig an nopan inig.

³⁹ Akumu ato aijaua an nadiat inigki, um aktaktai an liinmopomia, mika et Atua ijinies an nohatag a Ihova, im lep sepamki an nobohtan et eti lep eteuc tah et eche.

⁴⁰ Akumu apos intas o un aijaua, im intas alep o un ek asaig ehelemia ainyak an nadiat inigki, mika aki amen upene aijaua, im lep ilpu mapomia, va etpu ahinag nadiat iramia an pece inig, et alupai caua a Ihova par ohuun irai iji mesese,

⁴¹ Is anvai inmaliyum is eseij a Moses an nahaijin Jortan igcapam an ridjai o un;

⁴² mika yi ahapan iran a natimi atgei atmas, is atgei etwan aien, jam eti ethetiknaig, um eti edemda vai yin itu acen; um ahapan an tah inmaliyum erahki um umoh:

⁴³ nikavaig, inmaliyum Biser an namasacen, an nuarin marara u ilpu mapoi Ruben; im Bemod an pece Cileat u ilpu mapoi Cat; im Colan an pece Besan u ilpu mapoi Manasi.

⁴⁴ Intas alep nigki is alupai nup Isreel a Moses:

⁴⁵ is asaig intas, im intas alep, im nedo iji igki, a Moses ehele nup Isreel an nopan iyehki, eris udei Ijipt ara um atga ura,

⁴⁶ an nahaijin Jortan igcapam an niskanse Bed-pior an pece u Saihon natimarid u nup Emor, is amen Hesbon aien, is auud yin a Moses im nup Isreel, eris wat ahes Ijipt ara um atga ura:

⁴⁷ eris ohuun inpece o un ara, im inpece u Oc natimarid an pece Besan, ohwat atimarid u nup Emor, erus amen an nahaijin Jortan igcapam arau;

⁴⁸ um ahes Aroer, an nahaijin nofowai Amon, um yetpan an lolan nedoon Saion, tak idan Hermon,

⁴⁹ im nuarin marara asega an nahaijin Jortan igcapam, um yetpan an jap an nuarin marara, ubutpotet pan Astod-pisca.