Tyuteronome 3 - Intas Etipup

Nuarin tas alupas 3.

1 Intas vai Oc natimarid an pece Besan, eris auud yin. 11 Et alupas intinan. 12 Er ahaig inpece iji ehki imi neteuc ira ra et ero im nahaijin et ethi. 23 Intas ugyi u Moses mika yi apan an pece. 26 Et ika a Atua yi ecetai.

¹ INTIS lep ahidaig caija akaija um atga an nefalaig et yetpan Besan: eris ahtag pam eheleija a Oc natimarid an pece Besan, im nup uran pece o un asega, par ati nedoa vai caija Etreai.

² Ja is ika ehelek a Ihova, Jim imtitai yin aiek: ekpu ati yin an nikmam ainyak, im lep ilpu atimi o un asega, im inpece o un; namu ago nedo inigki vai yin aiek, as ago aiek vai Saihon natimarid u nup Emor is amen Hesbon aien.

³ Is idim ati Oc natimarid an pece Besan irai ikmaija a Ihova Atua uja, im lep ilpu atimi o un asega: intis auud ra akaija, is lep eti amen tah is ethi imi yin.

⁴ Intis lep atoraliak niji maliyum asega o un akaija an nopan iyehki, is eti eteuc tah inmaliyum is ethi intis eti atoraliak iran akaija, is sikste inmaliyum iji ehki, inpece Arcob asega, nelcau u Oc an pece Besan.

⁵ Is eteuc ijinies nathatahau irai maliyum iji igki asega, im neucse nathatahau, im niji itai atapnes; is lep eled niji maliyum is ahinag is ti nathatahau iran.

⁶ Intis auahas ehni ra akaija is idivaig intis ago akaija vai Saihon natimarid Hesbon, intis auahas ilpu atamaig asega akaija, im ilpu takata, im ilpu halav, irai iji maliyum asega.

⁷ Ja intis lucsei imi caija akaija niji itai eklim edo irai pece asega im inpadiaig irai iji maliyum.

⁸ Intis lep atoraliak irai ikmai atimarid is ero erahki u nup Emor akaija inpece an nahaijin Jortan igcapam, et ahes an nofowai Amon um yetpan an nedoon Hermon;

⁹ (era anvi nidai Hermon a nup u Saiton par ika Sirion; era lep anvi nidan a nup Emor par ika Sinir;)

¹⁰ niji maliyum asega an nuarin marara, im Cileat asega, im Besan asega, um yetpan Salka im Etreai, niji maliyum an nelcau u Oc an pece Besan.

¹¹ Is umoh a Oc ache natimarid Besan irai ilpu atimi actalactal iji ehki; is aiurn intinan, et amen Rabad inmaliyum u nup Amon; is kubit is nain nopra iran, im kubit is for natgeig iran, et idivaig kubit u atimi.

¹² Kis alupai ilpu mapoi Ruben im ilpu mapoi Cat inpece inigki ainyak, intis ohuun akaija an nopan iyehki, et ahes Aroer ubutpotet pan u nofowai Amon, im nahaijin nedoon Cileat, im niji maliyum iran.

¹³ Kis lep alupai nahaiji ilpu mapoi Manasi ainyak nahaijin Cileat, im Besan asega, nelcau u Oc; inpece Arcob asega, im Besan asega, eris ika is pece u ilpu atimi actalactal.

¹⁴ Is ohuun inpece Arcob asega a Jeer mapoi Manasi, um yetpan ira ahaiji pece u nup u Cisur im nup u Meaka; um anvi nidan par ilpui nidan, nikavaig, Besan-hevod-jeer, um imihum pam an nopan inig.

¹⁵ Kis alupai ilpu mapoi Mekir Cileat ainyak.

¹⁶ Kis alupai ilpu mapoi Ruben im ilpu mapoi Cat ainyak inpece et ahes Cileat um yetpan an nofowai Amon, um yetpan an wai yah Jabok, nahaijin pece u nup Amon nigki;

¹⁷ im lep nuarin marara, im Jortan, im inpece ubutpotet pan o un, et ahes Kinered um yetpan an jap an nuarin marara, injap acen marom, ubutpotet pan Astod-pisca an ridjai o un.

¹⁸ Kis tas ehelemia ainyak an nopan iyehki, um ika, Et mun alupai caua inpece inigki a Ihova Atua unyimia mika aki ohuun aijaua: akumu apan iran aijaua asega, ak ilpu atimi emda, an nuhup u ilpu etwamia nup Isreel, um apos nij va atimi.

¹⁹ Ja erumu amen a ilpu ehgamia, im ilpu hal unyimia, im niji itai eklim edo irai pece unyimia, irai maliyum unyimia iji ig kis alupai caua ainyak; (ek ato ainyak mika et ahinag niji itai eklim edo irai pece unyimia;)

²⁰ um imihum pan an nopan iyehki etpu alupai ilpu etwamia namen upene ura a Ihova, et idivaig caua, eru wit lep ohuun inpece iyehki ara is alupai ra a Ihova Atua unyimia an nahaijin Jortan igcapan: ja akupu lep adumoij aijaua asega, um ohuun nuarin inig ek mun alupai caua ainyak.

²¹ Kis tas ehele Josua ainyak an nopan iyehki, um ika, As almoi aiek an nesganimtam nitai iji ehki asega, is ago a Ihova Atua unyimia ira atimarid erahki: etpu lep uce nedo o Ihova vai niji pece asega napu atga iran aiek.

²² Akumu jim imtitai ra aijaua: etpu idim ago nedoa unyimia a Ihova Atua unyimia.

²³ Kis ugyi Ihova ainyak an nopan iyehki, um ika,

²⁴ Ak Ihova Atua unyak, as atupun aiek um ehvaig ehele naheca unyum natimi alupas unyum, im nikmam emda: et eti eteuc tah Atua an nohatag ka an nobohtan, et emda aien nago itai vaig et idivaig niji auritai unyum, um idivaig nemda unyum.

²⁵ Ek ugyi euc ainyak mika ki apan ainyak um almoi inpece upene naico an nahaijin Jortan igcapan, nedoon upene iji ehki, im Lebanon.

²⁶ Ja is edemda vai nyak a Ihova va nedo unyimia, um eti atahaijeg intas unyak: is tas ehelek a Ihova, um ika, Atumop; jim lep tas ehelek va nitai inigki.

²⁷ Namu aridjai Pisca aiek, um easpan poko, im pahaico, im suko im jeco, um almoi an nesganimtam: napu eti algaunyi Jortan inigki aiek.

²⁸ Ja namu tas ehele Josua aiek, mika yi jim imtitaig aien, um jim auatialidi: etpu idim apan aien an nuhup u atimi iji igki, etpu lep ika ehele ra aien eri ohuun inpece inigki ara napu ecetai aiek.

²⁹ Ja intis amen akaija anniskanse ubutpotet pan Bed-pior.