Tyuteronome 2 - Intas Etipup

Nuarin tas alupas 2.

1 Et lep tas aien, et ika a Atua eri jim imiisjisitai ehele nup Itom, 9 im nup u Moab, 17 im lep nup Amon, 24 ja eris auud Saihon im nup Emor ara.

¹ INTIS ahidai caija akaija, um atga an namasacen ubutpotet pan u Injap cap, is idivaig is asaig ehelek a Ihova: intis lep ahparehed an nedoon Sier akaija ira adiat is ahinag.

² Is tas ehelek a Ihova, um ika,

³ Akis ahparehed an nedoon inigki aijaua is itu iramia: akumu ahidaig pan caua an nuarin inig et ahes narutu iran aijaua.

⁴ Namu tas ehele atimi aiek, um ika, Akupu atga an nahaijin pece u ilpu etwamia ilpu mapoi Isa era amen Sier ara; erupu imtitaig caua ara: va nitai inigki akumu aktaktai nedo unyimia aijaua:

⁵ um jim imiisjisitai ehele ra; inki eti alupai caua tah nuarin pece ura ainyak, maiya, nuarin et idivaig nugnyan neduon; kis idim alupai Isa nedoon Sier ainyak mika yi ohuun aien.

⁶ Akumu auarimtai itai hegaig irai mune ehele ra aijaua incamia; akumu lep auanimtai wai irai mune ehele ra aijaua lumamia.

⁷ Is acis yi alwai caua a Ihova Atua unyimia irai iji auritai asega unyimia: et ato natga unyimia aien an namasacen alupas inigki: is amen ehelemia a Ihova Atua unyimia irai mesese is forte iji ehki; akis eti ihki atimi aijaua an tah nitai.

⁸ Intis ahtaregdei ilpu etwaija akaija ilpu mapoi Isa, era amen Sier ara, um atga an nefalaig et ahes Ilad im Ision-ceber, ja par ahidaig caija um atga an nefalaig an namasacen Moab.

⁹ Is tas ehelek a Ihova, um ika, Akumu jim imiisjisitai ehele nup u Moab aijaua, um jim ago nedoa vai ra: inki eti alupai caua inpece ura ainyak mika aki ohuun aijaua; kis idim alupai ilpu mapoi Lot nuarin pece Ar ainyak mika eri ohuun ara.

¹⁰ Eris amen iran a nup Imai itu acen, eris alupas ara, um ahinag, um ijinies, et idivaig nup Enak;

¹¹ eris lep ika eris ilpu atimi actalactal ara et idivaig nup Enak; ja era anvi nidara a nup u Moab par ika nup Imai.

¹² Eris upyi amen Sier itu acen a nup u Hor; ja eris auahas ra a ilpu mapoi Isa, um isjeupigmoig ra, um amen an pece ura; et idivaig eris ago a nup Isreel an pece is alupai ra a Ihova mika eri ohuun ara.

¹³ Kis ika ainyak, Akumu atidai aijaua, um algaunyi inwai yah Siret. Intis algaunyi inwai yah Siret akaija.

¹⁴ Intis ahes Ketes-barnea akaija um atga irai mesese is dirte eet, ja par algaunyi inwai yah Siret; um imihum pan an nopan iyehki eris emesmas a ilpu eucsupo asega ira atimi, is idivaig is asaig ehele ra a Ihova.

¹⁵ Is idim yetpam ira ra nikmai Ihova par auahas ra ehele atimi, um umihum pan an nopan iyehki eris atiih ara.

¹⁶ Eris wat atiih a ilpu eucsupo asega um emesmas ehele atimi,

¹⁷ is tas ehelek a Ihova, um ika,

¹⁸ Namu atga an nuarin pece Ar aiek an nadiat inigki, nahaijin pece Moab:

¹⁹ ja aku wit atga ubutpotet pan u ilpu mapoi Amon aijaua, jim imiisjisitai ehele ra, um jim apan ehele ra: inki eti alupai caua tah nuarin nobohtan u nup Amon ainyak mika aki ohuun aijaua; kis idim alupai ilpu mapoi Lot inpece inigki ainyak mika eri ohuun ara.

²⁰ Eris lep ika eris amen a ilpu atimi actalactal eahki itu acen; era anvi nidara a nup Amon par ika nup u Samsumai;

²¹ eris alupas ara, um ahinag, um ijinies, et idivaig nup Enak; ja is auahas ra a Ihova an nuhup ura; eris isjeupigmoig ra ara, um ohuun inpece ura:

²² is idivaig nedo o un vai ilpu mapoi Isa eris amen Sier ara, is wat auahas nup u Hor aien an nuhup ura; eris isjeupigmoig ra ara, um amen an pece ura, um imihum pam an nopan inig:

²³ im lep nup Evai eris amen Haserim ara, um yetpan Asa, eris auahas ra a nup u Kaftor eris ahes Kaftor ara, um amen an pece ura.

²⁴ Akumu atidai aijaua, um atga unyimia, um algaunyi inwai yah Amon: ek mun ati an nikmamia ainyak Saihon nup Emor, et atimarid Hesbon aien, im lep inpece o un: akumu ohuun aijaua, um ago nedoa vai yin.

²⁵ Ekpu atupun ainyak an nadiat inigki, um ika eri imtitaig caua um auatialidi vai caua a nup irai iji pece ithan nohatag; erupu ahgei intas vai caua ara, um eucjeucjeucaij, um ohocred vai caua.

²⁶ Kis abraig pan atimi an namasacen Ketemod ainyak par apan ehele Saihon natimarid Hesbon, um tas igpa, um ika,

²⁷ Ecrumu atga an pece unyum aijama: ecrupu atga an nefalaig alupas aijama, um eti ahidaig pan cama an matama ka an mauuma.

²⁸ Namu ahtai imi cama nitai hegaig va mune incama; um ah-tai imi cama inwai va mune lumama: ja ecrupu atga ache an pece aijama;

²⁹ (is idivaig nedo o ilpu mapoi Isa era amen Sier ara, im nup u Moab era amen Ar ara;) um imihum pan an nopan iyehki ecrupu algaunyi Jortan aijama, um yetpan an pece is alupai cama a Ihova Atua unyima.

³⁰ Ja is ipjin a Saihon natimarid Hesbon vai ti jim ahtaregdei yin akaija: ja is alupai yin inliinmopon ipjin, im inliinmopon imiisjisitai, a Ihova Atua unyimia, va etpu atcijaig yin imi caua aien, et idivaig an nopan inig.

³¹ Is tas ehelek a Ihova, um ika, Ek mun idim atcijaig Saihon ehelemia ainyak im inpece o un: akumu atupun aijaua, um ohuun inpece o un.

³² Ja is apam eheleija a Saihon, im nup uran pece o un asega, par ago nedoa Jehas.

³³ Is ati yin imi caija a Ihova Atua uja; intis auud yin akaija, im ilpu halav atamaig o un, im nup uran pece o un asega.

³⁴ Intis atoraliak niji maliyum asega o un akaija an nopan iyehki, um auahas ehni ilpu atamaig, im ilpu takata, im ilpu halav, irai iji maliyum asega, intis eti udei tah akaija:

³⁵ intis lucsei niji itai eklim edo irai pece ache akaija imi caija, im lep inpadiaig irai iji maliyum.

³⁶ Is eti esjilid iraija tah inmaliyum is ethi, an niblai Aroer is eteuc an nahaijin nofowai Amon, im inmaliyum ubutpotet pan u nofowai, im lep Cileat: is atcijaig asega imi caija a Ihova Atua uja:

³⁷ akis eti apan aijaua an pece u nup u Amon ache, ka an tah anuarin u nofowai Jabok, ka irai iji maliyum irai edoon, ka an tah anuarin is acaiji caija a Ihova Atua uja.