Tyuteronome 19 - Intas Etipup

Nuarin tas alupas 19.

1 Niji maliyum par ahapan iran. 4 Eri imiaras ilpu atimi atgei atmas iran ja par ahilek nedo ura. 14 Eri jim atipagki nitai asjaaicnaig nuari obohtan. 15 Eri eteuc natimi asuptecnaig itai et ero. 16 Neruvaig ira atimi asuptecnaig itai jam ahcil.

¹ ETU wit auahas ehni nup uran pece iyehki a Ihova Atua unyimia etpu alupai caua a Ihova Atua unyimia, aku wit asjeupigmoig ra aijaua um amen irai iji maliyum ura, im lep iraili eom ura;

² akumu aniv inmaliyum inyi eseij imi caua aijaua an pece iyehki unyimia, etpu alupai caua a Ihova Atua unyimia mika aki ohuun aijaua.

³ Akumu ago nefalaig imi caua aijaua, um ahaig inpece iyehki, etpu alupai caua a Ihova Atua unyimia mika aki ohuun aijaua, inyi eseij nuarin iran, va erupu ahapan eahki a ilpu atimi atgei atmas asega.

⁴ Inyi uce vai natimi atgei atmas, etpu ahapan eahki aien, um umoh: Aien et atgei etwan aien jam eti ethetiknaig, um eti edemda vai yin itu acen;

⁵ et idivaig et wat apan an nesei tah natimi im lep etwan par atai auicai, el et etjo nesgan pas an nerehin, et wat auahan pas aien, um acaldei nauincai, um atgei etwan; etmu ahapan aien an tah inmaliyum erahki um umoh:

⁶ vai yi jim apitac natimi atgei natmas a natimi aru inmas, et wat edemda inliinmopon aien, um uhum pan yin, va nopra an nefalaig, um atgei yin; et wat eti upene vai yin inmas vaig, is eti edemda vai yin aien itu acen.

⁷ Va nitai inigki ek asaig ehelemia ainyak, mika aki aniv inmaliyum inyi eseij imi caua aijaua.

⁸ El et ika a Ihova Atua unyum yi alupas inpece unyimia, et, idivaig is upyi asaig ehele ilpu retpomia aien, um alupai caua inpece asega is upyi asaig ehele ilpu retpomia aien;

⁹ el eka apos intas alep asega iji igki aijaua um imiaji, ek asaig ehelemia ainyak an nadiat inigki, mika yi aiyu inliinmopomia aijaua vai Ihova Atua unyimia, um ahced nefalaig o un irai iji adiat; akumu lep aniv inmaliyum inyi eseij aijaua napali vaig erahki is eseij:

¹⁰ va uhpu jim atgei tah natimi upene au pece unyimia, etpu alupai caua a Ihova Atua unyimia mika aki ohuun aijaua, vai yi jim amen iramia inmas o un tah.

¹¹ Ja el et edemda vai etwan tah natimi, um atpaijinai yin, um imiiris yin, um atidai, um auud yin mika yi mas aien, ja par ahapan an tah inmaliyum erahki:

¹² erumu leh yin eahki a ilpu atimi alupas an maliyum o un, um ati yin ehele natimi aru inmas, va etpu mas aien.

¹³ Jim alum yin aijaua um aiheuc vai yin, jam atipagki nimtan mas u natimi upene irai up Isreel, va akupu amen upene aijaua.

¹⁴ Jim atipagki nitai asjaaicnaig nuarin obohtan u natimi eblaamnem unyum aiek, eris ati a ilpu retpom umam napu ohuun aiek an pece, etpu alupai euc a Ihova Atua unyum mika an ohuun aiek.

¹⁵ Et eti upene vai natimi echim asuptecnaig nedo acalacal oun tah, ka nedo maumau o un; ja eri asa neruvaig vai nitai iyehki vai intas o natimi asuptecnaig inyi ero, ka natimi asuptecnaig inyi eseij.

¹⁶ El et atidai tah natimi asuptecnaig ahcil vaig tah natimi, um asuptecnaig tah nedo has o un;

¹⁷ erumu atidai an nuhup u Ihova natimi erahki, erau imiisjisitai jipe arau, im lep an nuhup u ilpu atimi ahlap im ilpu atimi alupas, erupu amen ara an nopan iyehki;

¹⁸ erumu ahilek upene a ilpu atimi alupas: el et atimi ahcil a natimi asuptecnaig, um asuptecnaig intas ahcil vai etwan;

¹⁹ akumu ago nedo inigki vai yin aijaua, is ika aien yi ago vai etwan: va akupu atipagki nedo has ehelemia aijaua.

²⁰ Erupu atahaijeg vaig natimi asega, um imtitaig, um eti lep ago tah nedo has ehelemia inyi idivaig iyehki.

²¹ Uhmu jim aiheuc vaig tah; uhmu lep aru inmas an mas; im nesganimtan an nesganimtan, im neijin an neijin, im nikman an nikman, im neduon an neduon.