Tyuteronome 16 - Intas Etipup

Nuarin tas alupas 16.

1 Nasjapicnaig an nahtaregdei atimi vai Ihova, 9 irai iji wiik, 13 irai iyum uriicai. 16 Er idim ika eri ahlap irai iji itai ahlap a ilpu atamaig asega, et idivaig nemda ura, ira asjapicnaig erahki. 18 Intas vai ilpu atimi tas alep im nedo atoh. 21 Eri jim ahwaig niji tap um jim ago atmasimai.

¹ UHMU aktaktai inmohoc Ebib, um asjapicnaig va nahtaregdei atimi vai Ihova Atua unyimia: is iknipagki caua an pece Ijipt a Ihova Atua unyimia an mohoc Ebib an nepig.

² Namu atgei nitai ahlap va nahtaregdei atimi aiek vai Ihova Atua unyum, irai siip im kurimatau, an nuarin iyehki etpu aniv a Ihova mika yi ati nidan eahki.

³ Uhmu jim asipiaig ira areto et amen leven iran; uhmu caig ira adiat inyi seven tup ethi ache pan ira areto et ti leven iran, nareto marom er ohocred vaig; as auroauro aiek ura udei inpece Ijipt: va apu imiehva aiek nadiat iyehki as udei Ijipt aiek irai iji adiat an numoh unyum.

⁴ Uhmu jim ecetai tah nareto et amen leven iran an pece asega unyimia ira adiat inyi seven; uhmu jim lep amen um yetpan an nuhialeg tah nuarin nohui nitai eklim edo irai pece, as atgei aiek an nadiat uhup an jupura.

⁵ Uhmu jim atgei nitai ahlap va nahtaregdei atimi an tah nimnim unyimia, et alupai caua a Ihova Atua unyimia:

⁶ jam atgei nitai ahlap va nahtaregdei atimi an nuarin iyehki, etpu aniv a Ihova Atua unyimia mika yi ati nidan eahki, an jupura, etu wit ete nagesega, an nopan iyehki akis udei inpece Ijipt aijaua.

⁷ Uhmu lep ahen um caig an nuarin iyehki etpu aniv a Ihova Atua unyum: ja etu wit lahlah an nuhialeg namu ahidai euc aiek, um apan anliin neom unyum.

⁸ Uhmu caig nareto et ti leven iran ira adiat inyi siks: ja uhmu apos nasjapicnaig itap vai Ihova Atua unyum an nadiat sevend: namu jim ago tah nauritai iran aiek.

⁹ Namu esvi wiik inyi seven vai euc aiek: namu atupun aiek um esvi wiik inyi seven iji ehki an nopan er atupun um ucsei korn iran.

¹⁰ Namu apos nasjapicnaig irai wiik aiek vai Ihova Atua unyum, an nitai ahlap aiheuc an nikmam, namu alupai Ihova Atua unyum aiek, et idivaig is ago nedo upene vai euc a Ihova Atua unyum:

¹¹ napu lep imiacitak aiek an nuhup u Ihova Atua unyum, aiek, im inhalav atamaig unyum, im inhalav atahig unyum, im naheca atamaig unyum, im naheca atahig unyum, im ilpu mapoi Livai anliin nokoro unyum, im natimi an taka pece, im ilpu umnij, im ilpu takata eris emesmas a ilpu atanmyu ura, era amen ehelemia ara, an nuarin iyehki etpu aniv a Ihova mika yi ati nidan eahki.

¹² Namu imiehva aiek mika as aheca aiek an pece Ijipt: namu lep aktaktai aiek um ago nedo iji igki.

¹³ Uhmu lep apos nasjapicnaig vai iyum uriicai ira adiat inyi seven, nau wit asjapicnaig ehni korn unyum aiek im nide vaine unyum:

¹⁴ napu lep imiacitak va nasjapicnaig unyum, aiek, im inhalav atamaig unyum, im inhalav atahig unyum, im naheca atamaig unyum, im naheca atahig unyum, im ilpu mapoi Livai, im natimi an taka pece, im ilpu umnij, im ilpu takata eris emesmas a ilpu atamnyu ura, era amen ara anliin nokoro unyum.

¹⁵ Uhmu apos nasjapicnaig itap ira adiat inyi seven vai Ihova Atua unyum an nuarin iyehki etpu aniv a Ihova: etpu ago nedo upene vai euc a Ihova Atua unyum irai iji itai asega unyum, im lep irai iji auritai asega unyum, va nitai inigki napu idim imiacitak aiek.

¹⁶ Erumu eceseij ehcohos pan an nuhup u Ihova Atua unyum a ilpu atamaig asega irai iji mesese an nuarin iyehki etpu aniv aien; an nasjapicnaig va nareto et ti leven iran, im nasjapicnaig vai wiik, im nasjapicnaig vai iyum uriicai: etmu jim ehcohos pan tah an nuhup u Ihova et ti itai o un:

¹⁷ Erumu alupai atimi asega et idivaig niji itai ura, et idivaig is alupai euc a Ihova Atua unyum an nedo upene o un.

¹⁸ Namu ikni ilpu atimi alupas aiek im ilpu atimi atau imi ra, irai iji uari pece et alupai euc a Ihova Atua unyum, irai iji elcau unyum: erumu tas alep va atimi ara irai tas alep upene.

¹⁹ Namu jim udei nedo atoh aiek; um jim asjaaicnaig iran tah natimi aiek, um jim leh tah nitai tup ahtai: eh ago apat nesganimtai ilpu atimi arapakau va nitai tup ahtai, eh lep imiahnag intas o ilpu atimi upene.

²⁰ Namu apol an nitai inigki aiek et upene asega, va apu umoh aiek, um ohuun inpece et alupai euc a Ihova Atua unyum.

²¹ Jim ahwaig niji cai ubutpotet pan u natau u Ihova Atua unyum, napu ago imtam aiek.

²² Um jim ati imtam tah natmasimai; et amcel vaig a Ihova Atua unyum.