Tyuteronome 10 - Intas Etipup

Nuarin tas alupas 10.

1 Nedo aiheuc u Atua par aketo um aged an hat is ero, 6 par ati Eliesar mika yi isjeupigmoig Eron, 8 par ikni ilpu mapoi Livai, 10 par atahaijeg intas ugyi u Moses va atimi. 12 Intas ahugni ra mika eri imiaiji intas o Atua.

¹ IS ika ehelek a Ihova an nopan iyehki, Namu ates inhat apalapal yi ero aiek et idivaig erahki uhup, um aridjipam ehelek an lolan nedoon, um ago nelcau irai uari cai.

² Ekpu aged an hat erahki ainyak intas is amen an hat erahki uhup, as ahtagrei aiek, ja namu iknise an nelcau iyehki aiek.

³ Kis ago nelcau ainyak an cai sitim, um ates inhat is ero is idi-vaig erahki uhup, um aridjipan an lolan nedoon, um apos inhat is ero erahki an nikmak.

⁴ Is aged au hat erahki aien is idivaig intas eris upyi aged: intas alep et ten, is asaig ehelemia a Ihova an nedoon, anliin cap, an nadiat asjapicnaig: is ati ehelek a Ihova.

⁵ Kis ahidai nyak ainyak um ahes an lolan nedoon um asuol, um ikni inhat erahki anliin nelcau kis ago ainyak; et amen eahki, et idivaig is asaig ehelek a Ihova.

⁶ Eris ahes Biirod a nup Isreel inpece u nup u Jeakan um atga ura um apan Mosera: is mas eahki a Eron, eris lep atelmoi yin eahki: is isjeupigmoig yin a Eliesar inhal o un um ago nauritai u natimi ahlap.

⁷ Eris ahes eahki ara um apan Cutcota; um lep ahes Cutcota um apan Jotbad, inpece et amen iran nofowai.

⁸ Is ikni ilpu mapoi Livai a Ihova an nopan iyehki, mika eri apos nelcau ara is amen iran intas alep u Ihova, um aiji an nuhup u Ihova, um aheca o un, um asan tas acis yi alwai an nidan, um umihum pam an nopan inig.

⁹ Va nitai inigki eris eti leh tah nuarin nobohtan a ilpu mapoi Livai, ka tah nitai eri ohuun tup ethi ache pan irai ilpu etwara; et ura a Ihova, et idivaig is upyi asaig ehele ra a Ihova Atua unyimia.

¹⁰ Kis amen ainyak an lolan nedoon ira adiat is forte im nepig is forte, is idivaig kis upyi ago ainyak; is lep atahaijeg intas unyak a Ihova, is lep esjum a Ihova nauahas caua vaig.

¹¹ Is ika ehelek a Ihova, Atidai aiek, um atga um uhup ira atimi, va erupu apan ara um ohuun inpece iyehki, kis asaig ehele ilpu retpora ainyak mika ekpu alupai ra ainyak.

¹² Ak nup Isreel, et idim merit nitai inigki ehelemia a Ihova Atua unyimia, mika aki imtitai Ihova Atua unyimia aijaua, um ahced nefalaig asega o un, um aiyu inliinmopomia vai yin, um aheca u Ihova Atua unyimia an liinmopomia asega, im lep au nesgamia asega,

¹³ um imiaiji intas alep asega u Ihova, im nedo o un ek asaig ehelemia ainyak an nadiat inigki, va akupu amen upene aijaua.

¹⁴ Et idim ohuun nohatag im nohatag ijinies acen a Ihova Atua unyimia, im lep nobohtan, im niji itai asega iran.

¹⁵ Ja is imiacitak ilpu retpomia a Ihova, um aiheuc vai ra, um ehtai ilpu mapora, aijaua marom, ira atimi asega, et idivaig an nopan inig.

¹⁶ Va nitai inigki etmu aperitome inliinmopomia aijaua, um jim lep ipjin inliinmopomia.

¹⁷ Et idim Atua irai ilpu atua, um Atimarid irai ilpu atimarid a Ihova Atua unyimia, Atua esjilid, um emda, er lep imtitaig vai yin, et eti asjaaicnaig ira atimi aien, um eti lucsei nimtan:

¹⁸ et ago nedo atoh aien vai ilpu umnij, im ilpu takata eris emesmas a ilpu atamnyu ura, um aiheuc vai nup urai taka uarin, um alupai ra nitai caig im nitai aso ra.

¹⁹ Akumu aiheuc vai nup urai taka uarin aijaua: akis up urai taka pece aijaua an pece Ijipt.

²⁰ Akumu imtitai Ihova Atua unyimia aijaua; um aheca o un, um apol iran, um asan tas aktit an nidan.

²¹ Et itai imiacitak vaig unyimia aien, et lep Atua unyimia, aien is ago niji itai esjilid im niji itai imiali imi caua, akis almoi aijaua an nesgaiimtamia.

²² Eris asuol an pece Ijipt a ilpu retpomia, eris atimi is sevente ara; ja eka ahinag aijaua an nopan inig va Ihova Atua unyimia, um idivaig inmoijeuv an nohatag.