Tyuteronome 1 - Intas Etipup

Nuarin tas alupas 1.

1 Intas efehtas o Moses an nehni an mesese fortied, et asuptecnaig ipjidipjid aien, 6 vai intas upyi asaig u Atua, 13 va nikni ilpu atimi alupas imi ra, 19 va nabraig pan ilpu atimi ahilek inpece, 34 va nedemda u Atua va nimiisjis ahcil ura, 41 im nedo imipalea ura.

¹ IS asaig intas iji igki asega a Moses imi nup Isreel, an nahaijin Jortan igcapam, an namasacen, an nuarin marara ubutpotet pan Suf, an niblai uari pece Peran, im Tofel, im Leban, im Haserod, im Tisahab.

² (Er atga ira adiat et eleven, eh wat ahes Horeb alaig apan Ketes-barnea, an nefalaig ubutpotet pan nedoon Sier.)

³ Is wat yetpam nadiat uhup an mohoc elevend an mesese fortied, is tas a Moses ehele nup Isreel, um asuptecnaig ehele ra intas asega is asaig ehelen a Ihova;

⁴ ja eris upyi atgei Saihon natimarid u nup Emor is amen Hesbon aien, im Oc natimarid an pece Besan is amen Astarod aien an nuarin pece Etreai:

⁵ is atupun a Moses an nahaijin Jortan igcapam, an pece Moab, um asuptecnaig intas alep inigki, um ika,

⁶ Is tas eheleija a Ihova Atua uja an nedoon Horeb, um ika, Akis amen aijaua is itu iramia an nedoon inigki:

⁷ akumu ahidai caua aijaua, um atga unyimia, um apan an nedoon u nup Emor, im lep irai iji uarin ubutpotet, an nuarin marara, im lep irai edoon, im lep an niskanse, im lep an nuarin inig et ahes nuritoga iran, im lep an nohmunjap, um yetpan an pece u nup u Kenan, im Lebanon, im nofowai alupas, nofowai Yufretes marom.

⁸ Ek mun idim ati inpece an nuhup unyimia ainyak: akumu apan aijaua um ohuun inpece inig is asan tas aktit vaig a Ihova ehele retpomia, nan, Ebraham, im Aisak, im Jekob, mika etpu alupai ehtaij aien, im lep ilpu mapoi ehtaij.

⁹ Kis tas ehelemia ainyak an nopan iyehki, um ika, Ek eti emda ainyak ache napos caua vaig:

¹⁰ is ika a Ihova Atua unyimia aki ahinag aijaua, eka idim ahinag aijaua an nopan inig et idivaig inmoijeuv an nohatag.

¹¹ (Etmu ika a Ihova Atua u ilpu retpomia aki ahinag acen aijaua, um acis yi alwai caua et idivaig is upyi asaig ehelemia aien!)

¹² Ek eti emda ainyak ache napos vaig nauatialidi unyimia, im nitai ahelwei unyimia, im nimiisjisitai unyimia.

¹³ Akumu aniv atimi iji igki aijaua era arapakau ara, um ato itai, er lep ato ra irai iji elcau unyimia, ekpu ikni ra ainyak mika eri ilpu atimi alupas unyimia ara.

¹⁴ Akis tas ehelek aijaua, um ika, Et upene nitai inigki na mun asaig aiek.

¹⁵ Kis lucsei ilpu atimi esjilid ainyak irai iji elcau unyimia, ilpu atimi arapakau eris ato ra, um ikni ra mika eri ilpu atimi alupas unyimia ara, ilpu atimi alupas irai iji dausant, im iji huntret, im ilpu atimi alupas irai iji fifte, im ilpu atimi alupas irai iji ten, im ilpu atimi alupas irai iji elcau unyimia.

¹⁶ Kis tas ehele ilpu atimi alupas unyimia ainyak an nopan iyehki, um ika, Akumu atahaijeg intas o ilpu etwamia aijaua, um tas alep atoh va atimi im ilpu etwara, im lep ilpu atimi irai taka pece era amen ehele ra ara.

¹⁷ Akumu jim asjaaicnaig an tah natimi aijaua aku wit tas alep aijaua; jam atahaijeg tup atimi im lep ilpu atimi alupas; akumu jim imtitaig atimi aijaua; et ahes ehele Atua intas alep unyimia: el et ehka yai caua tah nitai, asuptecnaig ehelek, ekpu atahaijeg ainyak.

¹⁸ Kis asaig ehelemia ainyak an nopan iyehki nitai iji igki asega aki ago aijaua.

¹⁹ Intis ahes Horeb akaija, um atga an namasacen asega iyehki is alupas um has, akis ecetai aijaua ubutpotet pan u nedoon u nup Emor, et idivaig is asaig eheleija a Atua; ja intis yetpam Ketes-barnea akaija.

²⁰ Kis ika ehelemia ainyak, Eka mun ham aijaua u nedoon u nup Emor, is alupai caija a Ihova Atua uja.

²¹ Is ati inpece an nuhup unyimia a Ihova Atua unyimia: apan um ohuun, et idivaig is asaig ehelemia a Ihova Atua u ilpu retpomia; jim imtitaig, um jim auatialidi.

²² Akis ham ubutpotet ehelek aijaua asega, um ika, Intumu abrai atimi akaija mika eri uhup iraija ara, erumu ahilek inpece imi caija ara, um adumoij pam um asuptecnaig eheleija nefalaig inig intupu atga iran akaija, im lep niji maliyum intupu apan iran akaija.

²³ Is upene irak intas iyehki: kis aniv atimi is twelv iramia ainyak, natimi is ethi irai iji elcau athiathi:

²⁴ eris atga ura ara, um aridjai an lolan nedoon, um yetpan an niskanse Eskol, um ahilek inpece.

²⁵ Eris lucsei nohwai itai an pece irai ikmara ara, um imiapam eheleija, um lep asuptecnaig eheleija, um ika, Inpece upene iyehki is alupai caija a Ihova Atua uja.

²⁶ Ja akis esjum aijaua napan vaig, um imipalea intas alep u Ihova Atua unyimia:

²⁷ akis lep tastas edemda aijaua iraili eom atga unyimia, um ika, Is amcel vai caija a Ihova, va nitai inigki is iknipagki caija aien an pece Ijipt, um atcijaig caija imi nup Emor, mika eri auahas caija.

²⁸ Intupu apan eda akaija? era mun auahas inliinmopja a ilpu etwaija, um ika, Era alupas a nup eahki um esjilid iraija; et esjilid niji maliyum ura, et lep aridjai nathatahau iran an nohatag; ecris lep ecet nup Enak eahki aijama.

²⁹ Kis ika ehelemia ainyak. Akumu jim auatialidi aijaua, um jim imtitai ra.

³⁰ Et atga an nuhup unyimia a Ihova Atua unyimia, etpu ago nedoa vai caua aien, et idivaig niji itai asega is ago vai caua aien an pece Ijipt an nuhup unyimia;

³¹ im lep au namasacen, akis ecetai nedo o Ihova Atua unyimia iran aijaua, nikavaig, is aminjinaig caua aien, et idivaig et aminjinaig inhal o un tah natimi, an nefalaig asega akis atga iran aijaua, um imihum pam napam vaig unyimia an nuarin inigki.

³² Ja akis eti ateuc an tas o Ihova Atua unyimia an nitai inigki,

³³ is atga an nefalaig aien an nuhup unyimia par ahilek nuarin igca aki ago eom atga unyimia iran, an cap an nepig par asjaaicnaig an nefalaig aki atga iran aijaua, im lep an napat an nadiat.

³⁴ Is atahaijeg intas unyimia a Ihova, is lep edemda aien, um asan tas aktit, um ika,

³⁵ Inyi idim eti ecetai inpece upene iyehki tah natimi irai ilpu atimi auatatimi iji igki an nopan inig, kis upyi asaig ainyak mika ki alupai ehtaij etpomia ainyak,

³⁶ Keleb ache inhal u Jefunni; etpu ecetai aien, ekpu alupai yin ainyak im ilpu hal o un inpece inig is atga iran aien, va nedo o un, nikavaig, is apitac emda Ihova aien.

³⁷ Is lep edemda vai nyak a Ihova vai caua, um ika, Napu eti lep apan eahki aiek.

³⁸ Ja etpu apan eahki a Josua inhal u Nun, et aiji aien an nuhup unyum, etpu apan iran aien: etmu emda inliinmopon aien; etpu ika aien ehele nup Isreel eri ohuun ara.

³⁹ Erupu lep apan eahki a ilpu halav haklin unyimia, akis ika aijaua eri lucsei ra an nedoa, im ilpu hal unyimia, eris eti ato tah nitai upene ara ka tah nitai has an nopan iyehki, ekpu alupai ra ain-yak, erupu lep ohuun ara.

⁴⁰ Ja akumu ahidai caua aijaua, um atga an namasacen an nefalaig ubutpotet pan u Injap cap.

⁴¹ Akis tas aijaua, um ika ehelek, Ecris ago nedo has vai Ihova aijama, ecrumu aridjai aijama um ago nedoa, et idivaig intas asega is asaig eheleija a Ihova Atua uja. Eris wat arore nij va atimi ira ra natimi asega par ago nedoa iran, akis merit emda aijaua naridjai vaig an lolan nedoon.

⁴² Is tas ehelek a Ihova, um ika, Namu asaig ehele ra aiek mika eri jim aridjai ara, um jim ago nedoa; ek eti amen ehelemia ainyak; va eri jim auud caua a ilpu atimi tak atimi iramia.

⁴³ Kis tas ehelemia ainyak; ja akis eti atahaijeg aijaua, jam imipalea intas alep u Ihova, um imiisjis, um aridjai an lolan nedoon.

⁴⁴ Eris apan ehelemia a nup Emor, eris amen ara an lolan nedoon iyehki, um ahlo caua, et idivaig nedo o bi, um auahas caua Sier um yetpan Horma.

⁴⁵ Akis lep adumoij aijaua um taigtaig an nuhup u ihova; ja is eti atahaijeg nohramia a Ihova, um eti aiheuc vai caua.

⁴⁶ Akis lep amen Ketes aijaua ira adiat is ahinag, is idivaig nadiat iji ehki akis amen eahki aijaua.