Taniel 9 - Intas Etipup

Nuarin tas alupas 9.

1 Et aktaktai nopan u namen ura an pece Babelon a Taniel, 3 et asuptecnaig nedo has ura aien, 16 et alaigaheni aien mika yi ehteduo inmaliyum Jerusalem a Atua. 20 Et asuptecnaig ehelen a Cebriel va niji wiik et sevente (70) im lep vai inmas u Kristo.

¹ IS wat atupun um atimarid a Taraius inhal u Ahasuirus, nup u Mitya, aien ahki eris ati yin mika yi atimarid aien an nelcau u nup u Kaltia;

² is wat atupun aien um atimarid, kis ato ainyak Taniel vai itaasviitai mika, is ehed inmesese iji ehki, is yetpam intas o Ihova ehele Jeremaia naprofeta vaig, nikavaig, inyi amen um eheshas inmaliyum Jerusalem irai mesese inyi sevente.

³ Kis yaspan ainyak ehele Natimarid Atua unyak, par ahilek itai um ugyi an nalaigaheni unyak, kis lep atwakam ainyak, um ahid apelumai uucai, um aspi nyak an nohpa.

⁴ Kis alaigaheni vai Ihova Atua unyak ainyak, um asuptecnaig upene itai, um ika, Ak Natimarid, Atua alupas, er lep imtitaig euc, et inveijec intas unyum van tas etipup unyum, im lep va naiheuc unyum vai ra et aiyu inliinmopora ara vai euc, im lep ra era imiaiji intas alep unyum ara;

⁵ ecra mun ago nedo has aijama, um ago nedo maumau, um ago nedo acalacal, um imipalea, mika ecra mun udei intas unyum aijama im intas alep unyum:

⁶ ecra mun eti atahaijeg aijama vai ilpu aheca unyum ilpu profeta, eris tas ara an nidam ehele ilpu atimarid unyima, im ilpu atimi alupas unyima, im ilpu atimi esjilid unyima, im ilpu atimi asega an pece.

⁷ Ak Natimarid, et amen ehelum nedo atoh, ja et amen ehelema nehcamai, et idivaig an nopan inig; ehele nup u Juta marom, im nup u Jerusalem, im nup Isreel asega, era ubutpotet ara, im lep itac acen, irai iji pece asega as imiapan ra iran aiek, va nedo has ura eris ago vai euc ara.

⁸ Ak Natimarid, et amen ehelema nehcamai, im lep ehele ilpu atimarid unyima, im ilpu atimi alupas unyima, im ilpu atimi esjilid unyima, vaig inig nikavaig, ecra mun ago nedo has vai euc aijama.

⁹ Et aiheuc vai cama a Natimarid Atua unyima, et lep ohpodohpod nedo has unyima aien, ja ecra mun imipalea intas o un aijama;

¹⁰ ecra mun eti imiaiji intas o Ihova Atua unyima aijama, par aktaktai intas alep o un, is ati ehelema aien irai ilpu aheca o un ilpu profeta.

¹¹ Maiya, era mun atladwi intas alep unyum a nup Isreel asega, um imipalea intas unyum, era mun eti merit ara par atahaijeg intas unyum; va nitai inigki er asaig vai cama intas ahlaijaig, im lep intas aktit eris aged an tas alep u Moses naheca u Atua, vaig inig nikavaig, ecra mun ago nedo has vai Atua aijama.

¹² Et mun ehneijid niji tas o un aien, is asaig vai cama aien, im lep vai ilpu atimi tas alep unyima eris aminjinaig cama ara, mika et mun imiapam ehelema nohocred alupas aien: eris idim eti ago irai nup uran tah anuarin an nobohtan asega is idivaig eris ago irai nup u Jerusalem.

¹³ Et mun yetpam irama nohocred asega inigki, et idivaig intas iyehki eris aged an tas alep u Moses: ja ecra mun eti alaigaheni aijama an nuhup u Ihova Atua unyima, mika ecri atidjima irai edo has unyima, um ato intas inveijec unyum.

¹⁴ Va nitai inigki is aminjinaig nohocred a Ihova, um imiapam ehelema: et idim atoh nedo o Ihova irai auritai asega o un et ago aien: ja ecra mun eti atahaijeg intas o un aijama.

¹⁵ Im lep inig, ak Natimarid Atua unyima, as iknipagki ilpu atimi unyum an pece Ijipt aiek an nikmam emda, um leh nimiahpas ehelum, et idivaig an nopan inig; ecra mun ago nedo has aijama, ecra mun ago nedo imipalea aijama.

¹⁶ Ak Natimarid, ek ugyi euc ainyak va nedo atoh asega unyum, namu adenaig nedemda unyum aiek im intavaitap unyum van maliyum unyum Jerusalem, nedoon itap unyum: era imiafakahcil Jerusalem im lep ilpu atimi unyum ara asega era arehed irama ara, va nedo has unyima, im nedo imipalea u ilpu retpoma.

¹⁷ Im lep inig, ak Atua unyima, namu atahaijeg nalaigaheni u naheca unyum aiek, im intas ugyi euc o un, um ika yi lep lah nesganimtam aiek va nimnim itap unyum et ahyuahyu, et unyum, ak Natimarid.

¹⁸ Ak Atua unyak, namu atgeig pam intikgam aiek, um atahaijeg; namu yaspam aiek, um almoi inpece unyima et umaruma, im lep inmaliyum er anvi nidam iran: ecra idim eti ikni an nuhup unyum intas ugyi euc unyima va nedo atoh unyima, ja va naiheuc alupas unyum.

¹⁹ Ak Natimarid, namu atahaijeg cama aiek; ak Natimarid, namu jim aru irama aiek; ak Natimarid, namu atahaijeg cama aiek, um ago nedo atoh vai cama; namu auroauro aiek, ak Atua unyak, va nidam: er idim anvi nidam an maliyum unyum im lep ira atimi unyum.

²⁰ Kis wat tas ainyak, um alaigaheni, um asuptecnaig nedo has unyak im lep nedo has u nup uran pece unyak nup Isreel, um asaig intas ugyi itai an nalaigaheni unyak an nuhup u Ihova Atua unyak vai nedoon itap u Atua unyak;

²¹ maiya, kis wat tas ainyak um alaigaheni, is ubli pam nyak a Cebriel natimi iyehki, kis upyi ecet yin ainyak an nitai ehvaig, eris ika yi fi auroauro aien um ae pam, an nopan ago nitai ahlap an jupura.

²² Is asuptecnaig itai aien, um tas pam ehelek, um ika, Ak Taniel, ek mun hamki ainyak an nopan inig par esege imi euc mika an arapakau aiek um ato nitai iji igki.

²³ As wat atupun aiek um ugyi itai eris asaig intas inig, ek mun ham ainyak par asuptecnaig ehelum; er idim merit alupas vai euc: namu ato intas iyehki aiek, um aktaktai nitai ehvaig.

²⁴ Er asaig inwiik et sevente (70) vai nup uran pece unyum im lep van maliyum itap unyum, par lucsei nimtan nedo has, um atipagki nedo imipalea, um asan nigpa va nedo acalacal, um lep imiapam nedo atoh inig etpu amen irai iji mesese, um atapnes an nitai asjaaicuaig nitai ehvaig im intas asuptecnaig, um ati natimi inig et itap esjilid Aien mika yi Atimarid.

²⁵ Namu ato aiek um aktaktai mika, inyi eteuc inwiik inyi seven, im lep inwiik inyi sikste tu (62) ahes an nopan iyehki eris asaig, mika eri ehteduo um actaig inmaliyum Jerusalem, um yetpan irai Mesia Natimarid: uhpu lep ago nefalaig alupas, im lep nathatahau, an nopan iyehki etpu eteuc nohocred iran.

²⁶ Etu wit ti pan itac inwiik inyi sikste tu (62) eri atgei Mesia, ja eti va nedo o un: erupu auahas inmaliyum im nimnim itap a ilpu dualep u natimarid iyehki etpu ham aien; etpu idivaig nahgarero uhu wit ago ehni itai, er idim ika eri auahas itai um yetpan an nopan iyehki eri asan nigpa.

²⁷ Etpu asig yi aktit intas etipup aien ehele atimi inyi ahinag an wiik inyi ethi: ja an nijihgan wiik etpu ika aien yi tiih nitai ahlap im nitai tup ahtai; etpu lep amen an neom itap nitai has par auahas iran; vaig inig nikavaig, etpu umaruma um yetpan an nopan iyehki uhpu ehneijid intas iyehki eris asaig.