Taniel 8 - Intas Etipup

Nuarin tas alupas 8.

1 Et ahuumtidec a Taniel um ecetai siip atamaig et ethi im nanin atamaig et ethi. 13 Niji adiat et tu dausant im dri huntret (2,300) er ahlap irai itai ahlap iran. 15 Et ago eropse Taniel a Cebriel, um asuptecnaig nesgantas an nitai ehvaig.

¹ IS wat atimarid an mesese is dri a Belsasar, is ehcohos pam ehelek Taniel nahuumtidec is ethi, kis wat ti pan itac nahuumtidec iyehki ainyak is upyi ehcohos pam ehelek.

² Kis um ecetai nitai eris ehvaig ehelek ainyak; kis wat ecetai ainyak, kis amen inmaliyum Susan ainyak, an nimnim u natimarid, an nuarin pece Ilam; kis ecetai nitai ehvaig ainyak, um aktaktai mika kis amen u nofowai Yuleai ainyak.

³ Kis yaspan ainyak, um almoi, mika is aiji an nohmun nofowai siip atamaig is ethi is ero nipat o un: is opra nipat erahki; ja is opra acen is ethi, is apitac um eteuc nipat iyehki is opra acen.

⁴ Kis almoi ainyak mika is ahau itai siip atamaig iyehki an nete o un, im lep an narutu, im lep an nuritoga; is ti tah nitai eklim edo irai pece is emda par aiji an nuhup o un, is lep ti tah par imicoho itai vai yin; ja is ago itai aien is upene iran, is idim esjilid aien.

⁵ Kis wat aktaktai vaig ainyak, is idim ahes an nete o un nanin atamaig is ethi an narasin nobohtan asega, ja is atga aien um aiheucaiheuc: is eteuc nipat alupas an niblan nesganimtai nanin iyehki.

⁶ Is yetpan nanin atamaig ehele siip atamaig iyehki is ero nipat o un, kis ecet yin ainyak naiji vaig an nohmun nofowai, um ehteloteloh pan ehelen an nemda alupas o im.

⁷ Kis ecet yin ainyak mika is apam ubutpotet ehele siip atamaig iyehki aien, is esjilid nedemda o un vai yin, um abli siip atamaig, um asvi nipat ero o un: is auatialidi siip atamaig par aiji an nuhup o un, ja is ethaigse siip atamaig an nobohtan nanin atamaig, um auwihise yin an nobohtan: is um ti tah par imiatamaig siip atamaig vai yin.

⁸ Va nitai inigki is alupas acen nanin atamaig: ja is wat emda aien, eris asvi nipat alupas; ja is ehcohos jai nipat is for, um asjeupigmoig iyehki is upyi eteuc, is ijipan irai uarin et ahes iran nimtinjap et for.

⁹ Is ehcohos jai nipat haklin is ethi an nipat is ethi ira ra, is ijipan alupas acen nipat iyehki, an nuritoga, im lep an naridjai o un, im lep an pece et upene nalmoi vaig.

¹⁰ Is alupas nipat iyehki, um aridjai ehele iji itai an nohatag; um erekhaigse nahaiji itai im lep moijeuv, um auwihise an nobohtan.

¹¹ Is idim alupas nipat iyehki, um ika yi esjilid irai natimi esjilid an nahlap, um atipagki nitai ahlap eris ago irai iji adiat, is lep ethaigse nuarin itap u Atua aien,

¹² Eris atcijaig imi yin ilpu atimi ahlap im nitai ahlap eris ago irai iji adiat va nedo has u atimi, is ethaigse intas inveijec u Atua an nobohtan aien; is auritai aien, um amen upene.

¹³ Ja kis ahgei natimi upene is ethi ainyak intas vaig, is lep ika a natimi upene is ethi is eche ehelen iyehki is tas ki aien, Etpu ehed nadiat an nitai ehvaig va nitai ahlap eris ago irai iji adiat, im lep an nedo has er auahas itai iran, ja par atcijaig neom itap im lep ilpu atimi ahlap, eri auwihise ra au nobohtan?

¹⁴ Is um ika ehelek aien, Inyi vetpan ira adiat tu dausant im dri huntret (2,300); ja uhpu ago upene nimnim itap.

¹⁵ Kis wat ecetai nitai ehvaig ainyak Taniel, um ahilek nesgantas iran, kis ecet tah an nuhup unyak ainyak is idivaig nago ira atimi nago iran.

¹⁶ Kis ahgei nohran tah natimi ainyak an nohmun nofowai Yuleai, is tas ijinies aien, um ika, Ak Cebriel, asuptecnaig vai nitai ehvaig ehele natimi inigki.

¹⁷ Is apam aien ubutpotet an nuarin iyehki kis aiji iran ainyak: is wat apam aien, kis imtitaig ainyak, um atpuse: ja is ika ehelek aicn, Namu ato itai aiek, ak inhal u natimi: etpu idim ehneijid nitai clivaig an nopan iyehki eris asaig.

¹⁸ Is wat tas ehelek aien, kis umjeg acen ainyak um eropse an nesganimtak an nobohtan: ja is ubli pam nyak aien um imiatidai jai nyak.

¹⁹ Is um ika aien, Ekpu ika ainyak au ato itai iji igki aiek etpu yetpam etu wit ti nedemda: etpu idim ti nedemda an nopan eris asaig.

²⁰ Era ilpu atimarid u nup u Mitya im Persia nipat erahki u siip atamaig as ecetai aiek.

²¹ Et atimarid Crisi a nanin iyehki is opra nalau iran: et atimarid uhup nipat alupas an niblan nesganimtan.

²² Eris wat asvi nipat iyehki, is ehcohos jai is for par asjeupigmoig iran, etpu idim uco, erupu ahes an pece iyehki nelcau inyi for, ja etpu eti eteuc nemda o un iran.

²³ Etu wit ti nelcau ura, etu wit meto nedo has u ilpu atimi ago nedo has, etpu atidai tah natimarid yi ethi, inyi itai has nesganimtan aien, etpu arapakau aien par asaig intas efaifa.

²⁴ Etpu alupas nemda o un, jai ti nemda o un iyehki: etpu auahas alupas itai aien, etpu amen upene aien, um auritai, etpu atgei ilpu atimi emda aien im lep ilpu atimi upene.

²⁵ Etpu apaahni nedo ahcil o un va nedo arapakau o un; etpu imiahpas yin inliinmopon aien, etpu auahas atimi inyi ahinag aien an namen igpa ura: etpu lep atidai aien um aat irai Natimarid u ilpu atimarid; ja uhpu auahas yin, ja eti au nikman tah natimi.

²⁶ Et inveijec nitai ehvaig an jupura im lep au nuhialeg eris asuptecnaig vaig: va nitai inigki namu atapnes an nitai ehvaig aiek; inyi idim ahinag adiat ja uhpu ehneijid iran.

²⁷ Kis auatialidi ainyak Taniel, um emehe irai hal adiat; ja kis par atidai ainyak, um ago auritai u natimarid; kis imiali alupas ainyak nitai ehvaig iyehki, ja is eti ato naktaktai unyak tah natimi.